شكرا يادكتور ..بسس انا لسه معملتش المقاس الجديد بسس مش مستريحه خاالص بالمقاس ده ..
استني اكتر من كده عادي ولا اروح اكشف تاني عند دكتور تاني
عرض للطباعة
أخى العزيز الفاضل أ.د. محمود صلاح
ألف سلامة على حضرتك ، شفاك الله و عافاك و حفظك من كل شر.
لو كان الطبيب اللى فحص حضرتك يقصد ان حضرتك اسمر (Dark Skinned) مثلا و بالتالى فالصبغة pigmentation فى الشبكية اعلى من الأشخاص البيض (whites زى الأمريكان و الأوروبيين مثلا) فللأسف الكلام ده مش صحيح بالنسبة للسكر و مضاعفاته على الشبكية ،:oops1: بل على العكس الأحصائيات بتقول ان الناس السمر (African Americans & Hispanics) بيكونوا معرضين الى حدوث مضاعفات السكر على الشبكية بنسبة 40% - 50% اكتر من البيض .
الكلام اللى بيقوله ده صح بالنسبة لحدوث تحلل مركز الأبصار الشيخى AMD و لكن العكس صحيح بالنسبة لمضاعفات مرض السكر على الشبكية.
عموما حضرتك سيد العارفين ان التنظيم بأذن الله بيحميك من اى مضاعفات للسكر ، مش على الشبكية بس و لكن على الجسم كله ، و ربنا يحفظك
و تحياتى
شكرا جدا يا دكتور علي ردك
كشفت علي عينه بس كشف سريع والدكتور حددلي ميعاد للكشف عن طريق استشاري بس لسه بعد اسبوع من اليوم وقال انه ممن يحتاج تخدير للعين عشان يقدر يكشف عليها (هل ده فيه ضرر)
التشخيص المبدئي: left congenital cataract (مياه بيضاء)
هي عبارة عن نقطة صغيرة جدا في منتصف عينه الشمال والتشخيص المبدئي قال انها علي عدسة العين
هو اتولد 9 شهور ومكنش عنده مشكلة غير الصفرا المرتفعة ولم يدخل الحضانة
معلش عندي شوية اسئلة هصدعك بيها لاني في دبي ومشتت جدا ومش عارف اخد قرار
1- هل الوقت مهم جدا وكده اتاخرت اوي عليه في العملية وهو عنده اربع شهور ونص ولاني سمعت انها لازم تتعمل ساعة الولادة
2- هل بعد العملية هيرجع مركز الابصار عنده يستقبل منها الصورة ولا هيعتبرها عين كسلي
3- هل هيحتاج زرع عدسة
4- ايه التحاليل المطلوبة قبل العملية وتاخد وقت قد ايه لاني في دبي وعايز اعمله العملية في مصر...هل لو دكتور خاص ممكن بعد الكشف بيوم يعمل العملية لابني
5- مين دكتور استشاري رمد اطفال في القاهرة
6- العملية في مصر تتكلف كام
وشكرا جدا لتعب حضرتك
جزاكم الله كل خير
حاجة تانية...هل ممكن تكون حاجة تانية غير الكتاركت تكون حاجة بسيطة وتقل مع الوقت..ولا أنا بحلم ؟اقتباس:
شكرا جدا يا دكتور علي ردك
كشفت علي عينه بس كشف سريع والدكتور حددلي ميعاد للكشف عن طريق استشاري بس لسه بعد اسبوع من اليوم وقال انه ممن يحتاج تخدير للعين عشان يقدر يكشف عليها (هل ده فيه ضرر)
التشخيص المبدئي: Left congenital cataract (مياه بيضاء)
هي عبارة عن نقطة صغيرة جدا في منتصف عينه الشمال والتشخيص المبدئي قال انها علي عدسة العين
هو اتولد 9 شهور ومكنش عنده مشكلة غير الصفرا المرتفعة ولم يدخل الحضانة
معلش عندي شوية اسئلة هصدعك بيها لاني في دبي ومشتت جدا ومش عارف اخد قرار
1- هل الوقت مهم جدا وكده اتاخرت اوي عليه في العملية وهو عنده اربع شهور ونص ولاني سمعت انها لازم تتعمل ساعة الولادة
