لو بتلبس نظارة يبقى تتلبس على طول ، لو فوق الخمسين ممكن تحتاج واحدة بنسميها Mid-range علشان توضح الكومبيوتر ، غير كده مافيش نظارة كومبيوتر بس.
و تحياتى
عرض للطباعة
الجيش بيطلع من 4.00- لكل عين ، ما ينفعش تبقى عين 4.00- و التانية 0.50- مثلا و يطلع ، و الاستيجماتيزم لازم فوق 3.00- لكل عين ، غير كده تقدم تظلم لجنة طبية عليا بس مش مضمون .. حسب الطبيب اللى هايفحصك و يشوف النظر الاجمالى اخباره ايه.
و تحياتى
بعد اذنك يادكتور انا بلبس نضاره من حوالى عشرين سنه وزهقت اوى منها وخايف من موضوع الليزك ده وبفكر البس عدسات بس خايف من الجو الجميل بتاعنا والحساسيه وكده انا مقاسات النضاره اللى لابسها كالتالى
-2.25, -0.5 , 40 العين اليمنى
-2.0 ,-0.5 , 145 العين اليسرى
هل فى مشكله فى لبس العدسات ولا لأ وايه انسب نوع ممكن يكون بيقعد مش اقل من 12 ساعه بدون عمل مشاكل مع عمل على كمبيوتر خلال هذه الفتره وهل مطلوب اروح اعمل كشف جديد قبل شراء العدسات ولا كفايه الكشف اللى معايا من سنه تقريبا .
طبعا الليزك له محاذيره ، اعرف اللى ليك و اللى عليك قبل ما تفكر اصلا فيه و بعدين خد قرارك بعد ما تكون درسته كويس...
بالنسبة للعدسات فمعاك حق ان جونا الجميل ممكن يعمل شوية قلق معاها ، بس عموما لو اتعاملت مع العدسات على انها "مكمل" للنظارة و ليست "بديل" للنظارة فاعتقد ان الأمور ممكن تمشى كويس معاك ، التزم بوقت يومى للعدسات ما تتعداهوش (بيتحدد حسب النوع) ، التزم بالعناية الفائقة بالعدسة كما يجب على اكمل وجه ، ممنوع الكسل او الاستهتار فى العناية بالعدسة (علشان كده البنات انجح من الولاد فى لبس العدسات لأن عندهم صبر على العناية بيها بعكس الولاد بيزهقوا بسرعة).
حكاية مش اقل من 12 ساعة مش لطيفة للعدسات ... امال هاتقلعها و تلبس النظارة علشان العين ترتاح من العدسة امتى ؟؟ عموما فيه لحد 18 ساعة ، بس انا مش بافضل كده.
مافيش مشكلة من الكومبيوتر (و اجهزة التكييف (مسببات جفاف العين)) لأن فيه عدسات بتقاوم الجفاف دلوقت (ليها محتوى مائى ثابت بقوة و بالتالى ما بتاخدش من دموع العين الا اقل القليل ، فمش بتحس بجفاف زى ما بيحصل مع العدسات التقليدية).
الكشف بقى له سنة و انت مرتاح فيه و شايف كويس من غير مشاكل يبقى مافيش مشكلة ، ممكن تعمل العدسات عليه ، لو حاسس معاه بعدم راحة او مش شايف بيه كويس يبقى اعمل مقاس جديد احسن.
و عموما مقاس العدسات عندك المفروض يكون (حسب الكشف المكتوب) :
العين اليمين 2.50-
العين الشمال 2.25-
و تحياتى
السلام عليكم ورحمة الله
بارك الله لك يا دكتور
سؤالى
انا عندى 21 سنة ولابس نضارة من 7 سنين والمقاس متغيرش الحمد لله (كل عين ناقصه ربع بس من غير النضارة المسافات بتبقى صعبة ومرة خبطت - بدون نضارة طبعا - وانا بركن كنت فاكر المسافة كبيرة وطلعت صغيرة).
دلوقتى بقالى حوالى سنة بيحصلى حاجة على فترات متباعدة الا وهى ان اصحى من النوم شايف كل حاجة بعيدة اتنين والحجات القريبة الموبايل مثلا مببقاش شايف الحروف (اكنى عامل كشف قاع عين والمحلول لسه تأثيره موجود) وكلما زات مسافة الحاجة الى ببص عليها كل ما عينى بتوجعنى وفى الاخر بيجيلى صداع - ومهما دعكت فى عينى مفيش تأثير غير انى لازم انام - وكل ما فترة النوم تزيد كل ما الحالة بتتحسن.
حصلتلى الحالة دى امبارح وكانت اكتر مرة شايف فيها الحاجات 3 مش 2 وللأسف كنت لازم انزل اسوق
كانت العربية الى ادامى مقدرش اشوف النمرة بتاعته وكالعادة بعد 15 دقيقة جالى صداع وعينى حاسس فيها بالإجهاد الشديد
رجعت نمت 3 ساعات صحيت كأن مكنش فى حاجة وكل شىء طبيعى.
وآخر مرة قبل امبارح كانت من فترة طويلة حوالى 9 شهور على أقل تقدير.
كنت سألت دكتور الباطنة اثناء كشف دورى قالى اعمل ct على المخ بس معملتش.
أسف لو كنت طولت على حضرتك
جزاك الله خير :satelite:
السلام عليكم ورحمه الله وبركاتة
عندى رمد حبيبى اية علاجه
وهل مدة العلاج بتطول
منتظر رد حضرتك