تقييم لسيريون بعد اول 1000 كم

**zozza** · 19-09-2007 02:29 PM

اولا كل عام و انتم بخير و رمضان كريم.

احب اضيف للمنتدي المحترم رؤيتي للسياره بعد ما عملت بيها 1000 كم بالتمام و الكمال علما بان السياره موديل سيريون 2007 Automatic GLX Full Options
نتكلم الاول عن العربيه من بره ... هي سياره هاتشباك بطابع رياضي ظريف.
من اول نظره هتحبها و حتحس انها اضافه جديده للسيارات الهاتشباك.
اكصدامات اماميه و خلفيه جميله الشكل فوانيس اماميه كبيره و جميله.
كبوت العربيه صغير و شنطه ليست بصغيره بلانسبه للسيارات من فئتها. وده بيخليها عمليه جدا في الركنات و فوسط الزحمه.

السياره من الداخل:
اول حاجه حتلفت انتباهك هي التابلوه و العدادات .... بجد انا مشفتش احلي من كده.
تبلوه واسع ملىء باماكن تخزين عديده (واحد صحبي اول ما ركب قالي انتا ممحن تشيل عيل صغير ف التابلوه ده :D ).
عدادات السرعه و ال ار بي ام شكلهم جامد و في وضعيه رؤيه ممتازه و بانوار برتقاليه مضيفه اليها جمال غير عادي ده غير بساطه و سهوله قرائه اي معلومه من العدادات و الشاشه ال لا سي دي في وسط عداد السرعه.
من جهلي طبعا قعدت ادور علي عداد الحراره و عداد تنك البنزين لحد ما اكتشفت انها كمعظم السيارات الجديده بدون عداد حراره انما هى بلمبتين حراره اخضر للبروده و احمر للسخونه الشديده. و عداد البنزين طلع ديجيتال في الشاشه ال ال سي دي.
الكاسيت البيلت ان ده طبعا مخلي شكل التابلوه وهمي غير اني مش طايقه عشان مش عارف اعوضه بكاسيت ام بي ثري.

اكتر حاجه فاجئتني في العربيه هي الوسع الغير عادي للعربيه من جوه لدرجه اني و انا علي كرسي السائق مرجعه ورا و منيمه زي شباب اليومين دول لما 3 بيقعدو عالكنبه ورا .. اللي فيهم قاعد ورا السائق ركبته مش لمسه ضهر كرسي السائق (انا لحد دلوئتي مش قادر اعرف هما ازاي وفروا كل المساحه دي في عربيه هاتش باك)
لدرجة اني جربت كل العربيات اللى فالسوق عشان اقارن الصالون لقيتها اوسع من اللانوس و الاكسنت و الصني و اللانسر و البونتو.... الخ (انا نفسي مكنتش مصدق)
عرفت فعلا هما ليه بقولو عليها سيريون القلب الكبير.

كل ده اما لسه مدورتش العربيه لأن بصراحه التقفيل الياباني النضيف بيشدك.

من اول لحظه وانا سايق حسيت بان عزل الصوت داخل الصالون افضل من عربيات كتييييييير ركبتها. الصالون هادي جده مع العلم اني لسه معرفش هيحصل ايه مع السرعات العاليه عشان لسه بلين.

الفتيس وضعيته ممتازه و العربيه ناعمه جدا و مغريه انك تجري بيها بس انا ماسك نفسي بالعافيه و هتغريك اكتر لما تحس انها متزنه علي الطريق و بثبات عالي.

الحمدلله مفيش اصوات غريبه او غير مريحه و العربيه بتشم بنزين (بعمل متوسط 320كم للصفيحه داخل المدينه)

عامةّ هي سياره رياضيه تنفع جدا عائليه ممتازه و هتعرف من اول ماتسوقها اد ايه الناس اللي عاملينها اهتموا بكل نقطه فيها من حيث الجوده و المتانه و منسيوش الشكل الشياكه لأن الجنوط و السبويلر و الاكصدامات و الشكل الرياضي جعلوها تحفه بالنسبه لسيارات فئتها

في حاجات طبعا لسه مجربتهاش وهي:
اداء السياره علي طرق السفر.
مستوي الصوت داخل الصالون علي السرعات العاليه.
الثبات علي السرعات العاليه.
مستوي خدمه الصيانه.

