الموضوع: افضل زيت لمزدا 3 2007

المشاركة الأصلية كتبت بواسطة (AboElDahab)

انا لسه شاري مازدا 3 وكنت عاوز اغير ليها الزيت هي موديل 2007 منيول عداد 168000

أنا آسف جدا إني اتأخرت في الرد ... في الحقيقة المعلومات عن مازدا في النت عموما ضعيفة.. والكتالوجات المتاحة أغلبها موجه لأمريكا وكندا... والبلدين دول ليهم قوانين بتحكمهم في اختيار الزيت .. فمش عايزين نضيقها على نفسنا...

عموما.. لو حابب تنزل كتالوج المازدا 3 موديل 2007 .. هو موجود في الرابط ده...
Mazda 3 Zoom-Zoom 2007 (USA & Canada) - Owners Manual

هيعرفك على العربية كلها.. بس لما تيجي ناحية زيت الموتور والسوائل عموما.. ما أنصحكش بيه .. لإن كمان المواتير اللي بتنزل أمريكا غيرنا خالص.

بصراحة تعبت لما وصلت لمعلومة يعتمد عليها.. ولقيت كتالوج لمازدا 3 بالإسباني.. لكن فيه كل المعلومات اللي احنا محتاجينها عن الزيوت...

ملخص مواصفات الزيت في الصورتين دول:
دي مواصفات الزيوت بتاعت عربيات مازدا في العالم (ما عدا أوروبا)..


دي مواصفات الزيت للعربيات اللي بتتباع في أوروبا (ما تخصناش بس ممكن نسترشد بيها)


الزيت المطلوب مواصفاته كالتالي:
مستوى الأداء (جودة الزيت)

مطابق لمستوى API SG أو SH أو SJ أو SL أو SM أو SN بالترتيب من الأسوأ إلى الأفضل
أو
مطابق لمستوى ILSAC GF-2 أو FG-3 أو GF-4 أو GF-5
أو
مطابق لمواصفة ACEA A3 أو A5 (حسب توصيات أوروبا)


بالنسبة للزوجة:

تقدر تستخدم اللزوجات التالية (المناسبة لجو مصر صيف شتا)
20W-40 , 20W-50
15W-40 , 15W-50
10W-40 , 10W-50
5W-30 , 5W-40

ولزوجة 5W-30 دي علشان تستخدمها لازم تيبقى زيت تخليقي علشان تغطي درجة الحرارة (كل الزيوت باللزوجة دي في مصر تخليقية)..

فزي ما حضرتك شايف... الاختيارات واسعة جدا جدا .... وعلشان نقلل الاختيارات لازم تقوللي معلومات زيادة علشان أساعدك...

1- ميزانيتك (علشان نعرف نختار زيت معدني ولا تخليقي)
2- أسلوب استخدامك للعربية (هل بتشتغل كتير أثناء الأسبوع ولا مجرد مشوار روتيني ولا مجرد بتطلع في الأجازة)
3- أسلوب تحميلك على الموتور (بتحب الشد والقرص على الموتور؟ - بتحمل ناس كتير في العربية؟ - طبيعة الطرق اللي بتسوق عليها فيها طرق مايلة لفوق أو لتحت؟؟ - العربية بتشتغل تاكسي أو أوبر؟؟)

بعد كده نقدر نختار صح إن شاء الله...

في انتظار ردك.

...

المشاركة الأصلية كتبت بواسطة (AboElDahab)

مساء الخير يا بشمهندس اغلب وقت العربيه مركونه مشاويري خفيفة ممكن مرة أو مرتين في السنة سفر فى الكتالوج مكتوب 5/30. 10/40. 5/20. app sl/am أو acea a3 a5
فى ناس بتقولي كاسترول ماجناتيك أو ايدج
وانا افضل شيل التر بس هو 5 40 ممكن تفيدني وشكرا

المشاركة الأصلية كتبت بواسطة (AboElDahab)

بص حضرتك كويس في الصورة..

مكتوب فوق الرسم (محرك ZJ ، Z6 ، LF ، أوروبا)

فيه رسمة تانية مكتوب فيها (باستثناء أوروبا).. وغالبا هي نفسها اللي أنا حاططها في ردي قبل كده.. وزي ما قلت لحضرتك قبل كده.. رسمة أوروبا دي نسترشد بيها بس إنما ماهياش دليلنا اللي هنطبقه.


