الزيت المناسب لالنترا md 2012

**ahmed gano** · 04-08-2017 05:35 PM

انا حاولت اقرا مواضيع الزيت عشان احدد النوع اللي محتاجو بس الكلام كتير ومقدرتش برضو احدد اللي محتاجو فقلت اخد الطريق السهل واسال وخلاص
العربية ماشية 170000 كيلو .. صوت التكيهات عندي بقا عالي انا بحط زيت 5000 موبيل وواحد قالي انو مينفعش بعد ما العربية مشيت الكيلوات دي كلها ودا سبب ان صوت المكنة عالي طبعا انا خبرتي ف المواضيع دي زيرو يا ريت افادة عن انسب زيت للمحرك ويكون ممكن يهدي الصوت بتاع الموتور

**borio1704** · 04-08-2017 08:21 PM

ملخص مواضيع الزيت اللي أنا كتبتها كلها حاجة واحدة بس... امشي على توصيات كتالوج عربيتك ... فقط لا غير...

وما تسمعش كلام أي حد تاني مهما قاللك..

امسك الكتالوج.. افهم إيه المطلوب... هات زيت يحقق المطلوب... كده تبقى تمام التمام.

عايز تعرف الفرق بين الزيوت... لازم تتعب نفسك شوية وتقرا...

وحاول تتعرف على عربيتك أكتر واقرا الكتالوج كله... انت مش دافع مبلغ قليل علشان تستخدمها بطريقة تبوظها وتخسر فلوسك...

بالنسبة لصوت الموتور...

عمر ما كان صوت الموتور دليل على جودة الزيت...
بالعكس... أحيانا كتير الزيت اللي "يكتم" صوت الموتور بيكون له تأثير سلبي.

زي ما قلتلك... حط زيت زي ما الكتالوج طالب وبس... ونزله في مواعيده اللي الكتالوج كاتبها... ومالكش دعوة بحاجة تانية... وسيبك من الأوهام دي.

نزل كتالوج عربيتك من هنا... حسب ما أنا فاهم... عربيتك هيونداي إلانترا موديل 2012...
https://drive.google.com/file/d/0B5R...ew?usp=sharing

توصيات الزيت في صفحة 355 و 356 من الكتالوج

ولو عايز تزود معلوماتك عن الزيوت.. ادخل هنا...
https://www.nilemotors.net/Nile/341680-a.html (القواعد الذهبية لاختيار زيت العربية.... موسوعة مبسطة لأساسيات زيوت المحركات)

...

**borio1704** · 06-08-2017 08:41 AM

المشاركة الأصلية كتبت بواسطة ahmed gano

اولا شكرا جدا على اللينكات
ثانيا وفقا للكتالوج واللينك الزيت المناسب شيل هيلكس وبالمواصفات دي :
Api sl أو acea a3 او ( ilsac gf-3 ) اواعلى
وبناء على الكتالوج رقم sae كلو ينفع عدا 5w20 في الشرق الاوسط
طبعا الموضوع ماشاء الله كبير جدا اني اقدر المو في يوم لكن اللي استغربتو ان الكتالوج كاتب ان الزيت يتغير لكل 1000 كيلو 1 لتر بمعنى ان ال 3.3 لتر يتغيرو على 3300 كيلو واللي فهمتو من موضوع تاني ان المسافة دي بتتغير طبقا للاضافات المضافة لزيت الاساس .. انا اتلخبطت مش قادر احدد المفروض كدا الزيت يتغير على كام كيلو

طيب أنا كنت عايز أوضح حاجة مهمة... يمكن تحس إني بناقض نفسي بس الموضوع مش كده خالص..

أولا... أي اسم لماركة تجارية موجودة في الكتالوج هي عبارة عن اتفاق تجاري بين الشركتين ومالوش أي علاقة بمواصفات الزيت فعلا... والحقيقة إن شركة شل عندها نوع زيت واحد بس مكتوب عليه (هيونداي/كيا) بلزوجة 5w-30 .. ومش بينزل الشرق الأوسط من أساسه.

والأكتر من كده... إن كتالوج السيراتو كاتب ماركة تانية خالص.. مع إن العربيتين مستخدمين نفس الموتور.. والكتالوج يكاد يكون نسخة طبق الأصل من الكتالوج اللي حضرتك نزلته...