2- هل بعد العملية هيرجع مركز الابصار عنده يستقبل منها الصورة ولا هيعتبرها عين كسلي
3- هل هيحتاج زرع عدسة
4- ايه التحاليل المطلوبة قبل العملية وتاخد وقت قد ايه لاني في دبي وعايز اعمله العملية في مصر...هل لو دكتور خاص ممكن بعد الكشف بيوم يعمل العملية لابني
5- مين دكتور استشاري رمد اطفال في القاهرة
6- العملية في مصر تتكلف كام
وشكرا جدا لتعب حضرتك
جزاكم الله كل خير
معلش متقل عليك بس أنا لسه مش عارف أوصل للاستشاري عشان يكشف عليه والرد علي السؤال ده هيخليني أسافر علي طول بدون استشارة هنا
انا عرفت ان المغربي عندهم رمد أطفال...هل هم عندهم أحدث اجهزة لهذه العملية...ولا فيه مكان تاني؟
السلام عليكم العمر تسعة عشر مصاب بطول في النضر بدرجه عاليه وارتدي النضاره منذ ان كان عمري تسع سنوات وانا الان مصاب بتركيز كامل النضر تقريبا في العين اليمنى مع وبدون ارتداء النضاره لان العين اليمنى اقل ضعفا من العين اليسرى مع العلم اني فحصت النضر اكثر من مره وليس لدي اي مشكلة اخرى بالعين وهذه المشكلة ليست وراثيه ولا احد من اقاربي يعاني منها هل هذا طبيعي ام لا وما السبب وما الحل وهل هذه المشكلة منتشره ام نادره
كان الله فى عونك ، الواحد لما بيعرف ان فى حاجة فى الأولاد بيبقى هايتجنن ، بس ان شاء الله خير.
المياه البيضاء الخلقية لها اسباب عديدة و الحضّانة مش السبب الوحيد لها.
و اسمحى لى أرد على اسئلتك بالترتيب:
1) الوقت مهم جدا و لكن مش لازم ساعة الولادة ، أصلا مركز الأبصار فى العين بيتكون من الشهر الرابع للسادس و بيحتاج لصورة سليمة لتنبيهه و تنبيه مركز الأبصار بالمخ ، و بالتالى التوقيت دلوقت مازال ممكن ، بس بلاش نقعد نأجل ، الحكاية (لو مياه بيضاء) مش طوارئ و لكن خير البر عاجله.
2) مادام مقاس العدسة اللى هاتنزرع جوه العين سليم و بالتالى الصورة اللى واصلة لمركز الأبصار سليمة فالصورة توصل سليمة للمخ و مايبقاش فيه كسل (ان شاء الله).
3) طبعا لازم نزرع عدسة.
4) مطلوب صورة دم كاملة و فحص من طبيب أطفال يؤكد امكانية التخدير العمومى ، و ممكن لو أى طبيب خاص فحصه يعمل له العملية تانى يوم لو التحاليل و الفحوصات جاهزة و سليمة و فيه ميعاد فاضى لغرفة العمليات فى المستشفى المطلوبة.
5) فيه كتير ... ماتقلقش.
6) التكلفة متفاوتة بشكل كبير و ده حسب الجراح و أتعابه و المستشفى و تكاليفها.
7) لو حاجة غير الكتاراكت غالبا هاتكون مشكلة أكبر ، و مافيش حاجة من دول (حتى الكتاراكت طبعا) بتقل مع الوقت ، فيه حاجات بتزيد و حاجات ثابتة. و لكن لابد من التدخل السريع.
8) المغربى زيهم زى أى مستشفى تانية ممكن العملية تتعمل عندهم ، العامل الأساسى هو الطبيب و ليس الأجهزة فى العملية دى ، لأن الأجهزة تطورت من زمان فى عملية المياه البيضاء و الفروقات دلوقت بين الأجهزة بقت شبه معدومة ، فماتفرقش كتير حكاية أحدث الأجهزة ، المهم جراح العيون اللى هايعملها.
و ربنا معاك و يتم شفاء ابنك على خير.
