الموضوع: انا شايفها احلي بلد في الدنيا..بس سيبوني في حالي.

المشاركة الأصلية كتبت بواسطة casperinoo

طيب ممكن تقرا الكلام ده

مين هي مصر ؟!

ماشي انا معاك نشوف مين هي مصر

ده سؤال نساله واحنا اللي نجاوب عليه .. وبعد ما نجاوب نقدر نحدد احنا بنكره مصر ولا بنحبها


مصر مش هي الحكومة ولا الريس ولا الاحزاب ولاالناس اللي معاها فلوس كثير وعيزه تجيب اكتر ..

أوكي تمام


مصر هي الصحيان بدري و الشمس لسة بتفتح عنيها و النور بيتسرسب من الشيش و اذعة القران الكريم
طلعة من الرديو ..

يعني هو لو انا في بلد تانية مش هيبقي فيه شمس و هشيل الشيش و إذاعة القرأن الكريم مش هتلقط في الراديو !


هي عربية الفول اللي الناس ملمومين عليها و بياكلو بمزاج قوي في احلى اصطباحة ، كبايه الشاي بالحليب على قهوه بلدي الساعه 7 الصبح .

إنت شايفهم بياكلوا بمزاج !؟ مش عارف .. بس انا اما بركز بلاقيهم نصهم ناس بتبقي مواصلة الشغل و مش نايمة كويس و بتلعن العيشة و اللي عايشنها .

و الواد اللي سايق عجلة وشايل طولة العيش الساخن اللي لسة طالع من الفرن ورحته بتلعب في نخشيشك .

ده بيفكرني بأكروبات السيرك أكتر من مصر .

وعم سعيد بيفتح الدكان و بيرش ميه قدامه وبردضه اذاعة القران الكريم شغاله عنده و " في بقعة من بقاع الارض طاهرة "

أولاَ رش الميه سفه و تبذير و لا يتناسب مع إذاعة القرأن الكريم و ده أحد مظاهر جهل الشعب إنه بيرش من مياه الشرب اللي إتصرف عليها و بلاد تانية بتحفي عشانها و يرشها في الشارع .. غير إن عم سعيد غالباَ بيحط حجر و مبعرفش أركن بسببه .. بس الأرض دي طاهرة و هتفضل طول عمرها طاهرة .

و البنت ام مريله كحلي اللي منير وجهين شفوها وهي رايحة المدرسة و العيال الصغيره الي شنطة المدرسه قاطمه ضهرهم وهم متكتفين جوا المريله البني ام زراير من ورا ( بقوا يلبسوا قمصان دلوقتي ) وبرضه بيجروا ورا بعض و عملين دوشه و تحية العلم .

منظر العيال الصغيرة اللي ضهرها مقسوم من المناظر اللي بتحزني فعلاَ

مصر هي الاتنين الشباب الاصحاب قوي اللي ماشين ع الكورنيش في عز الشتا ومستخبيين جوه الهدوم التقيله و بقهم بيطلع بخار م السقعة بس واحد فيهم مطلع ايده م الجاكت و ماسك السيجارة .

ربنا يكملهم بعقلهم .

مصر هي الرجاله الكبار اللي قعدين يفتكروا ايام زمان الحلوة ويضحكوا ضحكه ترج النجم على راى الابنودي
و ام امين بتاعة الخضار الى قعدة ع النصيه من و انا في ابتدائي .

فعلاَ المفروض يفتكروا أيام زمان الحلوة ماهي راحت و ربنا يطول في عمر أم أمين .

و الشارع الفاضي باليل اللي مية الشتا بتلمع عليه و عسكري المرور الواقف ف الشارع من زمان قوي .

مبدئياَ عمري ما شفت عسكري مرور بالليل و الشارع مبيبقاش بيلمع بيبقي مطين من المطرة .

مصر هي كل البيوت اللي فتحة على بعضها و بتحب بعضها من غير مصلحة .

انا في دائرة مجتمعي و معارفي الجيران مبيجيش منهم غير القرف في و الحسد .

