الموضوع: نداء و رجاء للأخوة بتوع العربي المكتوب بحروف حلبنتيشي

:k48::k48::k48::k48::k48:

اي دونت لايك زيس واي اوف رايتنج ات اول

اند اي سكيب زوس بوستينجس ذا مومينت اي سي زيم

اي كانت ستاند مانيبيوليتنج ماي مازر لانجوتش

اند سوري , فور اي كانت اكسبت اني ايكسكيوزز فور زا يوزرز اوف زيس واي اوف رايتنج


و الله العظيم انا بذلت مجهود غير طبيعي عشان اقدر اكتب الجملتين دول عربي:k48:

بجد يا جماعة يالي بتكتبو فرانكو اراب الله يكون في عونكو

دي حاجة مرهقة للدماغ و مهدرة لثقافتنا و لغتنا

انا شخصيا شايفه ان الي بيكتب فرانكو اراب فيه يكتب بالانجلش خالص اريح بكتير لينا و له

علي الاقل هيبقي منها فايده ان يقوي لغته شوية

لكن بصراحة دي طريقه مافيش من وراها اي فايده

غير اننا ننشيء جيل ضايع في لغته العربيه اللي هي اساسا ضايعه و مش ناقصه بسبب التعليم

منا تعليمي كان اجنبي طولي عمري بس ده ممنعش اهلي يخلوني اقرا عربي و يعلموني احترم لغتي

مينفعش بقي نبقي احنا الاهل للجيل اللي جاي و نبقي احنا قدوتهم و نتكلم كده

بمعني تاني يمكن يخلي الناس تحاول شوية

مينفعش نهين لغه القرأن بالطريقه دي

ميرسي لحضرتك علي الموضوع الرائع ده يا استاذ توت

جزاك الله كل خير

المشاركة الأصلية كتبت بواسطة l0new0lf

شوية عربى فصحى عسل يا توت
Xd
انا فاهم ان انت فاهم
و انت فاهم ان انا فاهم
و انا فاهم ان انت فاهم ان انا فاهم
و انت فاهم ان انا فاهم ان انت فاهم و الا ماكونتش توت الى انا اعرفه
(حد لسه فاهم حاجه!)

منور يا باشا ........... أنت فهمت ........ أنا فهمت .......مش عارف

المشاركة الأصلية كتبت بواسطة MohamedAmonem

والله يا جماعة انا مش شايف فيها مشكلة ...و الموضوع ده ملوش تاثير علي استخدام اللغة العربية في حياتنا ...
و انا شايف ان الموضوع فيه شويه ادعاء و تظييط
معظم اللي دخلوا و قلوا احنا في منتدي عربي و بيكتب عربي و عندهم حرووووف عربي في لوحه المفاتيح او (الكي بورد, keyboard)
كاتبيين اساميهم بالانجليزي و بيستخدموا النجليزي غصب عنهم في الحياة اليومية العادية في حاجات لا تحتاج استخدام الانجليزي بس احنا ساعتها بنعمل ان احنا مش واخدين بالنا و التعصب للغة بننساه ساعتها
و استخدام الطريقة ديه في الكتابه لا يمكن محوه لانه اصبح فارض نفسه هنا او في حته تانيه ..
علي فكرة المنتدي اللي احنا فيه كاتب نايل موتورز بالعربي علي ال (main page) الخاصة به
وشكرا ليكو ولتوت طارح الموضوع (كنت افضل اني اكتب اسمه الحقيقي و لكني لا اعرفه بدل ما اكتب توت )
بس نعمل ايه في عادة النيك نايمز (nicknames) اللي هي عاده دخيلة علينا بس احنا برضه عملنا نفسنا مش واخديين بالنا!!!!!!

السلام عليكم
أولا كلام حضرتك على العين و الرأس
بس لي تعقيب على تعليقك لو سمحت
الموضوع طبعا له تأثير كبير على اللغة العربية
تخيل أن الجيل الحالي بيكتب بالطريقة الحلبنتيشي دي كويس
مفيش مشكلة في الجيل ده ....... الجيل اللي بعده و اللي بعده هايبدأ يتعلم الطريقة الحلبنتيشي دي من آبائهم اللي هما بيستعملوا اللغة الغريبة دي دلوقتي

و مفيش لا ادعاء و لا تظييط و لا كلام من ده
أنا فعلا و زي 85 واحد رافضين نقرأ الكلام ده
مش علشان متعنتين و مش عايزين نقرأ
لأن أصلا متعب جدا للنظر و عايز وقت كبير علشان أقعد أفك طلاسم على رأي بوسي

