ايه فائده 3/2/l فى الفتيس الاوتوماتيك؟؟؟؟؟؟

**juba8** · 09-02-2017 07:59 AM

**رامي مصطفى** · 09-02-2017 10:01 AM

متابع بإهتمام

**tasaka** · 09-02-2017 12:42 PM

سنضرب مثال

سنفرض ان الفتيس 4 نقلات اتوماتيك اماميه .. و عصايه الفتيس فيها d و 1و2و3

تصرفات الفتيس :
الرقم 1 .. الفتيس سيظل على النقله الاولى و لن ينقل الى اى نقله اخرى مهما زودت لفات الموتور

الرقم 2 .. الفتيس سينقل اوتوماتيك طبيعى و لكن لن يزيد عن النقله 2 .. يعنى حينقل بين 1 و 2 و العكس .. النقل سيكون على لفات موتور اعلى جدا من المعتاده ( يعنى بدلا من النقل على الفين لفه مثلا ستجده ينقل على اربعه الاف لفه مثلا )

الرقم 3 .. الفتيس سينقل اوتوماتيك طبيعى و لكن لن يزيد عن النقله 3 .. يعنى حينقل بين 1 و 2 و 3 و العكس .. النقل سيكون على لفات موتور اعلى بنسبه متوسطه من المعتاده

الرقم d .. النقل الطبيعى المعتاد .. يعنى حينقل بين 1 و 2 و 3 و 4 و العكس .. النقل سيكون على لفات الموتور المعتاده الطبيعيه

لماذا توجد هذه النقلات الاضافيه ؟
اساسا هى للحصول على عزم شديد فى حالات خاصه ..

- الحاله الاولى اثناء الوقوف .. ( غرز مثلا .. او سير على ثلج .. او مطلع شديد جدا جدا مع اوزان كبيره فى السياره ) .. يتم تعشيق رقم 1 و زياده السرعه تدريجيا .. يجب عدم زياده السرعه على نقله 1 عن 20 كم و يجب ايضا عدم المشى على الاول مسافه طويله لانها حتبوظ الفتيس

- الحاله الثانيه اثناء الحركه ..
- فى حاله طرق جبليه صاعده بشده و ان الطريق الصاعد ده طوله عده كيلومترات .. يجب عدم المشى على d
- و يجب تعشيق سرعه اقل و هى 3 او 2 طول مسافه الطريق الصاعد ( تتوقف على نوع الفتيس و عدد نقلاته ) .. فى هذه الحاله لا تزيد السرعه عن 80 او 90 كم نهائيا
- و يجب تخفيف السرعه حتى 50 او 60 كم قبل الانتقال من d الى السرعه المناسبه 2 او 3 ( تتوقف على نوع الفتيس و عدد نقلاته ) .. و فيه بعض الناس بيفضل الوقوف تماما و البدء على النقله المطلوبه ( لا اعتقد انه لازم الوقوف تماما فى حاله الطريق الجبلى الصاعد )
- اذا تم استعمال ال d فى طريق جبلى صاعد بشده لمسافات طويله جدا .. سيستمر الفتيس بالعمل .. و لكن بنهايه السفريه الطويله و لنفلرض 200 او 300 كم سنجد ان الفتيس اما قد بدأت فيه اعراض تلف او انه قد تلف فعلا

- الحاله الثالثه .. استعمال الفتيس للنقل اليدوى زى الفتيس العادى .. لا احبذ هذا الا اذا كان الفتيس ستيبترونيك مخصص اصلا لمثل هذا التصرف
اما فتيس 123 d فالنقلات الموجوده دى علشان الاستخدامات الخاصه فى ظروف معينه موش علشان استعملها يدوى بصفه مستمره

يجب ملاحظه ان هناك اكتر من نوع فتيس اوتوماتيك .. و اكتر من نوع لعدد النقلات .. و الفتيس المحدد الذى وضعته كمثال لتوضيح اجابه السؤال المحدد

**juba8** · 09-02-2017 12:58 PM

تسلم ياباشا

**borio1704** · 09-02-2017 01:24 PM

الفتيس الأوتوماتك ميزته الكبيرة جدا هي تسهيل سواقة العربية.. خصوصا للمبتدئين.. ده غير الراحة اللي بيديها للسائق في الزحمة.

بس الفتيس المانيوال ميزته الأساسية هي إنك تقدر تتحكم بالكامل في أداء العربية حسب ظروف الطريق والمواقف اللي ممكن تتعرضلها أثناء السواقة بالإضافة لرغباتك الشخصية في الأداء..

علشان كده صانعي الفتيس الأوتوماتك حاولوا يقلدوا الفتيس المانوال... علشان يبقى مرغوب للناس ..

فكل الأوضاع الموجودة في الفتيس الأوتوماتك هدفها الأساسي هو زيادة التحكم في عمل الفتيس ... لإن عدم وجود الأوضاع دي بيخلي الفتيس الأوتوماتك متأخر جدا عن الفتيس المانيوال.

باختصار..

الوضع (1) أو (L) بيشغل الغيار الأول بس..

الوضع (2) بيشغل الغيار الأول والتاني.. يعني لو سرعتك قلت هيعشق الأول.. بس لو زادت مش هيعشق أكتر من التاني.

الوضع (3) (أو D3 في الهوندا) ده مش موجود في كل العربيات الأوتوماتك.. وبيشغل الأول والتاني والتالت.. ولو ما كانش موجود غالبا بيكون عندك زرار لوقف تشغيل الأوفردرايف.. وده يعتبر البديل عنه..

ادخل على الموضوع ده لمزيد من المعلومات
http://www.nilemotors.net/Nile/412998-a.html

الفكرة دلوقتي.. إمتى تحتاج إنك تشغل الأوضاع دي؟؟؟

الوضع (1) غالبا بنستخدمه لما تكون عايز تطلع مرتفع حاد وانت بسرعة بطيئة جدا... يعني عايز عزم شديد على السرعة المنخفضة جدا... أو تكون العربية غرزت مثلا وعايز تطلعها.

الوضع (2) ممكن تستخدمه في حالة شبيهة بس تكون على سرعة أعلى شوية (20-40 كم/س)

الوضع (3) بنستخدمه في أغلب الأحوال جوه المدينة .. علشان يدينا سرعة استجابة أحسن للعربية.. خصوصا لو سرعتك حتكون في حدود 40-80 كم/س.. وده أفضل مجال لتشغيل الغيار التالت.

فيه ناس تانية بتستخدم الأوضاع دي للحصول على أعلى أداء من العربية الأوتوماتك... خصوصا لو عايز تشد مع حد تاني أو تطلع من عربية قدامك مثلا...

يعني بدل ما تدوس كيكدوان Kickdown.. عشق الوضع المناسب حسب سرعة العربية وكإنك سايق عربية مانيوال.

اختبار التسارع (0-100) بيتعمل بالطريقة دي... بإنك تطلع على (1) لحد بداية الخط الأحمر على عداد الـRPM.. وبعد كده تنقل على (2) لحد بداية الخط الأحمر و(3) بنفس الأسلوب.

دلوقتي الفتيس الاستبترونك بيعمل نفس الكلام بس من خلال وضع (+/-) اللي في الفتيس.. علشان كده مفيش في الفتيس أوضاع تانية بعد الـD غير الوضع اليدوي.

بس ميزة الفتيس الاستبترونك إنه مش هيسمحلك تعشق غيار غلط.

...