بسم الله الرحمن الرحيم
ده أول موضوع ليا حبيت اعمل الموضوع ده عشان الكل يستفاد و ياخد باله
العربية أوبل كورسا 2003 1600
من فتره بقيت اسمع صوت المروحة عالي حتي بعد ما ابطل العربية تفضل شغالة شويه قولت عادي مش مشكلة
بعد اسبوع بدأت اسمع صوت تكتكه و صوت عالي جدا من المروحة قولت ابقي اعدي علي الكهربائي و نفضت
انا متعود و انا سايق كل دقيقه تقريبا ابص علد العدادت لقيت مؤشر الحرارة علي الاخر ببص علي المروحة مش شغاله
سبت العربية تهدي نص ساعة و و دورت حطيت مياه و طيران علي الكهربائي
قالي المروحة دي خلاص تتغير مش هتتصلح قولتلو اجيبها منين قالي عندي ب 400 جنيه استيراد قولتلوا ركب
الباشا ركب صوتها عالي قولت مش مشكلة مشيت 2 متر بس لقيت الحرارة نار رجعتلوا


اتاري المروحة بتاعت فيكترا و ماتورها اكبر و خرمت الدياتير عشان كانت لازقه فيه لا تتخيلوا عملت ايه في الكهربائي المهم
اخدت مروحتي القديمه وفلوسي و نزلت علي الحرفيينن جبت ردياتير جديد 750 جنيه هندي و جبت مروحة استيراد لأن مكنتش لاقي جديد 350 جنيه
وروحت رايح علي بتاع الردياتير ركب الجديد و ركب المروحة الجديدة قالي 250 جنيه روحت باصصله بصه حلوه اديتلوا 100 جنيه خدهها و سكت


المهم مشيت 2 متر تاني العربيه سخنت علي الاخر في ثانية و كل ما نحط مياه القربه تبقلل و تنطرها بره و العربيه تسخن فضينا هواء نفس المشكلة قالي جوان

روحت للمكانيكي طبعا كل ده بخلي العربية متسخنش مني قالي جوان تجيلي بكره من اول اليوم نغيره طيب يا عم ده مفيش طحينه ولا دخنه ولا نتش قالي مش شرط طالما بتسخن والمياه بتغلي في القربه و تطلع بره حتي لو العربيه بارده يبقي جوان وش السلندر طيب يا عم مصنعيتك كام قالي 350
انا بحب اتأكد روحت قاطر العربيه بعربيه اخويا وطالعين علي صابر أوبل في مدينه نصر الواد اللي عنده شافها قالي جوان روحت قايل لصابر نفسه بص عليها قالي جوان
مصنعيته كام قالي 500

روحت طلعت علي واحد تاني في مدينه نصر معرفش اسمه ايه قالي جوان وش و مصنعيتك كام 400
روحت مركز اسمه بوله في عين شمس قالولي جوان و مصنعيتهم من 300 ل 350
قمت رايح علي أخرميكانيكي و اللي كنت مقرر اعمل عنده الجوان لاني عارف انو بيفهم اسمه هاني في عين شمس بردو
صاحب الورشه بص علي العربيه قالي جوان ندهت علي هاني بص علي العربيه قالي بص
في خرطوم ساقع و خرطوم سخن عشان كده انا مستبعد الجوان هاااه
ممكن طلمبه المياه يأما ترموستات الكوعه تعالالي الصبح بدري قولتلوا عنيه
تاني يوم قالي هنبتدي واحده واحده أول حاجه هنشيل ترموستات الكوعه قولت ماشي ساعه و نص بيفك و طلع الكوعه و جواها الترموستات قافش و هو قافل و مصدي رماه خالص في الشارع قفل و جرب مفيش سخونه خالص و المياه لابتغلي ولا بتخرج بره القربه ايه ده يعني مفيش جوان لا مفيش خلاص
اطلع جرب و تعالي نص ساعه بجرب و احرق علي العربيه الحمدلله مفيش اي حاجه
تجربيتي بعد ما شيلت الترموستات بقالي يومين المؤشر لا يزيد عند 85 توصل 90 المروحه تشتغل المؤشر ينزل بالنسبه للبنزين مفيش اي زياده في الاستهلاك العربيه بتاخد وقت بس علي متسخن حوالي 3 دقائق ده عشان المؤشر يطله من الصفر
خدوا بالكوا يا جماعه
اكشفوا عند اكتر من شخص
بجد لو عندك ترموستات كوعه شيلو عشان لو عطل و هو مقفول ممكن العربيه تجيب ماتور او وش سلندر (ده راي الشخصي)
متحطش مياه من الحنفيه ابدا ولا مياه مقطره
متركبش اي قطعه غيار غير بتاعه عربيتك مش حاجه تمشي عليها
عندي سؤال هي العربيه لما سخنت مني في الاول عشان المروحه عطلت ولا عشان الترموستات عطل
سألت الميكانيكي قالي لما سخت من المروحه اكيد قفش من السخونه بس انا مقتنعتش