الموضوع: نيسان صني بتنزل زيرو ببرومه

يظهر ان نيسان اختارت لها وكيل غير محترم مهنيا للاسف

شكاوى كتير من وكيل نيسان فى المنتدى .. و نفس اسلوب التعامل فى كل الشكاوى

الله يكون فى عونك

ده العادى فى مصر

المشاركة الأصلية كتبت بواسطة Nahla lashin

اشتريت عربيه sunny موديل ٢٠١٦ ، طبعا مواظبه على الصيانه معاهم اللي هما اصلا صيانتين ؛ صيانة ال 1000 وال 5000 .. العربيه انهارده 8000 كيلو .
من فتره بدأ يظهر حاجه غريبه جدا في السقف من ورا الزجاج الخلفي للعربيه ، في خلال شهر اكتشفت انها بارومه ظاهره من تحت الإزاز ومنتشره في جوانب السقف ، مع ان العربيه مفيهاش خدشه ولا اي حاجه في السقف او من تحت كلها فبريكه
البارومه دي سببها طبعا سوء تخزين للاجزاء المجمعه او سوء معالجه للصاج قبل الدهان ..مش عارفه
روحت للسبع المركز المعتمد في المنصوره قالولي وهما مستغربين جدا انها فعلا بارومه وان ده عيب تصنيع خطير طلبت تقرير بوجود برومه مرضيوش وقالولي احنا مع العربيه ماتقلقيش هنبعت ميل للشركه في مصر ونرد عليكي .. وجالي الرد بعد 10 ايام ان الشركه بلغتهم ان الحل انهم يرشوا السقف !!!!
طبعا رفضت وقلتلهم ان العربيه جديده ولو اترش السقف يبقى راح قيمتها قالولي مفيش حلول غير كده
بعت ميل للشركه في اليابان وحولوا الموضوع للشركه في مصر تاني وكلموني طلبوا ابعت العربيه ليونايتد جروب المركز التابع للشركه في الدراسه في القاهره للفحص برضه ..
تم الفحص ولقيتهم معترفين بالبارومه وانهم معندهمش حل غير رش السقف ولا يمكن استبدال العربيه عشان الاستبدال بيبقي في خلال ١٤ يوم من تاريخ الشراء حتي لو فيها عيوب تصنيع !!!!! وطبعا البارومه مستحيل كانت تظهر بالمنظر ده غير بعد فتره عشان الدهان مغطيها
طلبت منهم تقرير بالبارومه برضه مرضيوش وفالاخر ادوني ورقه فيها أمر اصلاح للعربيه لأن العميل بيشتكي ان فيها برومه .. أي كلام يعني .
بعدها بأسبوع جالي رد من نيسان اليابان ان ضمانهم ساري علي اصلاح او تغيير أي (جزء) في العربيه وانهم هيرشوا العربيه فورشهم الخاصه وده مايفقدش قيمتها ولا حاجه !!!!!!!

الوضع الحالي اني توجهت لحمايه المستهلك بشكوي الشركه بالواقعه وعملت محضر اثبات حاله ومعاينه في القسم ارفقت بالمحضر وأثبتت فيها البارومه فعلا
اولا لو في اي اقتراحات ممكن تفدني في اني ارجع حقي
ثانيا الصور بتوضح كلامي وكم الاهمال والاستهتار اللي يوصل عربيه للمنظر ده
ثالثا العربيه مبقتش رخيصه والوكيل سيء جدااااا جدااااااا والتجميع في مصر واضح انه هيضيع سمعته على اديهم فياريت الناس تفكر كويس قبل ماتشتري نيسان صني لو كان وكيل محترم كان تحمل مسؤولياته ورجعلي عربيتي بقيمتها زي مانا محافظه عليها مش يقولي ارش السقف وانا الوحيده الخسرانه في الموضوع وهو ميخسرش حاجه .

حسبنا الله ونعم الوكيل ونفوض امرنا الى الله ده السيارات الصينية والايرانية مبتعملش كده وكده زيها زى الافيو والايمجراند بارومة برضه

هو ده التقفيل والتجميع المصرى مع الاءسف الشديد
لسه مش عارفين الادا جرانتا تجميع مصرى اخبارها ايه فى البارومة

كملى اجراءاتك مع حماية المستهلك لانه الاقرب من ناحية الوقت من القضايا
ومع المحضر التى هيتم تحويله للنيابة هيحفظ
ومحتاجة محامى رفع دعوى تعويض بقيمة العربية كاملة
والموضوع هيتم تحويله لخبير هندسى السيارات التابع لوزارة العدل
للبحث فى الموضوع والمعاينة على الواقع ويحط تقريره
لانى الموضوع ده حصل مع واحد صاحبى وعملت نفس الاجراءات معاه لانى محام شركات وكان نفسى اقف معاك بس للاسف وقتى ملك الشغل بتاعى
بس انا تحت امرك فى استشارة فى اى وقت على الموقع
وربنا يعوض عليكى

الضمان وجوده زي عدمه ...
يا جماعة ...مخدوش بالكم من رد نيسان اليابان.....هي مش عايزة تغير العربية.....
لكن لو العربية ديه كانت في السعودية ..فهقولكم بكل ثقة..ان العربية كانت هتتغير وفوقيها فلوس كام.....لان ممكن بكل سهولة يتم منع استيراد النيسان لكل دول الخليج وليس السعودية فقط.....

