أهلا بيك معانا يا أخي العزيز.. وإن شاء الله نقدر نفيدك
أول معلومة عن الزيوت لازم حضرتك تعرفها إن أفضل زيت لموتور عربيتك هو اللي مواصفاته مطلوبة في كتالوج عربيتك.. أو أحسن منها...
لازم ترجع للكتالوج قبل أي حاجة.. وبعد كده اختار أي زيت من أي ماركة من أي بلد منشأ.... بشرط واحد ..
إنه يكون مطابق للمواصفات.. أو أحسن منها..
ما تسمعش لآراء...
ما تسمعش لتجارب...
ما تسمعش لأي حد بيبيع زيت...
اسمع لكتالوج عربيتك وبس.
وخلي رأيك من دماغك بعد ما تعرف الصح إيه..
عايز تعرف إيه الصح؟؟؟ أنصحك تدخل على الموضوع ده"
القواعد الذهبية لاختيار زيت العربية.... موسوعة مبسطة لأساسيات زيوت المحركات
وعلشان ما أبقاش مقصر معاك...
محتاجين من حضرتك صورة توصيات الزيت في الكتالوج اللي جاي مع العربية (ضروري جدا).. وياريت ما تاخدهاش من كتالوجات النت.. لإن كتالوجات النت كلها بتاعت أمريكا.. وهناك ليهم اشتراطات زيادة ومصعبة الأمور بالنسبالنا.
تاني حاجة حضرتك محتاج تعرفها....
تجربة أنواع الزيوت مش حاجة كويسة... التغيير المستمر لماركات الزيوت بيأثر على كفاءة الزيت الجديد.. والاستمرار على نوع واحد أفضل بكتير... بشرط واحد...
إنه يكون مناسب للموتور... لو مش مناسب يبقى نغيره طبعا لنوع مناسب..
علشان كده يفضل إنك تشتري الزيت المتوفر قدامك بسهولة .. ده أحسن كتير من إنك تشتري زيت من ماركة مرة تلاقيها ومرة لأ...
خلينا نتأكد الأول إن الزيت اللي حضرتك بتستخدمه مناسب للموتور.. وإذا ما كانش مناسب... إن شاء الله نلاقي الزيت المناسب.. والموضوع مش صعب أبدا...
واحنا كمان محتاجين صورة لعبوة زيت موبل1 اللي حضرتك بتستخدمها..
في انتظار الصور (الكتالوج والزيت).
...
المفضلات