زيوت 77 الهولندية للسيارات أو زيوت بيزول الألمانية.

**مصري المصري** · 30-04-2019 03:42 PM

السلام عليكم
هل حد يا اخواننا عند فكره أو تجربه أو معلومه عن زيوت 77 الهولندية للمحركات؟؟؟
وكذلك زيوت بيزول الألمانية للمحركات؟؟؟
منتظر الرد للأهمية.
وشاكر أفضالكم.

**borio1704** · 01-05-2019 05:48 PM

أهلا وسهلا بحضرتك...

أول معلومة حضرتك لازم تعرفها إن اختيار الزيوت مش بيبقى بناء على الماركة إطلاقا... ولا ببلد المنشأ.. ولا على التجارب... ولا بالتوصية.. ولا بالسمع.. ولا بأي حاجة من دي إطلاقا...

الزيت المناسب لعربيتك تعرفه من كتالوجها... في قسم الصيانة هتلاقي مواصفات محددة للزيت...
افهم المواصفات دي.. وبعدين اشتري أي زيت من أي ماركة مهما كانت... بشرط إن الزيت اللي تشتريه تكون مواصفاته زي مواصفات كتالوج عربيتك أو أحسن منها...

المواصفات مش لزوجة وبس... فيه حاجة أهم منها بكتير اسمها "مستوى الأداء" أو تقدر تسميها مستوى الجودة...

وهي دي فعليا اللي بتفرق زيت عن التاني...

يا ريت تقوللنا نوع عربيتك وموديلها علشان نعرف توصيات الكتالوج إيه ونشوف إيه الزيوت اللي تمشي معاها...

كمان لو فيه زيوت محددة عند بيزول أو غيرها تقوللنا عليها علشان نشوف إذا كانت الزيوت دي تمشي معاك ولا لأ.

حضرتك عارف إن كل شركة زيوت عندها كذا نوع زيت... أكيد مش كلهم يناسبوا عربيتك.. لإنهم بيعملوا زيوت كتير علشان تمشي مع أكبر نسبة من للسوق... وكل واحد يلاقي الزيت اللي يناسبه عندهم...

لو حابب تفهم أكتر عن الزيوت... أنصحك تدخل على الموضوع في الرابط ده...
https://www.nilemotors.net/Nile/341680-a.html (القواعد الذهبية لاختيار زيت العربية.... موسوعة مبسطة لأساسيات زيوت المحركات)

...

**مصري المصري** · 02-05-2019 06:39 PM

السلام عليكم ورحمة الله
جزاكم الله خيرا على الاهتمام وسرعة الرد
سيارتي هي هيونداي فيرنا 2006 الماتور الأسود 1500cc ؛ 12 صباب ماشيه 137 ألف كيلو حالة الماتور معقوله نوعا ما حاطط فيه شل الأصفر 15w50 SL بس معجبنيش صوت الماتور فيه خالص وصوت التاكيهات مسمع حبتين تلاته وحاسس إن نسبة البخر فيه عاليه حبتين فمش مرتاح له خالص مش عارف ليه فطبعا عاوز أغيره وطبعا مش بحب موبيل خالص وأظن إن المقابل لشل الأصفر في موبيل هيبقى 20w50 SL وده لزوجته عاليه.
فيه بجوار عملي محل زيوت واخد توكيل بيزول الألماني ومعاه زيوت شركة 77 الهولنديه وعجبني إن المركات دي تصنيع وتعبئة ألماني بالنسبه لبيزول وهولندي ل 77
طبعا عندهم لزوجات مختلفة ومتنوعة من 5w30 الى 20w50.
عجبني عندهم منتج لزوجته 15w40 SL هولندي من شركة 77 بيمشي 7 الاف كيلو زي ما قالوا وسعره 310 جنيه
وعجبني بيزول 15w40 SJ الماني بيمشي 7 الاف كيلو وسعره 330 جنيه
فأيه رأيكم وأيه الصح وأيه الخطأ

**مصري المصري** · 02-05-2019 06:47 PM

نسيت ااقولكم إن الماتور فيه حبة ترسبات ووسخ من جوه وخايف أحط له فلاش موتور أحسن يعمل في الماتور حاجه أو يضعف فيه قوة الحبك وكده!!
وكمان عربيتي تعتبر في ضمن فئة الأعمال الشاقة لأنها مبتمشيش يوميا زيادة عن 15 ل 20 كيلو وأأقل كمان
والسفر على فترات

**مصري المصري** · 06-05-2019 01:09 AM

كل عام وأنتم بخير؛ رمضان كريم علينا وعليكم
فين الردود يا أحبابنا ومشاركاتكم المفيدة بالذات الأستاذ borio?!