فما تحطش ماركة الزيت في دماغك نهائي.. المواصفات وبس.

ثانيا.. موضوع 1 لتر لكل 1000 كيلومتر.. ده اسمه استهلاك الزيت... والمقصود بيه إن الزيت ممكن ينقص في الموتور بشكل طبيعي بما معدله 1 لتر كل 1000 كيلومتر...

اتخضيت.. صح؟؟؟

المعدل ده مش هيحصل إلا في حالات محددة... زي التحميل الأقصى على الموتور.. وممكن بردو لو استخدمت زيوت غير مناسبة أو خفيفة جدا... فما تحطش الموضوع ده في دماغك قوي...

مواعيد تغيير الزيت هتلاقيها في قسم الصيانة في الكتالوج ... ابتداء من صفحة 268...

وخد بالك إن الصيانة فيها حالات "شاقة" هي اللي تنطبق علينا في مصر والشرق الأوسط.. ودي المواعيد اللي تمشي عليها..
هتلاقيها في صفحة 286 و 287...

بالنسبة للمواصفات...

المطلوب بالضبط هو كالتالي:
زيت يكون مكتوب على علبته:
مواصفة api sl أو api sm أو أعلى (يعني api sn) .. ويكون مكتوب عليه بردو ilsac gf-3 أو أعلى (يعني ilsac gf-4 أو ilsac gf-5)..

أو يكون مكتوب عليه acea a3 أو أعلى (يعني acea a5)...

لو لقيت زيت مكتوب عليه مواصفة الـapi ومواصفة الـilsac ومواصفة acea بأي مواصفة من المكتوب فوق كده يبقى فعلا ده أحسن زيت... مهما كانت ماركته.

شكلك تُهت مني..

عموما.. المجال مفتوح قدامك لاختيار الزيت اللي يناسبك.. ما فاضلش غير إنك تحدد أسلوب استخدامك للعربية وميزانيتك.. علشان نساعدك في اختيار حاجة تناسبك فعلا.

...

**ahmed gano** · 07-08-2017 06:13 PM

شكرا على المتابعة معايا وفعلا استفدت كتير جدا من الموضوع اللي حطيت اللينك بتاعو موضوع تحفة الصراحة
بص يا سيدي
طبعا انا مكنتش اعرف موضوع الاتفاق التجاري للزيت اللي بيبقى مكتوب في الكتالوج ففي واحد صحبي جرب زيت اسمو xado ونصحني بيه جدا بس انا لاااا ازاي والكتالوج بيقول غير كدا يا عم يهديك يرضيك والله ابدا هوا الزيت اللي ف الكتالوج واقفل ع الموضوع دا عشان هنزعل

**ahmed gano** · 07-08-2017 06:19 PM

مش عارف الرد مش بينزل كامل ليه
عموما تاني
شكرا على المتابعة معايا وفعلا استفدت كتير جدا من الموضوع اللي حطيت اللينك بتاعو موضوع تحفة الصراحة
بص يا سيدي
طبعا انا مكنتش اعرف موضوع الاتفاق التجاري للزيت اللي بيبقى مكتوب في الكتالوج ففي واحد صحبي جرب زيت اسمو xado ونصحني بيه جدا بس انا لاااا ازاي والكتالوج بيقول غير كدا يا عم يهديك يرضيك والله ابدا هوا الزيت اللي ف الكتالوج واقفل ع الموضوع دا عشان هنزعل ��
المهم رحت بقا مركز صيانة شيل وجبت الزيت دا :
shell ultra api sn .... acea a3
5w40
طبعا لقيت 5w30 لس كان التصنيف بتاعو sl وارخص حاجه بسيطة
مش عارف بقا وسوسة ولا لا بس انا حسيت ان سحب العربية فرق معايا فعلا من حيث التسارع والنعومة بتاعت الموتور
المرة الجاية ان شاء الله هجرب زبت ليكوي مولي لان لقيت ناس كتير على المنتدى بتشكر فيه لحد ما اوصل زي ما قلت للزيت اللي بيأدي افضل اداء للموتور

**borio1704** · 08-08-2017 02:18 AM

المشاركة الأصلية كتبت بواسطة ahmed gano

مش عارف الرد مش بينزل كامل ليه
عموما تاني
شكرا على المتابعة معايا وفعلا استفدت كتير جدا من الموضوع اللي حطيت اللينك بتاعو موضوع تحفة الصراحة

العفو... أنا ما عملتش حاجة :)
أنا عارف إن الموضوع طويل .. بس هو لامم كل حاجة تقريبا عن الزيوت ويفضل تدخل كمان على اللينكات اللي جواه...
يا رب يكون سهل الفهم..

