الموضوع: تقرير BMW X1 Model 2014 بعد 70 ألف كيلوا و3 سنوات

السلام عليكم جميعا
عذرا لغيابي الفترة الماضية، إنتوا عارفين بقى المشاغل.
الموضوع ده يعتبر تكملة لموضوع
تقرير عن بي إم دبليو X1 موديل 2014 (e84) بعد ٤٠٠٠ كيلوا
حتلاقوه في المواضيع المثبتة في القسم وياريت تقرؤوه الأول لأني مختصر حاجات كتيرة هنا. الموضوع ده عن العربية بعد ٧٠ ألف كيلوا.

قبل العربية دي كان معايا هوندا سيتي وعملت بيها في ٣ سنين حوالي ٣٢ ألف كيلوا. لكن بالإكس ١ عملت فوق ال٧٠ ألف كيلوا في ٣ سنين. السبب إن العربية مغرية ليك إنك تتحرك كتير وتسافر أي مكان في أي وقت.
مش عايز أقول على العربية إنها SUV. هي أقرب لcross over. إرتفاعها عن الأرض بيخليك تنسى حاجة إسمها مطبات أو طرق غير ممهدة. واللي كان معاه عربية واطية شوية أو عايش في الأقاليم حيفهم قصدي كويس جدا. في نفس الوقت إرتفاعها عن الأرض مش عالي لدرجة إنه يأثر على ثبات العربية (أيوة إسمه ثبات مش سبات. ثبات من ثبوت. ثبت يثبت ثبوتا فهو ثابت) في السرعات العالية خصوصا لو إنت عندك الجنط ال ١٨ زي اللي عندي. في تقرير في قسم مرسيدس عن ال GLK. اللي كاتب التقرير قايل إن ثبات الإكس ١ في الملفات أحسن من ال GLK. طبعا هي بتنزل لنا مصر دفع خلفي مش دفع رباعي.

ناس كتير بيجيبوا السي كلاس أو الفئة الثالثة وراكنينها في الجراج مخلينها لمشاوير معينة عشان ما تتبهدلشي في الطرق اللذيذة بتاعتنا. طبعا الكلام ده لا ينطبق على الإكس ١.هي عربية بي إم دبليو بريستيج تحضر بيها المناسبات المهمة وعشان هي مش منتشرة بتخليك متميز. في نفس الوقت عملية لأقصى درجة ومش محتاجة إنك تحسس عليها وإنت ماشي وتعرض على المطبات وتخليها للمشاوير المهمة بس.
هي عربية إستخدام كل يوم وأي مشوار وأي طريق (ماعدا الرمل طبعا عشان مافيهاش دفع رباعي). بالإضافة للميزة الرهيبة إنك ممكن تلم الكراسي اللي ورا ويبقى عندك مساحة تخزين رائعة تخليك تستغنى أوقات كتيرة جدا عن إنك تأجر عربية ربع نقل تنقل فيها حاجاتك.
كمان مهما تحمل فيها، إرتفاعها عن الأرض مش بيقل بدرجة ملحوظة. فاكر أول مرة أطلع بالعربية الساحل كنّا ٥ أفراد و ٣ أطفال ومعانا حاجاتنا في الشنطة وكنت مالي الشنطة للسقف ومشيت على الطريق متوقع حكة مع مطبات أنا عارفها وعارف إرتفاعها ولكن الحمد لله العربية مشيت عادي جدا ولا كإن فيها الوزن ده كله.

الخامات اللي معمول منها صالون العربية جميلة ومازالت بنفس الحالة. الزراير كلها لما بتستعملها (سواء زراير الزجاج أو اللي موجودة في الدريكسيون أو التابلوه) مازالت بنفس الإحساس لما كانت العربية زيرو. طبعا ده دليل على الإهتمام بأدق التفاصيل وبجودة المواد المصنعة منها.

بالنسبة لأنظمة الأمان فحصل موقفين وأنا سايق وربنا سترها معايا وأنظمة الأمان ساعدتني أتحكم في العربية وأتفادى حادثتين كانوا شبه مؤكدين. يعني أنظمة الأمان شغالة بصورة فعالة.

الصيانات كلها عاملها في التوكيل، مابروحشي التوكيل غير كل ١٠آلاف كيلوا أو لو إحتجت أغير التيل قبل ميعاد صيانة ال١٠ آلاف.
طبعا سيبوكم من أسعار ما قبل التعويم وخلونا في الأسعار الحالية.
صيانة ال ١٠ آلاف بتتضمن تغير زيت وفلتر زيت وفحص شامل للعربية وممكن تغير فلتر هواء بإجمالي تكلفة من ١٨٠٠ل ٢٢٠٠ جنيه.
تيل أمامي ٤٠٠٠ جنيه.
تيل خلفي ٣٦٠٠ جنيه.
صيانة ال ٦٠ الف هي اللي عورتني شوية وده متوقع ومعروف في أي عربية. غيرت طنابير أمامية وخلفية وتيل أمامي وخلفي وطقم سيرفيس كهرباء وحاجات مش فاكرها دلوقتي وكلفت حوالي ٤٠ ألف جنيه.وعشان المبلغ كبير قسمتهم على ٣ مرات. يعني عملت شوية عند ال ٦٠ ألف وشوية حاجات عند ال ٦٥ ألف وشوية كمان عن ال ٧٠ألف.