كل فرح عديت عليه ودخلت بركت و انت مش عارف اسم العريس و كل عزا دخلته وعملت الواجب فيه مع انك عمرك ما شوفت اللي مات .

لا ده حد فاضي

مصر هي كبايه الشاي بالنعناع و انت لابس الجلبيه الصيفي و قاعد في البلكونه مع نسمه بتهفهف بعد ما اكلت اكله محشي من ايد الولدة و بنفسها وحليت بشقتين بطيخ ساقعين في عزالصيف .

مود جميل فعلاَ و هيبقي أحلي لو في بلد تانية .

مصر سيد درويش وشد الحزام على وسطك و ام كلثوم بالليل وعبد الحليم لما تحب و منيب و ام العيال العشرية و منير وهو بيصرخ

حلو ده أحد أشكال الفن برضه اللي بحره واسع .

( يا مصر و انتي الحبيبه .. انتي اغترابي و شقايا


ونتي الجراح الرهيبه .. و انتي الي عندك دوايا )

مسمعتش أغنية منير بتاعة "إيه يا بلاد يا غريبة عدوة ولا حبيبة؟!" بحبها أكتر .

مصر هي " مولاي اني ببابك قد بسط يدي " الي عايش بيها النقشبندي لحد دلوقتي وصوت محمد رفعت بيقرا قبل الفطار ف رمضان و الشيخ الشعراوي اللي بتزعل اول ميقول ( و الى لقاء قادم ان شاء الله )

تصدق مبقتش أسمعها و مبقتش أفطر أصلاَ بقيت أروح أنام في رمضان من كتر الإكتئاب من الخناقات و سب الدين اللي بشوفه في الطريق .

مصر الابنودي وصلاح جهين و فؤاد نجم و الشيخ امام و فروق جويده و هيكل فهمي هويدى و الشيخ الغزالي فى صلاة العيد و كل الناس الي بتصلي ورا محمد جبريل في دعوة الحق و باقي الناس الي ورا الشيخ حاتم في التهجد في القائد ابراهيم وعبد الوهاب مطاوع ف اهرام الجمعة و كركتير احمد رجب .

يا باشا كل ده كلام جميل ما أي بلاد تقولها ممكن يترصلها لستة أسامي برضه !

مصر و ريحة الكبدة و امك بتعملها عشان تفطر اول يومالعيد بعد م تخلص دبح .

مبناكلش كبدة .. إيه رأيك بقي

و الصيدين الي وقفين على البحر صيف شتا بينغشو السمك ..

لأ انا مش إسكندراني مقدرش أفتي في دي

و سواق التكس اللي بتركب معاه وبيحكيلك عن مشكله مع انك عمرك مشفته قبل كدة ولا هاتشوفه بعد كده

عشان عايز يشتغلك في فلوس .

و الواد علي الي بيعدي عم جرجس الشارع وهو خايف عليه من العربيات و الست الي بتفاصل مع بتاع الخضار علي شلن زياده في الطماطم

عم جرجس مات في حادثة عربية و الست بتفاصل عشان تعرف تكمل الشهر .

مصر السفر و السهر و الشقا و العشق و المعشوق

خير

مصر الي عمنا بيرم قال عنها


" بلدنا دي زي الرصيف ... وعيز يتكنس
فيه ناس بتعرق ع الرغيف ... وناس بتعرق م التنس "

صح جداَ و الراجل ده بيقول كلام زي الفل .

هي دى مصر و اللي ما شفهاش كده و ماشفش فيها كل ده ممكن ميحبهاش .

انا شفت كل ده و بحبها كره العمي .

بس اللي شاف ده و محبهاش لازم يراجع نفسه

فعلاَ .. لازم يراجع نفسه و ينفد بجلده من البلد دي .

ينسى الناس اللي تاعبه و تاعبه البلد و يفتكر البلد نفسها

أفتكر البلد نفسها إزاي يعني .. و انا محشور في وسط المحور مش عارف أطلع أقول الله يمسيك بالخير يا حج خوفو !