**borio1704** · 17-05-2019 06:51 PM

المشاركة الأصلية كتبت بواسطة kokololososo

كلامك جميل يا أستاذ بوريو ينقصني في ذلك إني أتجنب الزيوت مجهولة المصدر بمعني إن الواحد يدور علي المواصفات المناسبة لمحرك عربيته أيا كانت ماركة الزيت تاني خطوة إزاي الواحد يعرف إن الزيت ده رديء ومجهول المصدر وبكده يبأه الواحد أمن نفسه من جميع النواحي ويضمن أداء ممتاز لسيارته ....
لإن حضرتك ذكرت في مشاركة قبل كده عن نوع زيت إسمه جولدن أويل إنه رديء ....
أفدنا يا أستاذ بوريو ...

خليك في الماركات المضمونة أو المعروفة عالميا...

ماركات الزيوت المعرف غالبا حتكون إما من دول بتصنع سيارات أو دول بتنتج بترول.. هي مش قاعد ثابتة بس تنطبق على كل الزيوت المضمونة.

على العموم... دي أشهر الماركات المضمونة حسب جنسية الماركة (مش بلد الصنع):

أمريكا: موبل Mobil - شل Shell - كاسترول Castrol - كالتكس Caltex - فالفولين Valvoline - آمسويل Amsoil - بنزويل Pennzoil - رويال بربل Royal Purple - لوكاس Lucas - جلف Gulf

ألمانيا: ليكوي مولي Liqui Moly - فوكس Fuchs - رووي ROWE - مانول Mannol - بيزول Bizol - فولفر Wolver

فرنسا: توتال Total - إلف elf - موتول MOTUL

اليابان: آيسن Aisin - إينيوس ENEOS - تاكومي Takumi

إيطاليا: إيني Eni

إسبانيا: ريبسول Repsol

أستراليا: بنرايت Penrite

ماليزيا: بتروناس Petronas

السعودية: بترومين Petromin

الكويت: كيوإيت Q8

مصر: التعاون - مصر للبترول

الإمارات: آدنوك Adnoc

غير كده بصراحة صعب شوية الواحد يثق بسهولة من غير ما يدور كويس ورا الماركة دي.

...

**مصري المصري** · 22-05-2019 02:32 PM

المشاركة الأصلية كتبت بواسطة مصري المصري

السلام عليكم ورحمة الله
جزاكم الله خيرا على الاهتمام وسرعة الرد
سيارتي هي هيونداي فيرنا 2006 الماتور الأسود 1500cc ؛ 12 صباب ماشيه 137 ألف كيلو حالة الماتور معقوله نوعا ما حاطط فيه شل الأصفر 15w50 SL بس معجبنيش صوت الماتور فيه خالص وصوت التاكيهات مسمع حبتين تلاته وحاسس إن نسبة البخر فيه عاليه حبتين فمش مرتاح له خالص مش عارف ليه فطبعا عاوز أغيره وطبعا مش بحب موبيل خالص وأظن إن المقابل لشل الأصفر في موبيل هيبقى 20w50 SL وده لزوجته عاليه.
فيه بجوار عملي محل زيوت واخد توكيل بيزول الألماني ومعاه زيوت شركة 77 الهولنديه وعجبني إن المركات دي تصنيع وتعبئة ألماني بالنسبه لبيزول وهولندي ل 77
طبعا عندهم لزوجات مختلفة ومتنوعة من 5w30 الى 20w50.
عجبني عندهم منتج لزوجته 15w40 SL هولندي من شركة 77 بيمشي 7 الاف كيلو زي ما قالوا وسعره 310 جنيه
وعجبني بيزول 15w40 SJ الماني بيمشي 7 الاف كيلو وسعره 330 جنيه
فأيه رأيكم وأيه الصح وأيه الخطأ

أيه الأصلح؟؟؟