الموضوع: البنات و السجاير

المشاركة الأصلية كتبت بواسطة meza

هرمى السيجارة اللى فى إيدى و ألطشها قلم على وشها .. و أقولها كده غلط و عيب ... !!!

يا ريت يهمنا الشباب يتصلح حالهم برضه زى ما يهمنا البنات بالظبط ... و بلاش الدعوات اللى جايه من بره اللى بتلقى كل المسئولية على البنت كأنها سبب كل المصائب.

فإصلاح المجتمع لا يعنى إصلاح نصفه فقط على أمل إن النص التانى يتعدى منه.

بجد الله عليك في حكاية ارمي السيجارة من ايدي و اقولها كدة غلط و عيب بجد رد جامد يفحم اي حد, و متهيألي لو ده حصل بجد (و انا للأسف متوقع انه يحصل) حيكون رد البنت قلمين سخنين علي وش الشاب ده (و إحتمال يكونوا بالشبشب و تقوله ما انت كمان بتشرب و لا هو حلال ليك و حرام عليا).

فعلا ياريت يهمنا إصلاح الشباب كله مش بس البنات اللي هما في رأي البعض سبب الفساد و الغلاء و البلاء ( و بيني و بينكم يمكن يكونوا سبب أزمة سوق السيارات حاليا كمان), اما الشباب اللي بتقعد طول النهار و الليل علي القهاوي و بتعاكس و بتغتصب و بتشم و بتحشش و بتشرب سجاير ملغمة نقول عااااااادي ولد يا جماعة و هو حر و الواد كبر و من حقه يحشش بس البت لو في ايدها سيجارة عادية بتشربها زيها زي القهوة او الشاي او اي مكيفات تانية نقول شوفوا الفاجرة بتعمل ايه.

و علي فكرة احب اقولكم اني النص التاني اللي هو الشباب في ناس فيه مش هتتعدل خالص لأنها خلاص مالت و باظت و خربت و برضه ناس تطلع و تقولنا البنات ليه!!!!!!!!!! منعرفش بس هو كدة و خلاص.

و علي فكرة بشكر الناس اللي وصفتني بعدم النخوة جدا و بقولهم بس ياريت نصلح الشباب اللي حوالي 75% منه باظ و انهار و خرب زي ما قلت قبل كدة و ياريت نصلح الشباب اللي فاهم الرجولة غلط و فاهم اني الراجل هو اللي ليه الحق في كل شئ و الست تاخد علي دماغها و تسكت و ملهاش اي حق في اي حاجة.

بجد ردك جميل و ردك انت و غيرك زي Terrible_Darsh طمني اني لسه في أمل و لسه في شباب واعية و فاهمة و يستحقوا كلمة رجل بجد.

المشاركة الأصلية كتبت بواسطة meza

سيدى الفاضل .. أنا لست مع التدخين إطلاقاً ... لكنى أرفض مبدأ الضمير المطاطى فى المعاملة بين الراجل و المرأة ..... و أقسم إنى لو شفت بنتى المستقبلية بتشرب سجاير ما هعاقبها أكتر ما كنت هعاقب إبنى لو شفته بيعمل نفس الحكاية ... لأنى محبش أكون ظالم لأى منهما بسبب نوعه.

فقط للتوضيح.

انا فاهمك صديقي و فاهم قصدك و انا كمان مش مع التدخين بالرغم من اني مدخن....
بس كمان انا مش مع التفرقة او المعاملة اللي فيها خيار و فقوس و لو كنت هعاقب أولادي علي التدخين فلازم أولا انا ابطل و ثانيا عقابي للولد يكون زي عقابي للبنت لاني لو عاقبتها و معاقبتهوش حيفتكر انه يعمل اللي هو عايزه و ده اللي مبوظ كتير من الشباب الفالح بتاعنا.

بنات و ستات و صغيرين و كبار كتير قوي بقوا يدخنوا و انا لاحظت انهم من جميع الفئات و الاعمار وربنا يهدي

واضح ان فعلا خلاص كل واحد فينا مشاكله خلصت علشان يدور على مشكلة بنت عمه وللا بنت خالته اللى وللا حتى زميلته فى الكلية او العمل والتى لا هى قاصر ولا هى مراته ولا هو بيصرف عليها مثلا ومع ذلك ينصب كل منا من نفسه وصى شرعى على تصرفات كل بنت فى محيطه استنادا على تفسيرات مجحفة جدا وملتوية لكلمة(قوامون) (يا ترى حد من الى بيستعملوا الكلمة دى عمال على بطال يعرفوا اصلها اللغوى، نقولها كمان مرة لزوم التذكرة، قوام صيغة مبالغة من قائم والقائم بالشئ هو من يمده بالدعم الذى يحتاجه للاستمرار، يعنى لما نقول الزوج قوام على زوجته يعنى هو مسئول عن توفير احتياجاتها، لكن مافيش فى مدلول الكلمة اى معنى يدعم قيام واحد بالحجر على تصرفات زميلته فى الكلية) و استنادا ايضا على مفهومهم الخاص لكلمة (النخوة) والتى يتخذونها ذريعة لكى يدسوا انوفهم فى شئون الآخرين

اللى عايز يدخن هو حر طالما مش بيؤذينى بدخان سيجارته، هو تلقى من التعليم ما يجعله يعرف ان هذا يؤذيه،

لكن الغريبة اننا نجد ان هناك من يرى ان التدخل فى شئون زميلته المدخنة واجب تمليه عليه النخوة -مع انه لن يحرك ساكنا لو رأى زميل له يدخن-فى حين انه يرى ان تدخل نفس الزميلة فى شئونه لو رأته يجلس مع فتاه منفردين هو فعل من افعال الانحشار المذموم فيما لا يخصها، ده على اساس يعنى ان النخوة صفة ملازمة للذكور فقط لكن وجودها لدى فتاه يعتبر قله ذوق مثلا

عندما نكف عن اعتبار اخواتنا من الفتيات والسيدات مواطنين من الدرجة الثانية او اشياء قابلة للتملك سنكون قد خطونا خطوة لا بأس بها فى طريق التحضر