بالنسبة لنوع الزيت المناسب..

حسب استخدام حضرتك.. يفضل تروح للزوجة الخفيفة.. وأخف لزوجة في مصر هي 5W-30.. إنما لو حضرتك حابب تروح على لزوجات تانية حسب الكتالوج فده راجع لك طبعا.

عموما.. أفضل زيت من وجهة نظري هو اللي تلاقيه مطابق لكل المواصفات المطلوبة في الكتالوج.. لإن فعليا المواصفات دي مش كلها زي بعض.. وبعض المواصفات بتغطي أجزاء ما تغطيهاش المواصفات التانية.. إنما لو الزيت مطابق لمواصفة واحدة بس فهو هيكون مقبول حسب الكتالوج.. إنما مش أحسن حاجة للموتور.

أرشح لك الزيوت التالية:

موبل1 x1 بلزوجة 5W-30...
الزيت ده محقق طلبات الكتالوج بالكامل (مطابق لمواصفات API SN و ILSAC GF-5 و ACEA A5)



زيت بترومين سوبر سنثتك A-1 بلزوجة 5W-30
بردو محقق طلبات الكتالوج بالكامل (مطابق لمواصفات API SN و ILSAC GF-5 و ACEA A5)


زيت ليكوي مولي سبيشال تك AA بلزوجة 5W-30
مطابق لمواصفات API SN-Plus و ILSAC GF-5



بالنسبة لكاسترول إيدج.. فالموقع بيقول إن فيه زيت اسمه كاسترول إيدج US (بتاع أمريكا)... وده مطابق لمواصفات الكتالوج

بس أتوقع إن السوق فيه "إيدج" حاجة تانية (أنا مقيم في السعودية ومش متابع قوي الموجود).. لكن لو حضرتك قدرت تصورلي المكتوب على ظهر العلبة بتاعت زيت إيدج المتاح أقدر إن شاء الله أقوللك إذا كان مناسب ولا لأ


بالنسبة لزيت شل ألترا بلزوجة 5W-30..
هو مطابق لمواصفات API SL و ACEA A3 وكام مواصفة تانيين مش مطلوبين في الكتالوج...
وخد بالك إن مواصفة الأداء SL أقل من SM و SN


أما لو حابب زيت بلزوجة 5W-40.. فتقريبا كل الزيوت في السوق مطابقة لمواصفة API SN و ACEA A3 .. بما فيهم زيوت التعاون ومصر للبترول..

فاختار اللي تستريحله


وفي جميع الأحوال.. مهما كان الزيت اللي هتختاره.. حاول تختار الزيت المتاح قدامك بسهولة وتضمن تلاقيه دايما.. واثبت عليه.. لإن الثبات على نوع واحد أفضل من التغيير المستمر.


يا رب تكون الصورة بقت أوضح.. وأنا تحت أمرك في أي سؤال تاني.

...

المشاركة الأصلية كتبت بواسطة (AboElDahab)

شكرا حضرتك الموتور بتاعي z6 انا كنت فى مركز خدمة متتخصص فى المازدا قلي افضل زيت هو ماجناتيك لفوق 100000الف وايدج اقل من 100000

موضوع الـ١٠٠ ألف ده كلام فارغ لا أساس له من الصحة... ومفيش أي دليل علمي على الكلام اللي بيقولوه ده...

حضرتك تقدر تستخدم اللزوجة الخفيفة بدون مشاكل ومش هيبقى فيه مشاكل إن شاء الله لو غيرت الزيت في مواعيده ومشيت على الصيانات الوقائية في مواعيدها..

كان من الأفضل يقوللك إن فيه زيوت اسمها High Milage للعربيات اللي عمرها كبير (عادة بتبقى ماشية فوق الـ١٦٠ ألف كيلومتر أو ١٠٠ ميل) ودي فيه منها لزوجات خفيفة عادي جدا زي الزيوت التخليقية..

ادخل على الموضوع ده لو عايز تعرف أكتر...
أسطورة الـ١٠٠ ألف.. هل لها أصل؟؟؟ (أسطورة الـ100 ألف كيلومتر... هل لها أصل؟؟؟)


...