ارجو منكم تدعولي اني اعرف ارخصها لأني بقالي 3 اسابيع مخلص كل حاجه و مش لاقي لوح ارقام في المرور (حسبي الله و نعم الوكيل فيهم)

وانشاء الله اوافيكم باخر ما توصلت اليه عن الحاجات اللي مجربتهاش و ارجو اني اكون بفيد اي حد عشان ارد ولو جزء من الجميل اللي الشباب هنا عملوه معايا وانا محتار مش عارف كنت اشتري ايه.
و الحمدلله قبل و بعد كل شئ
و السلام عليكم و رحمة الله و بركاته

**fahd_628** · 19-09-2007 02:45 PM

الف مبروووووك يا باشا على العربية و شكرا ليك على التقييم الجميل دة و ربنا يحفظهالك و عقبال ال 100000000000 كم ان شاء الله

**أبو عبدالله** · 19-09-2007 04:21 PM

الف مبروك وربنا يعطيك خيرها ويكفي عنك شرها واحب ان اؤكدلك لكل النقط اللي ذكرتها ولسه مجربتهاش في العربيه انها هتصدمك جدا منها ........... طبعا بالخير ان شاء الله ومش هتتصور والاداء على الطريق والسرعات العاليه وكل الحاجات دي

وربنا يباركلك فيها ان شاء الله بسسسسسسسسسسسسسسسسسسسسسسسس سسسسسسسسس ابقى ادعيلي

**Ahmed Hassan** · 19-09-2007 04:28 PM

الف الف مبروك... و ربنا يباركلك فيها

**HISHAM80** · 19-09-2007 06:59 PM

الف مبروك ياباشا وعقبال 10000 كم

**توفيق طة** · 19-09-2007 09:17 PM

ألف مبروك أخى العزيز ..

هى فعلا عربية محترمة وكل ماذكرتة عنها صحيح بالأضافة الى أنها على الطريق ومع السرعة

العالية منتهى الثبات والتقفبل حكاية ؟؟ وسيبك من المظاهر والعربية الكبيرة والفخمة والشنطة

ليست سيئة فى فئتها وكفاية أنها يابانى أصلى ومافيش كلام بعد كدة .هى معى من شهر تقريبا

وبحاول ألاقى فيها عيب مش لاقى بعد تجربتى مع غبور باشا وهيونداى . التوكيل والصيانة

ناس محترمة وتقدر وقت العمبل..لى تعقيب لك على السى دى .أنا لاقيت لة حل عملى

عن تجربة طبعا كل أسطوانة لا تزيد عن 80 دقيقة حول ما تريدة من أغانى وقرآن وموسيقى

الى أوديو سى دى عن طريق برنامج النيرو وستسمع صوت غاية فى الروعة .طبعا

سيصبح عندك كم كبير من الأسطوانات لها حل يوجد شنطة يد خاصة بالأسطوانات تأخذ

80 أسطوانة عند أى مكتب كمبيوتر ولا تأخذ حيز بالسيارة وتنتهى المشكلة لكن صوت

الأوديو غاية فى الروعة وأحسن من الMP3 بمراحل عن تجربة .وميروك عليك العربية.

ويعطيك خيرها ويكفيك شر الطريق ..

تحيـــــــــــاتى

**lord_n** · 22-09-2007 06:51 PM

الف مبروك ياباشا وربنا يحفظها لك

**Sharky** · 23-09-2007 12:26 AM

الف مبروك على السيارة و ربنا يبارك لك فيها

**عاشق الفولفو** · 28-09-2007 05:11 AM

الف مبروك وربنا يعطيك خيرها و خير ما صنعت له و يكفيك شرها و شر ما صنعت له

الموضوع: تقييم لسيريون بعد اول 1000 كم

LinkBack

أدوات الموضوع

عرض

-

-

-

-

-

-

المواضيع المتشابهه

تغيير علبة الدريكسيون لسيريون - أرجو الإفادة

تقييم لوجان 2011 بعد 1000 كيلو

تقييم اللوجان فول اوبشن بعد 1000 كم

تقييم اللوجان بعد 1000 كيلو

تقييم ال 1000 كم IslamGen2

الكلمات الدلالية لهذا الموضوع

المفضلات

المفضلات

ضوابط المشاركة