نفتح المعبر ولا نقفله (استطلاع للأعضاء)

**amr mokhtar** · 31-12-2008 01:51 PM

المشاركة الأصلية كتبت بواسطة elassar2010

قرار باستمرار غلق معبر رفح لعدم تحقيق حلم إسرائيل بتصدير المشكلة لمصر مع ارسال المعونات والمساعدات لفلسطين
نفتحوا المعبر ويدخل الفلسطنين ويحتلوا سيناء او يدخلوا وحماس تضرب صاروخ من الى بيعمل خرم فى الارض تيجى اسرائيل داخلة سيناء والحجة حماية امنها؟؟؟؟؟؟؟؟؟؟؟ودى امنية اسرائيل طبعا المعبر يتقفل ويتفتح للمصابين فقط والاغاثات ويبقا احنا عملنا الى علينا

هى مصر خلاص وصلت لمرحلة الخوف من إسرائيل للدرجة إن مصر خايفة تساعد الفلسطينين عشان متبقاش زريعة لإسرائيل تضرب مصر
الله يرحمك يا سادات وقتها إسرائيل كانت هى اللى بتخاف من مصر

أما بخصوص رأيى فى المعبر
فأنا أتفق مع الأعضاء اللى قالوا اننا نفتح المعبر مع أخذ الحيطة و ضمان عدم تسرب اللاجئين لداخل مصر
و طبعآ إحنا عندنا قوات أمن مركزى ممكن تقفل سيناء كلها مش منطقة معسكرات لاجئين
إنما إن إحنا نسيبهم كده فده حرااااااام

**AboMaro** · 31-12-2008 01:55 PM

لازم نفرق بين معبر رفح و بين لما مسؤلين حماس بيطلعوا يقولوا عايزين المعابر تتفتح

لان هما بيقصدوا بكلمه المعابر اللي هي المعابر بين غزه و اسرائيل لان منها بيدخل العمال و الناس تشتغل و تجيب فلوس وبضايع

و دي المعابر اللي مقفوله طول مده الحصار و هي دي المعابراللي تفرق مع الشعب الفلسطيني

لكن بالنسبه لمعبر رفح انا من رأيي ان المساعدات تخش منه و المصابين يجوا يتعالجوا

بالرغم من ان حماس عايزه المعبر يتفتح لدخول الناس والا بلاش خالص

طب نحسبها الناس العاديه بتروح من المعابر مع اسرائيل عشان تشتغل و تجيب فلوس وبضايع

طب هما لو دخلوا عندنا هيجيبوا فلوس ازاي

طبعا مش محتاجين نفتكر اخر مره دخلوا بالاسلحه وقعدوا الناس فبيوتها و نهبوا المحلات طبعا انا مشفتش بس ده اللي قريناه و سمعناه ف الاخبار

و كمان كميه الاسلحه اللي انظبطت و العمليات الارهابيه اللي كانوا عايزين يكرروها ف جنوب سينا طب ليه ؟؟؟؟

يبقى معبر رفح يتفتح للمساعدات و المصابين و تهدى الامور مع اسرائيل و يدخلوا العمال تشتغل

و لو مش عايزين العمال تشتغل و لا الامور تهدى مع اسرائيل خلاص تفضل المساعدات تخش لكن الفلسطنيين يجوا هنا لأ.... هيجوا يعملوا ايه

**AboMaro** · 31-12-2008 02:01 PM

على فكره بالنسبه لاختيارات الاستطلاع
انا شايف ان المعبر مفتوح اصلا
فأكيد لو صاحب الاستطلاع يقصد دخول الفلسطينين انفسهم لسينا كان يغير اللي مكتوب
بدل نقفل المعبر و لا نفتحه
يبقى الاستطلاع ندخل الفلسطنيين سينا و لا لأ

**amr mokhtar** · 31-12-2008 02:07 PM

اعتقد و الله أعلم
بغض النظر عن المعابر اللى ما بين إسرائيل و فلسطين
يتفتح معبر رفح عشان على الأقل النساء و الأطفال و الناس اللى مفيش فى أيديها حاجة تدخل و تتعالج من الأصابات او على الأقل يخدوا راحة شوية من اللى بيحصل فيهم
يعنى هى مش مسألة شغل او بضايع لإنى أعتقد ان مفيش حد دلوقتى دماغه فى شغل و تجارة ده كل واحد همه نفسه و أسرته

و انا عايز اسأل سؤال لو اللى بيحصل ده كان فى وسط اوروبا يعنى فى وسط المانيا و فرنسا و بلجيكا و كان برضه دولة مفترية بتضرب فى ناس عزل هل الدول ديه كانت هتاخد نفس الموقف ؟

**ecybrarian** · 31-12-2008 02:49 PM

المشكلة أكبر من موضوع النخوة والكرامة..لأن الموضوع لو موضوع نخوة أو كرامة يبقى نقفل المعبر. عارفين ليه؟؟؟ العارفون بقضية اللاجئين الفلسطنيين منذ تاريخها يعرفون لماذا لا نفتح المعبر. لأن اسرائيل قسمت الفلسطينين إلى ثلاثة أقسام(قسم في الشمال عند جنوب لبنان، وقسم في الغرب عند حدود مصر الشرقية وقسم ثالث في الشرق عن حدود الأردن) ثم بدأت في طرد الفلسطينين في الشمال إلى لبنان ونجحت في ذلك. فتكونت مشكلة اللاجئين في لبنان. ولمن يعرف تلك المشكلة أدت إلى حروب في لبنان.