الحل يتعمل بوست على الفيس بوك بمقاطعة نيسان ونتضامن كلنا في ونشير وممكن توصل للصحافة والتليفزيون والموضوع يكبر...غير كده محدش هجيب حقه....
وانا اول واحد ...قررت ابيع عربيتي النيسان الشكل القديم .في اول العام الجديد ...عشان اكمل عليها ...ومش هشتري نيسان تاني نهائي ...هشتري عربية الماني مستعمل ...ناس بتحترم البني ادمين
تحياتي

ربنا يعوض عليكي و يجيبلك حقك ،، بصي انا لا افقه شئ في المسائل القانونيه و اجراءاتها ، بس هقولك اني شهر 10 اللي فات بعت عربيتي و قررت اشتري عربيه في حدود 170 الف بالعافيه و متعديش المبلغ ده بقرش وااحد ،، وفكرت كتير و الحمد لله خبرتي في السيارات كبيره ،، فكان قراري النهائي انني لا اشتري اي حاجه made in egypt وخصوصا عربيه و انا سواقتي فيها جري كتير ،، وطبعا كله علي الله بس الواحد بيعمل اللي عليه ، وكان من ضمن اختياراتي الصني و اللوجان و الفيرنا و اللانوس و الجرانتا الروسي وكان الضغط من زوجتي كبير جدا لدرجه لا تتخيليها اني اشتري عربيه طويله و بشنطه ومش فارق متقفله فين ،،، وبجد والله سبتني من اي ضغوط و اي كلام و استخرت ربنا و نزلت حجزت بالمبلغ اللي كنت عامله للعربيه كيا بيكانتو 2017 هاي لاين و كانت مفاجاه لزوجتي و نكد كام يوم و في الخر رضيت بالامر الواقع ،، انا استغنيت عن حاجات كتير في سبيل التقفيل ،، لاني اصلا مش بشتري في حاجات كتير في حياتي اي حاجه متصنعه في مصر ،، ده حتي الكاتشب الهاينز بجيبه مستورد ،، وكانت نظرتي في محلها بعد فتره بسبب فصيحه هاينز مصر ،، الخلاصه ابعد كل البعد عن اي حاااجه مكتوب عليها بالنص made in egypt .

البوست اتعمل فعلا ونزل علي اكتر من بيدج منهم بيدج نايل موتورز لكن محتاجين ضغط
https://m.facebook.com/story.php?sto...__mref=message

المشاركة الأصلية كتبت بواسطة ahmedjuddy

ربنا يعوض عليكي و يجيبلك حقك ،، بصي انا لا افقه شئ في المسائل القانونيه و اجراءاتها ، بس هقولك اني شهر 10 اللي فات بعت عربيتي و قررت اشتري عربيه في حدود 170 الف بالعافيه و متعديش المبلغ ده بقرش وااحد ،، وفكرت كتير و الحمد لله خبرتي في السيارات كبيره ،، فكان قراري النهائي انني لا اشتري اي حاجه made in egypt وخصوصا عربيه و انا سواقتي فيها جري كتير ،، وطبعا كله علي الله بس الواحد بيعمل اللي عليه ، وكان من ضمن اختياراتي الصني و اللوجان و الفيرنا و اللانوس و الجرانتا الروسي وكان الضغط من زوجتي كبير جدا لدرجه لا تتخيليها اني اشتري عربيه طويله و بشنطه ومش فارق متقفله فين ،،، وبجد والله سبتني من اي ضغوط و اي كلام و استخرت ربنا و نزلت حجزت بالمبلغ اللي كنت عامله للعربيه كيا بيكانتو 2017 هاي لاين و كانت مفاجاه لزوجتي و نكد كام يوم و في الخر رضيت بالامر الواقع ،، انا استغنيت عن حاجات كتير في سبيل التقفيل ،، لاني اصلا مش بشتري في حاجات كتير في حياتي اي حاجه متصنعه في مصر ،، ده حتي الكاتشب الهاينز بجيبه مستورد ،، وكانت نظرتي في محلها بعد فتره بسبب فصيحه هاينز مصر ،، الخلاصه ابعد كل البعد عن اي حاااجه مكتوب عليها بالنص made in egypt .

التقفيل في مصر اثبت فشله والوكيل زود الطين بله لكن الفكره ان حتي اليابان مش هاممهم ومبقوش خايفين علي سمعتهم