الموضوع: بشرى ساره لكل مالكى نيسان صنى اللى بيشتكو من العربيه بتاكل بنزين كتير

بسم الله
انشاءالله البنزين 80 هو 90 هو 92 هو الـ 95
بس نقف هنا شويه
كله نفس البنزين كبنزين و لكن المخمدات نسبتها تفرق ، البنزين ممكن يشتعل لما حرارته تزيد "طبيعى" و المخمدات هيا اللى بتعلى درجة الإشتعال للبنزين ، يعنى كل ما نسبة المخمدات زادت (رقم الأوكتان) كل ما درجه اشعال البنزين زادت
و طبعا جوه غرفة الإحتراق لما بضغط البنزين درجة حرارته بتزيد (ده عادى حتى لو الموتور موش سخن) يبقى عندى حاجه من الإتنين
1- درجه حرارة البنزين - تزيد------نسبه المخمدات قليله------البنزين ينفجر لوحده قبل ما يوصل للحظه اشعال البوجيه ------------العربيه تسقف (تخيل بقه لو الموتور اصلا ساخن ؟؟؟)
2-درجه حرارة البنزين - تزيد------نسبه المخمدات عاليه------البنزين ينفجر لما يوصل للحظه اشعال البوجيه ------------العربيه زى الفل
العربيه بتسقف "knocking"لأن البنزين بينفجر بدرى لما تكون حركة البستم عكس اتجاه الإنفجار (تخيل ان البستم لسه طالع فوق و البنزين ينفجر و يحاول يرجع البستم لحظيا لتحت
ده ممكن يسبب كسر بذراع البستم و الموتور يقفش و تبقى الدنيا خرابه
علشان كده فى السيارات الحديثه (غالبا الإنجكشن) يوجد ما يسمى بحساس الصفع knocking sensor و ده اللى بيأخر الشراره (الكهرباء) لو حس ان العربيه بدات تسقف
نيجي للبنزين 80 مابيوفرش فى استهلاك البنزين بالمره !!!!! تقوللى ازاى 0 اقولك سواقة حضرتك بتختلف لما بتحط بنزين 80 ما بتقدرش تكبس full throtell لأن العربيه هتسقف معاك لأن حساس الصفع موش هيقدر يعمل حاجه مع البنزين 80 (بيفرقع لوحده)فبالتالى سواقتك هتبقى اهدأ من الول فالبتالى استهلاكك اقل
اما بالنسبه لحكايه ان انت وصلت لسرعة 150 كم/س عادى جدا بس برضه انت ما ضغطتش على العربيه و انت بتحاول توصل للـ 150 (فاهم قصدى)

استخدم بنزين 80 ما فيش مشاكل لكن اهدا باسلوب سواقتك الى اخر حد ( و اعتقد ان ظروف الطريق و الناس ما بتسمحش بكده)+ طوابير البنزين و الذل اللى حكومتنا بتعرضنا ليه فى كل حاجه

اما بالنسبه للشوائب فعادى انا مره بعربيتى القديمه (بولونيز)(متعود من ساعة لما الـ 90 بقى بـ 130قرش احط 92 لأن الموصى لها فى بولندا من 91 الى 98 اوكتان) مونت 92 من بنزينه محترمه دائما بمون منها لاقيت العربيه بتسقف و حسيت اننا ماشى بكشك موش عربيه فى المرة التانيه قولت لمشرف المحطه قالى كل اللى اضمنهولك ان نسبه بخار المياه فى البنزين ماتعديش المسموح و دى وظيفتنا فى المحطه اما الشوائب او خلط نوعين بنزين معا بعض دى مع سواقين التانكات و ضميرهم (شدى حيلك يا بلد)

لو عايز توفر بنزين بجد و تحافظ على موتور عربيتك مون البنزين المحترم من المحطه المحترمه و اتبع التعليمات دى و شوف الفرق
انا هعرض عليكم شوية حاجات كده و شوف نفسك لو انت بتتبعها يبقى فى حاجه فى العربيه ، اما لو كنت غير كده حاول اتباعها و موش هتكلفك حاجه و بعد كده قولنا الفرق ايه
يلا نبتدى
1- لا تقود السياره الا اذا كنت مضطرا لذلك – بمعنى آخر حاول ان تتجنب المشاوير الصغيره اللى ممكن تقضيها على رجليك أو بالعجله J
2- ما تخليش العربيه دايره كتير على السلانسيه – بمعنى لو انت فى اشاره و عارف انها موش هتفتح الا بعد دقيقه او اتنين من الأفضل ان تبطل العربيه و لما تتحرك تدورها تانى (الدوارة كأنها استهلاك لبنزين 10 ثوانى على السلانسيه)
3- لا تتسارع للوصول الى السرعه المطلوبه بشكل سريع و لكن يفضل ببطء علشان تخلى الـRPMبتاع الموتور واطى و انت بتتسارع
4- تأكد من ضبط ضغط هواء الكاوتش ليكون على الضغط الموصى به من قبل المصنع – ضبط ضغط الكاوتش ممكن يقلل لغاية 3% من استهلاك الوقود
5- حاول و انت مسافر على طريق سريع ان لا تتعدى حدود سرعات الطريق (غالبا 100 كم/ساعه) الزياده عن السرعه دى يزود استهلاك بنزين من 7 الى 23% حسب انسيابية السياره و اتجاه الرياح
6- اترك مسافه ليست بالكبيره بينك و بين السياره اللى قدامك (موش كبيره قوى علشان محدش ياخد غرزه من قدامك) علشان متستخدمش الفرامل بقوه و تضيع الوقود اللى انت استهلكته للوصول للسرعه اللى كنت انت عليها قبل ما تفرمل
7- انسيابيه السياره لها عامل كبير فى استهلاك الوقود علشان تحسن انسيابية سيارتك حاول على قد ما تقدر تسوق و انت رافع زجاجك كله و فتحة السقف مغلقه (لما تكون > 60 كم/ساعه)
8- تقليل استخدامك للتكييف يفرق كتير مثلا لو انت سرعتك < 60 كم/ساعه نزل شبابيكك و استمتع بهوا ربنا لو زدت عن كده اقفل و شغل التكييف يكون افضل (ده لو انت مضطر لكده)
9- افحص بصوره دوريه فلتر الهواء و غيره لو احتاج التغيير (فلتر هواء غير نظيف يؤثر على استهلاك الوقود)
10- غير فلتر البنزين حسب تعليمات المصنع لأنه يؤثر على كفائة استهلاك البنزين
11- كل 40 كجم زياده موجوده معاك فى العربيه بتزود استهلاك الوقود 1- 2%
12- المحافظه على سرعتك ثابته يقلل من استهلاكك للبنزين (دى تقريبا زى نقطه رقم 6)