و تحياتى.
شكرا جزيلا يا دكتور شريف ... ربنا يباركلك في اولادك ويبعد عنك وعنهم كل شر
بجد طمنتني جدا وانا ان شاء الله خلاص مسافر عشان اكشف عليه في مصر واعمله العملية باذن الله
السلام عليكم
ازيك يا دكتور شريف
معلهش عندي سؤال غريب شويتين ...
..
انا عيني اليمين بترف بقالها اكتر من شهرين
الجفن العلوي بيرف كل شوية
هل ده له علاقة بطب العيون ؟؟؟
ولا زي جدتي الله يرحمها ما كانت بتقول .... ان لما عيني ترف يبقى في حاجة مش كويسة ح تحصل ؟؟؟؟:grin54:
المشكلة انها مش يومين وخلاص
انا بقالي اكتر من شهرين حاسس ان جفني اليمين العلوي مشغل فايبريشن
يا ترى ده له تفسير طبي وله علاج ؟؟؟؟؟
شكرا لمجهودك واهتمامك
أهلا وسهلا بيك
سؤالك مش غريب ولا حاجة ، دى معروفة عندنا باسم Lid twitches و سببها ان العصب اللى رايح لعضلة الجفن نشيط زيادة عن اللزوم و بالتالى مش بيستنى الأشارة العصبية علشان ينقلها ، لأ ده بيضرب اشارات لوحده ، و بالتالى الجفن عمال يلعب.
فيه مجموعة مسببات شهيرة بتعمل كده ، شوف ايه منها بتستعمله و امنعه لو تقدر ، او قلله لو مش قادر تمنعه:
* الشاي.
* القهوة.
* النسكافيه.
* السجائر (و ما ننساش التدخين السلبي ، كل 4 سجائر الواحد بشمهم يبقى كأنه شرب سيجارة).
* الكاكاو.
* الشكولاتة.
* المشروبات الغازية السوداء (اللى فيها مادة الكولا).
* الشد العصبي.
و تجنب تماما اى ادوية فيها فيتامين ب Vitamin B لأنه بينشط الأعصاب ، و الحكاية مش ناقصة (غلطة شائعة عند اطباء العيون المبتدئين انهم يكتبوا فيتامين ب للعيان فى الحالة دى و الوضع بيصبح اسوأ).
راجع القائمة السابقة و امنع منها اللى تكون بتستعمله ، او تجنب الشد العصبي و القلق.
و تحياتى
اولا الف شكر ليك يا دكتور على المبادرة وربنا يجازيك عنها خير ان شاء الله.
انا عندى سؤال وممكن يكون اتسأل قبل كدة بس الموضوع كبير جدا ماشاءالله ...
انا سنى 30 سنة ومن فترة كبيرة حوالى سنة ابتديت احس باجهاد فى عينى عند التركيز وحاجات تانية زى الاتى:
- اثناء الليل كل الاضواء على بعد 6 متر او اكثر بتيان كانها نجمة (بمعنى ان اى لمبة او فانوس عربية امامى مش بشوفة عادى لا .. بيكون فى خطوط على شكل نجمة خارجة منة).
- الارقام والحروف البعيدة المضيئة (زى ارقام قنوات الريسيفر وشريط الاخبار) مش بقدر اقراهم من اول مرة لازم تركيز وكمان بيكونوا ليهم خيال (زى طباعة الكتب السيئة لما الكلمة بتكون لونين مش متطابقين) وبيترعشوا.
- الارقام والحروف فى اللوحات الخشبية وغيرها من بعيد (يعنى الجهة المقابلة من الشارع) فى عز الضهر مش باينة 100% وبقراها بصعوبة.
- كتير جدا لو جعان او مكلتش من الصبح مثلا (ودة بيحصل كتير) على العصر كدة بلاقى هالات سوداء كدة بتيجى يمين وشمال عينى وبتختفى مع التغميض وبيجى غيرها.
وحاجات تانية كتر مش فاكرها دلوقتى. انا سؤالى بقى دة اية؟ واعمل اية؟ وهل فى علاج ولا لازم نضارة؟
اسف على التطويل بس العشم بقى :)