البلد الي منير قلها
كفاية منير بقي قربت أكرهه هو كمان.

وحب اغترابي ف صبحك و ليلك .... وحب الونس بالرفاقة يا مصر


تنام الدموع ف العيون الهواجع .... تسهر دموعي ف حبك يا مصر


تهون الظنون و الشجون و المواجع ... اكدب ظنوني في حبك يا مصر


ها قرب و اقرب و مش ممكن اهرب .... وتنزل دموعي على خدودي تشرب


تلاقي الرموش و الخدود و المباسم مراسم .... وصورتك عليهم يا مصر

شفت قلتلك كل واحد له وجهة نظر .. انا مش مع إننا نولع في البلد بس فيه جوانب أساسية في الحياة مش موجودة عندنا .. المرور .. الصحة .. التعليم .. النظاااااااام .. يعني أساسيات .. مينفعش أسيب كل ده و أقعد أقول الشاي بالنعناع و أم أمين بتاعة الخضار !

يعني انا بنزل دلوقت مش مأمن علي مالي ولا علي نفسي هرجع ولا لأ .. و لو حصلي حاجة هل هلاقي اللي يسعفني ولا لأ .. و يمكن اللي يسعفني ده يموتني بإهماله .. و لو مت محدش هيجيب حقي .. و لو قمت انا مش هعرف أجيب حقي .. هخش في دايرة فاسدة ملهاش نهاية .. لا باخد أمان ولا تعليم ولا أي إبن !!! يعني لا يوجد حياة .. و كمان بتعرض للبلطجة سواء من اللي عاملين النظام أو الخارجين عنه .. المفروض أو المطلوب مني بقي أقول لأ معلش أصل الشمس إنهاردة كانت متسرسبة من الشيش و الموضوع ده كيفني !

سامحني لكن كلامك فعلاَ صعب عليا انا عشان أفكر كدة في الظروف دي لازم أغيب عن الوعي تماماَ يعني أبقي مدمن مخدرات عالأقل !

المشاركة الأصلية كتبت بواسطة sab3aawy

والله الحمد لله ان خدنا فيك ثواب وضحكناك،

مهو علشان كدة انا من الأول مش عايز اشارك فى الموضوع، وكل اللى عملتة انا اكدت على كلام احد الأعضاء ، بس يظهر ان كلامى انا بالذات اللى بيضحك

عموما انا عندى فكرة، ايه رايكم طالما ان البلد دى بنت ستين فردة كاوتش بالمنظر ده ندور على بلد كويسة نهاجر لها، وعندى اقتراحات لمجموعة من الدول اللى تنفع مهجر:

1- العراق، بلد عظيمة جدا وتقدر تمشى فيها وانت مطمن مهما كان انتمائك العرقى

2- ايران، ونحلم كلنا بقنبلة ذرية لكل مواطن مع اننا بنصرف البنزين بالبطاقة فى واحدة من اكبر الدول المنتجة للنفط

3- مملكة الصحراء المجاورة، بس كل واحد ياخد باله من قفاه لحسن ينزل عليه الكف الكريم لو تصادف انه كان جنب مسجد فى موعد الصلاه وكان زى حالاتى عنده اصابة رباط صليبى ومبيعرفش يصلى غير على كرسى وبالتالى ميقدرش يصلى فى جامع مافيهوش كراسى، او كان كان ماشى مع مراته فى الشارع ولون عبائتها معجبش صاحب الكف الكريم، ده طبعا لو كان محظوظ والكف صار كرباج

4-ايه رأيك فى الجزائر، وانت ونصيبك بأه، يا الحكومة تتولى امرك يالناس اللى بتنزل من الجبل تدبح وتشفى وتسلخ فى عشر دقائق وبعدين تختفى فى الجبل تانى فى لمح البصر تتولى امرك