إستهلاك البنزين: أنا بستخدم ٩٢ ودي ميزة إنها مش محتاجة ال ٩٥. التانك بيعمل ٦٠ لتر بيكفي حوالي ٤٥٠ كيلوا مابين طرق مفتوحة وطرق مدينة. طبعا مع السرعات العالية الرقم ده بيقل.

بعد حوالي سنتين من إستخدامي للعربية بقيت أحس برجرجة في العربية كلها بعد ال ١٥٠. روحت لفيت آند فيكس فرع رشدي في إسكندرية وقالوا ان المشكلة مش في الكاوتش. دي مشكلة في الجنوط. التوكيل قالي غير جنوط بإجمالي تكلفة تتجاوز ال ٣٦ ألف جنيه (ده كان قبل التعويم وطبعا الله أعلم كام دلوقتي). الشباب اللي في فيت آند فيكس الله يبارك لهم وصفولي واحد في إسكندرية في الحضرة إسمه خضر بيستعدل الجنوط. روحت له ولقيت عنده البورش بتاعة ميشيل أحد بيعملها جنوط واحد باظ بسبب مطب. المهم، عدل لي الأربع جنوط بألف جنيه. وعرفت إنه حاسب البورش على ألف جنيه للجنوط الواحد عشان هو بيقيم العربية اللي عنده. بعدها العربية رجعت زيرو واختفت أي رجرجة في العربية واختفت المشكلة من غير ما أغير الجنوط.

العيوب

في صوت تزييقة خفيفة جدا بيجي من عند الأبواب عند المطبات والطرق المكسرة لما تعدي فترة ما أغسلشي العربية (الصوت مش بيطلع في الطرق العادية) مجرد ما أغسلها يختفي الصوت. هو صوت خفيف جدا ومحدش بياخد باله منه خالص غيري. يمكن عشان أنا بدقق قوي في كل تفصيل مهما كان صغير. روحت التوكيل كذا مرة بالمشكلة دي ومحدش عرف يعمل معاها حاجة. هو صوت ضعيف قوي وأنا عارف إني محسوك شوية.

الجنط ال ١٨ مخليها أنشف شوية على النقر والحفرعن الجنط ال 16. بس أنا مش ممانع بكده في سبيل الثبات الأعلى على السرعات العالية.

الناس بتخاف منها في الشراء والبيع عشان مش منتشرة. وده مش سبب مهم لأني مقتنع إني بجيب عربية أستمتع بيها. في ناس بتفكر حتبيع العربية بكام قبل ما تشتريها أصلا.

الصيانة زي أي صيانة عربية بي إم أو مرسيدس لازم تكون في مركز متخصص أو التوكيل نفسه. ناس للأسف بتعتبر ده عيب خطير في العربية.سمعت جملة بتتقال على الإكس ١ والأودي كيو ٣ إن صيانتهم وحشة!!!!! نفسي أفهم يعني إيه، مش فاهم.

إضاءة الفوانيس الأمامية كان لازم تبقى أقوى من كده. إن شاء الله حركب النور الليد من عند مستر كريم منير الكام يوم الجايين.

التوكيل بيعمل صيانة ممتازة للعربية لكن معاملتهم مش محترفين. يعني لو بتصلح خبطة بسيطة في العربية لازم تبقى حبالك طويلة وماتتوقعشي إنك عشان بقى معاك بي إم، حتلاقي معاملة شيك ومواعيد صارمة. مرة قعدت أسبوع كامل العربية في التوكيل عشان أغير الزجاج الأمامي لما إتكسر من طوبة طائشة على الصحراوي وكان كل يوم الموظف يقولي بكرة بكرة بكرة. ومرة قعدت ٣ أسابيع عشان تصلح خبطة خفيفة في الباب اليمين.
لو على قد الصيانة الدورية فلازم تستحمل مكان الإنتظار المتواضع جدا اللي لا يليق أطلاقا بتوكيل عربية كوري حتى. وكلامي ده على فروع قطامية ١ وقطامية ٢ وأبو رواش لأن دول اللي تعاملت معاهم.
بكرر ( عشان جملة الصيانة وحشة) التوكيل بيعمل الصيانة على أكمل وجه ومش بيخلي العربية محتاجة أي حاجة ولكن توقع خدمة عملاء عادية.

الإجمالي: الحمد لله مبسوط بالعربية وبرشحها لأي حد عايز يركب عربية ممتعة وعملية في الوقت نفسه.

يارب أكون أفدتكم
والسلام ختام