و مين قال لحضرتك إن أحنا ضد الأنجليزي ؟؟؟؟؟؟؟؟؟؟؟؟؟
حد ذكر كدا في الموضوع ؟؟؟؟؟؟؟؟؟؟؟؟؟؟؟

أنا بأستخدم الأنجليزي يوميا .......... و الفرنساوي كمان ( مع أجانب مش مع مصريين )
بس أحنا في منتدى عربي مش انجليزي
ده كل المقصود .
" من تعلم لغة قوم أتقى شرهم "
بس أيه هي الحاجات أو المواقف اللي حضرتك قلت عليها و الناس بتستخدم فيها الانجليزي و هما مش محتاجينه
أنا بتكلم عن 85 واحد اللي صوتوا ضد الطريقة الغريبة دي ؟؟
أنا مش بناقش عن الشعب المصري كله !!!


لي بقى تعقيب كبير قوي على موضوع
أن الطريقة دي منتشرة و صعب اسئصالها
لو سلمنا و رفعنا الراية البيضا للطريقة دي زي ما حضرتك بتقول كدا
يبقى فعلا صعب ان أحنا نسئصلها
إنما لما توصل رسالة لكل شخصي مش عايز يتعب نفسه يتعلم لغة بلده و يبقى مثقف و متعلم باللغة اللي هو بيستخدمها في الكلام ........... و يلاقي ناس كتيرة بتلفظ الطريقة الغريبة دي ......... هايبدأ يدوس على نفسه و يتعلم و ده في صالحه قبلينا
لو كل حاجة قلنا دي منتشرة و مش هانقدر نغيرها .......... يبقى البلد دي هاتفضل ماشية في السكة اللي هي ماشية فيها و في الأخر هانغرق في البحر

ده في انجلترا عملوا حملة لمحاربة كلمات الرسائل القصيرة
اللي هي زي
I wil go 2 lndn -london- 2 mit u cus wa -want - si u
ده مثال بس على حاجة الصحافة قامت عليها هناك
يعني مستخدموش حروف غريبة للتعبير -------- و لكن قالوا أن الشباب الصاعد هاينسى لغته
و طبعا أنت لو بصيت للسرالة موقعين كلمات من النص للأختصار و كمان الحروف واقعة كلها من الكلمة و مغيرين حروف علشان تبقى الكلمة أقصر

هي دي المصيبة اللغوية اللي بتحل على الأمم و ده اللي حصل مع اللغات الأخرى و التي تغيرت تماما عن ما كانت عليه من 500 سنة مضت
ما عدا اللغة العربية
و لكن أنظر إلى الجزائر و المغرب .......... و ماليزيا و تركيا الذين تخلوا عن الحروف العربي لصالح الحروف اللاتيني

و مين قال ان الطريقة دي فارضة نفسها هنا
أعتقد أن أغلب الأعضاء صوت أنه ضد الطريقة دي
و أنا أي مداخلة مكتوبة بالطريقة دي بأتجاهلها تماما تماما تماما و لا أنظر إليها
أنا هاوجع دماغي ليه و أقعد أرتجم و أفك طلاسم
لا هي لغة أتعلمتها في المدرسة و لا هي لغة رسمية لأي بلد
دي لغة قام بعض الشباب بأختراعها و بصراحة هي لغة إشمئزاز و لغة مقززة
و الكلام على الطريقة و ليس أصحاب الطريقة

و معنى أن أغلب الناس ضده و مش بتقرأه ...... أنه مش فارض نفسه و الدليل هاتلي موضوع مفتوح بالطريقة الحلبنتيشي و فيه ردود و تفاعل كبير
و صدقني مش هاتلاقي
أي موضوع مفتوح بالطريقة دي ( أغلبهم طبعا ) بيترد فيه رد أو أثنين أو حتى صفحة لو الموضوع لقى مشجعين من نفس الفئة و بينتهي في خلال صفحة أو أثنين و بيكون في طي النسيان
إنما المواضيع المفتوحة بالعربية هاتلاقي الموضوع لو شيق ما شاء الله
صفحات و صفحات


المهم في النهاية تحياتي لك ......... و للجميع و شكرا على المداخلة و المناقشة المحترمة البنائة التي لا نريد من ورائها إلا تحقيق المصلحة العامة لنا و للأخوة أصحاب الطريقة الحلبنتيشي
و ربنا يهدينا و يهديهم
و السلام عليكم