5-نروح لبنان؟ ياسلام على جمال لبنان ومناظر لبنان وطبيعة لبنان، بس اللى يسألك على اسمك قول له ابو بكر جعفر الصادق جورج علشان يلاقى فى اسمك حاجة تمنعه انه يقتلك

6- او نروح موريتانيا؟ اقله لما تحتاج حد يخدمك تنزل تشتيره من سوق العبيد

7- او نخطف رجلينا فى مشوار لحد سيادة العقيد، علشان نتفرج على احلى كوميديا فى تاريخ الانسانية، وخصوصا لما مثلا يغلىالبنزين وينزل تانى يوم يمشى مع الشعب فى مظاهرة يعترض فيها على غلاء البترول

9- ولا نروح السوادن، ونقبض بالجنيه السوادنى اللى تمنه 2 جنيه ونص، بس متفرحش اوى ، هتشترى كيس الشيبسى ب 10 جنيه سودانى وسندوتش من عند مؤمن فرع الخرطوم ب 50 جنيه سودانى

10-نروح اليمن طيب؟ نخزن قات ونعمل احلى دماغ.ماهو مافيش حاجة تانية نعملها هناك وإلا هنقوم بثورة على وضع من اغرب الأوضاع فى العالم

11- نروح الصومال؟ وهو فيه زى الصومال؟ يا اما نشتغل مرتزقة يا اما نفتح لنا محكمة من محاكم التفتيش، بس خد بالك؟ قبل ما تسافر كل آخر وجبة لحمة فى حياتك، لأنك مش هتشوفها هناك، مع ان الصومال بتصدر خرفان. شوف ازاى

12- اقول لك، نروح باكستان، اخويا كان لسة هناك ونازل اجازة وبيشكر فيها اوى، لدرجة انه وقت ما حط رجله على ارض مطار القاهرة كاد يسجد شكرا لله على العودة، حتى لو هتعيش هناك عيشة البرنسات زى ما اخويا عايش، لكن انسى بأة الموبايل والنت والافتكاسات اللى مالهاش لازمة دى، دا انت حتى هتنسى فكرة السوبر ماركت، بالمناسبة، فى باكستان الشركة اللى موظف باكستانى بيترقى فيها ويبقى مدير الشركة، الحكومة نفسها مابتديهاش شغل لأن حتى فى عرف الباكستانيين نفسهم:باكستانى=فاسد وكاذب ومرتشى

13- وللا نروح اوروبا او امريكا او استراليا، لو لقيت فرصة للسفر لبلد من دول وتقدر تستحمل الغربة اوعى تسيب الفرصة، لأن الفساد هناك متغطى ومبيسمعش لحد المواطن العادى واكيد ظروف الحياه هناك احسن، بس يعنى على ما اذكر ان عمر مصر ما كانت بتتقارن بالدول دى ، اللهم الا فى عصر محمد على، وبالتالى كوننا مش بنتقارن بيها ديلوقتى ميشكلش تغير عما سبق

ارجو انك تكون ضحكت وانبسطت وربنا يا سيدى يجعلنا من اللى بيضحكوا الناس ، احسن ما نبكيهم وننكد عليهم

الله ينور يا أستاذ سبعاوى,
بالضبط اللى كان نفسى اقوله,
انا سافرت برا مصر ثلاثة مرات, رحت فيهم ليبيا و فعلا عرفت قيمة مصر ساعتها, اصبت هناك بالاكتئاب و الملل من كل شىء, البلد مملة و كئيبة لأقصى درجة, شكل المحلات و الشوارع و حتى العربيات, شبكة المحمول هناك عاملة زى التليفونات عندنا ايام الستينات ممكن تقعد يوم كامل عشان تطلب رقم, لكن الحاجة الوحيدة المسلية هناك هى متابعة مقولات و يفط القذافى و التندر عليها.
ده غير شعور غير طبيعى بالاشتياق الى الوطن و الأحباب و كل حاجة اتعودت عليها فى مصر.
حاجات كتير كويسة للأسف الناس مش حاسة بيها فى مصر.