السلام عليكم
انا عندي أتوس 2008 استلمتها 7/2007 تكييف وباور GL
عربية تحفة - على أد سعرها
- ناعمة وسحبها حلو 1100 سي سي
- واسعة من جوة وقعدتها ورا جميلة اوي عشان مرفوعة لفوق يعني مهما كان طول اللي قاعد ورا رجليه هتبقى مفرودة لتحت
- التابلوة حلو وبسيط وكل زرايرة سهلة تلاقيها وانت سايق
- تكييف حلو وغالبا مش باعليه عن اتنين والترموستات كمان مش بجيبة على آخرة
- عالية عن الأرض بمستوى مقبول مش عالية اوي ومش واطية اوي زي بقية الهيونداي
-:thumbsup: احلى ميزة فيها : الركنة & ممكن تركن بيها في الفراغات اللي بين العربيات مش لازم يبقى مكان كامل عشان ابعادها ممتازة ورفيعة مش عريضة فتلاقي بعد ماتركن ان العربية واقفة لمة نفسها من الجناب:thumbsup:
العيوب بتاعتها :
- خفيفة اوي من فوق المائة وعشرة كم ( مش عيب بالنسبة لسعرها - كنت جايبها 54000)وقبل المائة وعشرة زي الفل وفراملها كويسة
- بتتنطط من ورا زي الاكسيل - والعفشة بتدبدب الدبدبة بتاعة الهيونداي المعروفة
- التكييف بيأثر في الأداء طبعا
- لما بأعمل اشارة شمال - وانا لسة بألف الدريكسيون شمال في أول لفة الدراع بيرد كأني بأرد يمين تاني
- وانا بجيب مارشيدير الفتيس بيعمل عضة لازم أدوس الدبرياج واستنى علية ثواني أو أجيب أولاني وبعدين مارشيدير عشان ميعضش:surprise:
ركزوا بقى في الموقف دا : :diablo1:
انا عامل دلوقتي 58000 كم اغلبهم مصر اسكندرية الصحراوي
من ساعة ال15000 الفانوس اليمين قدام اتحرق
طبعا اول مرة اتغيرت اللمبة في صيانة العشرين عادي من غير مشاكل
وانا عالمحور لسة مادخلتش ميدان لبنان اتحرقت استنيت لحد التلاتين ألف عشان اروح التوكيل واغيرها واتحرقت برضة تاني ورجعت فيها اربع مرات وطبعا كل مرة بأحكي الحكاية من اولها واقعد اليوم بحالة وفي يوم رحت مرتين بسبب الحكاية دي
المهم قعدت فترة شغالة بعد كدة فترة كويسة وقبل صيانة 40 اتحرقت تاني وطبعا باقعد اوصي كل مرة في التوكيل واحكي المأساة وبرضة قبل ما أخلص المحور بتكون اتحرقت وارجع تاني وبرضة تقعد لها الفين تلاتة آلاف كيلو وتتحرق تاني
جيت في صيانة ال 50 برضة اتحرقت ورجعت طبعا عشان الضمان وبرضة قعدت يوم كامل وبصراحة كتبت شكوى يوميها والناس اهتمت واتصلوا بعد اسبوع بس كانت لسة شغالة والمرة دي فضلت شغالة كتير وبرضة اتحرقت بعد حوالي اربعة آلاف (54000) فرجعت طبعا والمرة دي كنت واخد رقم للشكوى لما اتصلوا بي ورحت على خدمة العملاء وقضيت اليوم كلة في خدمة العملاء جنب الورشة ودخلت بصيت عالعربية واتصلحت ولحد دلوقتي لسة شغالة وربنا يستر دا انا حتى الكاسيت مركبة في التوكيل ب160جم عشان محدش يعك في العربية بس النصيب
وفي حاجة تانية كمان ان شكاوي الناس اللي كنت بشوفها في التوكيل من الفيرنا كانت بتهديني بصراحة اني باشوف عربيات لسة بنمر المؤقتة وبتحدف يمين وفشكاوي من الفرامل والطنابير كنت باقول كويس ان دي مشاكلي
الأتوس عربية هندي ورأيي الشخصي اي تقفيل غير المصري هيبقى أحسن بكتير
العربية نقدر نقول عليها عملية اوي في فئتها وطبعا استهلاك البنزين هايل ومحسبتوش بصراحة لحد النهاردة بس هي اقتصادية من غير التكييف وبالتكييف بتاكل بنزين زيادة زي اي عربية
بس الثبات على سرعات عالية وتجميع السرعات دي بيتهيألي البيكانتو احسن وكمان الكليسا دي أكيد عن تجربة مع اصحاب لي كتير عندهم كليسا (عيبها الوحيد ضيقة جدا جدا جدا )
معلشي طولت عليكم ويارب حد يستفيد من كلامي ولو حد عندة معلومات عن مشكلة الكشاف اليمين أو المرشيدير أو دراع الاشارة يفيدني والحمد لله انها عيوب مش مؤثرة في مشي العربية