زيت golden oil

**هيثم عيسى** · 26-01-2019 10:21 AM

فى حد جرب زيت golden oil اماراتى 10000 كيلو فى نيسان صنى 2013 الشكل الجديد عايز أعرف لأن زيت شل اللى كنت بستخدمه بقى غالى جدا 680 جنيه

**kokololososo** · 27-01-2019 01:40 PM

لو الميزانية عندك مش سامحه يبقي لو الزيت الإماراتي مواصفاته مناسبة ومطابقة حسب كتالوج الصني يبقي متخفش وحطه ....
وأنا مقتنع بالرأي ده...
وخصوصا لوحالة الماتور عندك ممتازة يبقي تحط 10 آلاف أحسن..
والأستاذ بوريو خبير الزيوت يفيدك إن شاء الله في سؤالك....

**borio1704** · 27-01-2019 03:36 PM

المشاركة الأصلية كتبت بواسطة هيثم عيسى

فى حد جرب زيت golden oil اماراتى 10000 كيلو فى نيسان صنى 2013 الشكل الجديد عايز أعرف لأن زيت شل اللى كنت بستخدمه بقى غالى جدا 680 جنيه

أستاذي العزيز...

زيت الموتور ما بيتحطش بالتجربة...

اختيار زيت الموتور بيبقى حسب توصيات صانع الموتور أو العربية بس... لإن هو أحسن واحد عارف محتاجة إيه..

وزي ما قالك أستاذ kokololososo... لو الزيت الإماراتي مواصفاته مطابقة يبقى تقدر تستخدمه بدون مشاكل إن شاء الله...

بالنسبة لزيت جولدن أويل...

الزيوت التخليقية اللي على موقعهم بلزوجة 5W-30 و 5W-40 ... والاتنين بمستوى أداء API SN... حسب ماهما كاتبين...

بس الحقيقة لما دخلت على موقع الزيت ده جالي إحساس مباشر إنهم مجرد تجار والناس اللي شغالة مش فاهمين يعني إيه مواصفات زيوت محركات.. ومواصفات زيت البنزين حاطينها مكان الديزل.. ومواصفات الزيوت التخليقية حاطينها مكان الزيوت المعدنية.. والدنيا خلطبيطة خالص.

فيه عندهم حاجة غلط واضحة...

بصراحة.. ما أنصحش بالتعامل مع زيوت زي زيت جولدن أويل ده نهائي.

والحقيقة إحنا عندنا في مصر زيوت ممتازة ومش محتاجين كل دول من بره...

بس علشان نعرف نختار صح لازم نعرف كتالوج الصني طالب إيه...

الصور دي من كتالوج الصني N17

الكتالوج طالب زيوت بالمواصفات دي:

مستوى الأداء:
مطابق لمستوى أداء API SJ أو SL أو SM أو SN أو أعلى
أو
مطابق لمستوى أداء ILSAC GF-2 أو GF-3 أو GF-4 أو GF-5 أو أعلى

اللزوجة:
الكتالوج قايل إن من الأفضل استخدام لزوجة 10W-30... لكن لو ما لقيتهاش.. فالكتالوج فاتحلك الموضوع عالبحري...

فاللزوجات المسموحة هي:
0W-20
5W-30 , 5W40
10W-30 , 10W-40 , 10W-50
15W-40 , 15W-50
20W-40 , 20W-50

فحضرتك تقدر تستخدم أي زيت تنطبق عليه المواصفات باللون الأزرق اللي فوق دي..

وتعرف منين إن الزيت مطابق؟؟؟

امسك علبة الزيت وبص على ظهرها... حتلاقي مكتوب بخط صغير غالبا إن الزيت ده مواصفاته كذا وكذا (وكاتبلك أكواد بالانجليزي)...

لو لقيت كود من الأكواد اللي على العلبة زي المكتوب في الكتالوج يبقى تمام... لقيت حاجة مختلفة ما تشتريهوش

بسيطة خالص أهه.

ولو عايز نصيحتي...

اشتري زيت التعاون COOP1 بلزوجة 5W-40 أو زيت مصر فينكس بنفس اللزوجة...

مطابقين للمواصفة وسعرهم رخيص .. ومتوفرين باستمرار في السوق.

وأنا تحت أمرك في أي أستفسار تاني

...

**borio1704** · 29-01-2019 09:13 PM

المشاركة الأصلية كتبت بواسطة هيثم عيسى

https://www.jumia.com.eg/ar/golden-o...l-8712787.html
ده رابط للموقع الى فيه الزيت اللى أقصده
شكرا جزيلا للرد والنصيحة

العفو.. إحنا هنا علشان نساعد بعض...

بس رجاء... ابعد عن أي زيت من الماركة دي على الأقل لمدة كام سنة لحد ما نشوف هيعدلوا نفسهم ولا لأ...

ما يغركش السعر الرخيص.. الدواء فيه سم قاتل.

ولو عايز حاجة رخيصة فالسوق مليان حاجات بسعر معقول وكويسة ومضمونة.

...