الموضوع: أى سؤال أو استشارة فى طب العيون

المشاركة الأصلية كتبت بواسطة mohabsaeed

السلام عليكم و رحمة الله و بركاته

الف شكر ليك يا د/ شريف على اهتمامك و مساعدتك , اتمنى ان كل الاطباء " و الناس عموما " يكونو على نفس الروح الطيبه .

انا عاوز اخد رأيك فى مشكله عند والدتى :

المشكله ان والدتى كان جالها نزيف فى الشبكيه و راحت كشفت فى مستشفى العيون الدولى فى الدقى و الدكتور هناك قال انها حتحتاج عمليه ليزر فورا للشبكيه و قال انها حتحتاج عمليه تنظيف ؟؟ هى قلقت من موضوع التنضيف ده و راحت عند دكتور تانى اسمه عبد اللطيف صيام و عملها الليزر و النزيف وقف الحمد لله ...الكلام ده من سنه تقريبا , المشكله ان لحد انهارده والدتى بتشوف زى حاجات بتنزل قدامها زى نقط او اشكال , سألت الدكتور تانى قالها ديه نتيجه النزيف و حيروح مع الوقت ..... الكلام ده من اكتر 10 شهور و مع ذلك لسه الموضوع مستمر معاها و لكن على حسب كلامها قل عن الاول كتير . بس هى عندها ميه بيضا على العين ...يمكن ديه برضه تكون مأثره على نظرها ؟
* نسيت اقول ان عندها السكر و سعات الضغط مش منتظم سعات بيرتفع .

انا مش عارف الحاله الى عندها ديه ايه ؟ و هل فعلا هى كانت محتاجه عمليه تانيه بعد الليزر زى ما قال الدكتور فى العيون الدولى ؟

شاكر ليك يا د/ شريف على مبادرتك الجميله " و النادره " فى مساعده الغير
تحياتى ليك

ألف سلامة على الوالدة يا استاذ مهاب

واضح من الوصف اللى حضرتك قلته ان الوالدة عندها السكر من فترة طويلة او انها مش منظمة السكر كويس
و طبعا مش لازم ننسى الضغط العالى اللى بيفلت من حين لآخر

طبعا الأثنين المجرمين دول هما السبب فى النزيف اللى حصل لعين الوالدة

طبعا انا مش قادر احكم كويس لأن المفروض أشوف الوضع ايه و كمية النزيف أد ايه و فين ، و هل على الشبكية ولا فى الجسم الزجاجى و لا الأثنين ؟؟

الليزر بيكون من الحاجات الضرورية فى الحالات دى عادة و لكن مش لازم ننسى ان لابد تكون الوالدة عملت تصوير لقاع العين بصبغة الفلورسين .. لأن ده بيكون زى الخريطة اللى بأمشى عليها و انا باعمل الليزر

نقطة مهمة و هى ان الليزر مش بيوقف النزيف ، ده بيمنع تدهور حالة العين و يحافظ على الحالة كما هى (ان لم تتحسن) بإذن الله

نقطة تانية مهمة ، هى الوالدة عملت كام جلسة ليزر ؟؟

و بعدين ايه حكاية التنظيف دى ؟؟ مافيش حاجة اسمها كده ... الا لو كان يقصد عملية استبدال جسم زجاجى (مع او بدون حقن زيت سيليكون) و دى عملية كبيرة مش صغيرة !!!

وجود النقط او الأشكال قدامها دى اللى بنسميها "الذبابة الطائرة" و دى شوائب فى الجسم الزجاجى (او بقايا نقط نزيف) و هنا سؤال ... ايه اللى يخلى نقط النزيف تقعد 10 شهور ؟؟؟ المفروض الجسم يكون سحبها و امتصها الا لو كان فيه انزفة جديدة (و ده بيحصل لو السكر و / او الضغط مش متنظمين كويس)

وجود المياه البيضاء له بدون شك تأثير على النظر و لكن درجته حسب درجة و مكان النياه البيضاء (فى النواة و لا المحفظة الخلفية للعدسة و لا القشرة ... الخ) ... و لو تقيلة ممكن تعاكس فى تصوير و فحص قاع العين و توصيل الليزر لو احتجنا له

انا عن نفسى اعتقد ان حالة الوالدة هى "اعتلال الشبكية الناتج من مرض السكر" و / او "الضغط المرتفع"

لازم الموضوع يتاخد بجدية اكتر من كده شوية مع متابعة دقيقة

معلش طولت عليك بس الفكرة ان انا اصلا تخصصى "شبكية و جسم زجاجى" ، فأنت جاى فى ملعبى

ألف سلامة على الوالدة و مستنى ردك على و لو تحب افحصها أهلا و سهلا بيها ضيفة عزيزة علينا.

و تحياتى