المطلوب الآن تصدير المشكلة لمصر. تفتح مصر المعبر فينزح الفلسطينيون إلى رفح المصرية وتفرغ غزة من أهلها فتضمها اسرائيل إليها كما فعلت في الشمال. ثم تتفرغ إلى الشرق...وبذلك تكون اسرائيل قد احتلت كل الأراضي الفلسطينية. والفلسطينون يصبحون قضية في البلاد الأخرى حلها الوحيد تجنيسهم لأن اسرائيل ترفض حق عودة اللاجئين!!!!!!!!!

وبالمناسبة جامعة الدول العربية اصدرت قرار في الستينيات بحظر تجنيس الفلسطيني بجنسية أي دولة عربية. حتى لا تضيع القضية مع مرور الأجيال. ولا ده كمان قرار بلا نخوة؟؟

**aboalm** · 31-12-2008 02:55 PM

أنتم عارفين فين المشكله ؟ المشكله بمنتهى الآختصار و ده كلام من مصدر دبلوماسى مصرى مش هزار . أن الحكومه المصريه ترفض رفضا تاما أى تعامل مع حماس كل همهم هو القضاء على حماس النهارده قبل بكره بغض النظر عن الوسيله أو العواقب
أنسوا بقى كل التصريحات الخرقاء و أننا مع الشعب الفلسطينى لانهم بأختصار شديد بيأدبوا الشعب الفلسطينى أنه أختار حماس فالازم يضغطوا عليه لحد ما ينقلب هو نفسه على حماس.
من الآخر كل واحد عايز يفضل قاعد على الكرسى

**Ahmed Eraqy** · 31-12-2008 03:01 PM

المطلوب السماح للمساعدات و قوافل الاغاثة بالدخول الى غزة و عدم منعها كما كانت تعمل الحكومة المصرية المتخاذلة

**elassar2010** · 31-12-2008 04:19 PM

المشاركة الأصلية كتبت بواسطة amr mokhtar

هى مصر خلاص وصلت لمرحلة الخوف من إسرائيل للدرجة إن مصر خايفة تساعد الفلسطينين عشان متبقاش زريعة لإسرائيل تضرب مصر
الله يرحمك يا سادات وقتها إسرائيل كانت هى اللى بتخاف من مصر

أما بخصوص رأيى فى المعبر
فأنا أتفق مع الأعضاء اللى قالوا اننا نفتح المعبر مع أخذ الحيطة و ضمان عدم تسرب اللاجئين لداخل مصر
و طبعآ إحنا عندنا قوات أمن مركزى ممكن تقفل سيناء كلها مش منطقة معسكرات لاجئين
إنما إن إحنا نسيبهم كده فده حرااااااام

اكيد مصر خايفة من اسرائيل وبتشترى رضاها باى تمن والدليل صفقة الغاز المدعمة انا اعتقد ان دة دليل على خوف القيادة من اسرائيل
وبعدين احنا مالنا بالسادات دلوقتى الله يرحمة لو كان عايش اكيد كانت مصر بقت حاجة اكثر تحضرا من الى احنا عيشين فيها دلوقتى
وبعدين انا ماقلتش اننا نقفل المعبر تماما انا قلت اننا نسمح للجرحى انهم يتعالجوا ونمدهم بالمعونات والمساعدات اكتر من كدة لا لية مصرى يموت علشان ناس ناكرة للجميل وبتضرب فى بعض مش المنظر دة احنا شفنا لما كان فية هدنة بين اسرائيل والفلسطنين بس المناظر البشعة دى كانت بين فتح وحماس مصر مش هتحارب ولو حربت هتخسر لان الجيش دلوقتى تنطيط وحشيش بس مش تدريبات عسكرية

**mody_halawa** · 31-12-2008 05:36 PM

لا طبعا مفتحش معابر يعنى هما يحلو دم المصريين ويامرو شعبهم ان اى مصرى على الحدود يمنعهم من دخول مصر يبقى عدو ويستحق القتل ويقولو ان الظابط اللى قتلوة مش شهيد ويستحق القتل واحنا نفتحلهم المعابر يدخلو مصر ازاى يعنى