الموضوع: افضل زيت لسيريون 2007 ال 1.3

اختيار الزيت مش بالماركة نهائي.. اختيار الزيت بيبقى عن طريق المواصفات فقط... لاغير..

المواصفات دي بتبقى مكتوبة في دليل المالك (الكتالوج اللي جاي مع العربية).. وبالتالي فأفضل زيت هو اللي مواصفاته زي كتالوج العربية أو أحسن منها..

وحيث إن كل تكنولوجيا دايهاتسو جاية من تويوتا... فتوصيات دايهاتسو للزيوت والسوائل هي نفسها بتاعت تويوتا بدون شك..

توصيات مواصفات زيت المحرك في تويوتا كالتالي:

اللزوجة:
20W-50 أو 15W-40 أو 10W-30 أو 5W-30
مستوى جودة الزيت:
API SJ أو أعلى (حسب المكتوب في كتالوج السيريون 2007).. ويفضل تستخدم الأعلى طبعا بشرط ما يقلش عن SJ

يعني تقدر تستخدم أي زيت مكتوب عليه SJ أو SL أو SM أو SN .. بالترتيب من الأدنى إلى الأعلى.



كمية الزيت حوالي 3 لتر...

والتغيير كل 10 آلاف كيلومتر في الحالات المثالية.. و5000 كيلومتر في الحالات الشاقة... مهما كان نوع الزيت اللي بتستخدمه (ما دام مطابق لمواصفات الكتالوج).

أي حاجة تانية ما تصدقهاش... صدق كتالوج عربيتك بس.

لو عايز تعرف أكتر عن طريقة اختيار زيوت السيارات.. ارجع للموضوع ده:
https://www.nilemotors.net/Nile/341680-a.html (القواعد الذهبية لاختيار زيت العربية.... موسوعة مبسطة لأساسيات زيوت المحركات)

ولو عندك أي أسئلة تانية أنا جاهز.