المشاركة الأصلية كتبت بواسطة ahmed gano

بص يا سيدي
طبعا انا مكنتش اعرف موضوع الاتفاق التجاري للزيت اللي بيبقى مكتوب في الكتالوج ففي واحد صحبي جرب زيت اسمو xado ونصحني بيه جدا بس انا لاااا ازاي والكتالوج بيقول غير كدا يا عم يهديك يرضيك والله ابدا هوا الزيت اللي ف الكتالوج واقفل ع الموضوع دا عشان هنزعل ��

الله ينور.. هو ده الكلام

المشاركة الأصلية كتبت بواسطة ahmed gano

المهم رحت بقا مركز صيانة شيل وجبت الزيت دا :
shell ultra api sn .... acea a3
5w40
طبعا لقيت 5w30 لس كان التصنيف بتاعو sl وارخص حاجه بسيطة
مش عارف بقا وسوسة ولا لا بس انا حسيت ان سحب العربية فرق معايا فعلا من حيث التسارع والنعومة بتاعت الموتور
المرة الجاية ان شاء الله هجرب زبت ليكوي مولي لان لقيت ناس كتير على المنتدى بتشكر فيه لحد ما اوصل زي ما قلت للزيت اللي بيأدي افضل اداء للموتور

خلي بالك...
ليكوي مولي عندها زيوت كتير تبان قدامك متشابهة في اللزوجة لكن مختلفة في المواصفات...

عندهم زيت مخصوص للعربيات اليابانية والكورية.. بيبقى عليها مواصفة API و ILSAC مع بعض... وده المطلوب في كل العربيات اليابانية والكورية دلوقتي.

خد بالك بردو.. لو لقيت الزيت عليه مواصفة API من غير ILSAC ما تشتريهوش إلا إذا كان مكتوب عليه مواصفة ACEA A3 (الكلام ده ينطبق على الزيت اللي حضرتك اشتريته.. معندكش مشاكل).

ما دام نويت على ليكوي مولي.. هات من عندهم زيت Special Tec AA بلزوجة 5W-30... ده أفضل زيت مناسب لمواصفات هيونداي عند ليكوي مولي.
https://products.liqui-moly.com/oils...a-5w-30-1.html

أنصحك بردو بزيت بترومين سوبر سنثتك A-1 بلزوجة 5W-30

لو عايز زيوت ممتازة بردو.. جرب زيوت آمسويل... زيوتهم كلها تخليقية ومفيش عندهم زيوت معدنية نهائي...

في عندهم زيت اسمه سجنتشر.. مواصفاته عالية جدا لإنه زيت تخليقي حقيقي (من المجموعة 4) .. وهما كاتبين في البروشور بتاعه إنه مضمون يشتغل في العربية لمسافة 25 ألف كيلومتر أو سنة (أيهما أسبق)... بس طبعا الزيت غالي عن بقية الزيوت التخليقية المعتادة.

ادخل هنا
AMSOIL Signature Series 5W-30 Synthetic Motor Oil

AMSOIL XL 5W-30 Synthetic Motor Oil

AMSOIL OE 5W-30 Synthetic Motor Oil

موبل1 بردو عندها زيت مناسب... اسمه X1 بلزوجة 5W-30

5W-30 Oil | Mobil 1 x1 5W-30

بس نصيحة... حاول تقلل من التجارب... استقر على نوع واحد علشان التغيير المستمر بيقلل من فايدة الزيت.

وأنا لو مكانك.. هدور على الزيت السهل.. اللي أضمن ألاقيه بسهولة (ويحقق طلب الكتالوج طبعا)... واستقر عليه.. ما أغيرش تاني.

...