ما هو الروديه؟

**samirayad** · 01-09-2009 11:22 PM

فى الحقيقه كنت بأتكلم مع زميل حالا فى مشكلة روديه وشنبر
ولقيت الثلاث صور دول لأيضاح حالة غرف الحريق وقت قلب رأس السلندر من تحت
لتعريف الزملاء على شكل الرأس قبل وبعد عملية الروديه كالآتى

1- شكل أحد فتحات البلوف فى رأس السلندر الأربعه قبل عمل الروديه كالآتى

2- شكل الفتحه بتاعة البلف بعد الروديه وباين الخط اللى بيلمع على دايرة فتحة البلف على الرأس من تحت بعد عملية الروديه كالآتى

3- شكل فتحه كامل وفوقها أحد الصبابات ( حرف الصباب بيلمع وكذلك داير الفتحات على فتحة الرأس ) بعد أن تمت عملية الروديه كالآتى

حبيت أجيب الموضوع ....علشان أضيف الثلاث صور دول ليه
طبعا الجزء اللى فى الرأس ده هو ( قاعدة الصباب ) وبتتركب فى المخرطه بالشحط
دا لو كنا محتاجين تغيير قواعد الصبابات
شكرا

**michohat** · 01-09-2009 11:56 PM

موضوع رائع ومجهود عظيم

**samirayad** · 02-09-2009 09:56 PM

الله يخليك يا أستاذ : مجدى

**tabeb** · 13-02-2010 11:55 AM

المنتدي فعلا فيه كنوز مستخبية
موضوع رائع
ليا استفسارين لو سمحتم
1-هل الرودية بتتعمل في حالة تغيير الصبابات باخري جديدة؟
2-ازاي بيتم التاكد ان فتحة الصباب مش بتوسع علي مكان غرفة الحريق؟
3-يعني ايه
بورانج-دلايات-فريزه؟

**omar91119** · 13-02-2010 01:45 PM

طيب يارجاله الحاجه دى غير توفير البنزين وكمان التطبيع هل ليها اى فايده تانيه

**samirayad** · 13-02-2010 02:59 PM

1-هل الرودية بتتعمل في حالة تغيير الصبابات باخري جديدة؟

نعم

2-ازاي بيتم التاكد ان فتحة الصباب مش بتوسع علي مكان غرفة الحريق؟

لو قلبت رأس السلندر من تحت وبصيت على قاعدة الصباب من تحت
ولقيت الداير بتاعه منور
يبقى الصباب ده بايظ وعاوز يتغير
وعموما بتلاقى سمك قاعدة الصباب بأه لحميته ضعيفه
وساقط جوه قاعدته على رأس السلندر

3-يعني ايه
بورانج-دلايات-فريزه؟

نيجىء بأه لشغل مهندسين ( ميكانيكا أنتاج )

وهقولك على قدر ما أستطيع لأننى ( ميكانيكا باور )

- البورنج ...
.يعنى الضبط لمحور أى عمود دوار على مكان تثبيته بالبلوك

بوضع البلوك تحت ماكينة البورنج ( شبه مخرطه صغيره )

لضبط قطر مكان وضع السبائك على البلوك

( يلاحظ أن هذا بيتم وغطيان الكراسى راكبه بدون سبايك ومربوطه صح )

لضبط قطر مكان تركيب السبايك

نفس الوضع بيتعمل لسبايك عمود الكامه أو لجلب الكامه ( حسب طراز المحرك وتصميمه )

- الدلايات ....

مفيش حاجه أسمها دلايات

وأعتقد أنك تقصد
الدلايل .....بس خانك التعبير ( عن لفظ سمعته من الميكانيكى أو الخراط )

والدلايل بمعنى مبسط تشبه مواسير صغيره وقصيره
وتركب بالشحط على اماكن معينه برأس السلندر
بغرض تحديد حركة الصبابات التردديه داخل الرأس وعدم تلف الرأس

مع ملاحظة أنه يتم تركيب سيلات الصبابات ( كاوتش الصباب )
على أعلى الدلايل من أعلى لأحكام قطع الزيت المتواجد فى منطقة التاكيهات ومنعه من النزول الى غرف الحريق مع حركه الصبابات التردديه أثناء دورات الحريق

- الفريزه
آله ميكانيكيه فى ورش الأنتاج لعمل مجارى بأشكال معينه داخل المعادن
لأغراض معينه
ودى بنستخدمها مع المحركات لتفريز أمكان لقواعد الصبابات
عندما نريد تغييرها بعد قشط الوش مثلا على المخرطه

شوفت النجار وهو بيستخدم الأزمير لعمل أشكال هندسيه على خشب الموبيليا

هى دى نفس فكرة عملية التفريز بأستخدام الفريزه

**samirayad** · 13-02-2010 03:34 PM

المشاركة الأصلية كتبت بواسطة omar91119

طيب يارجاله الحاجه دى غير توفير البنزين وكمان التطبيع هل ليها اى فايده تانيه

الهدف من عملية الروديه
ليس فقط توفير البنزين

ولكن لعدم حدوث فقد فى كبس غرف الحريق ( أثناء الأشواط المختلفه للمحرك )

لعدم حدوث تفويت من خلال الصبابات لأعلى

وبالتالى نقصان قدرة المكنه

**فادى محمد** · 14-02-2010 04:15 PM

السلام عليكم ورحمه الله ..واحشني مداخلتك ياا سمير .اسمحلي اسال انا ماسالتكش من زمان..
هل لو في صباب واحد معلق او مابيقفلش كويس ممكن يخلي العربيه تتلت بسيط كده علي السلانسيه والبستم داخله كهربا والبوجيه سليم ؟ ولو ده ممكن يبقي صباب تغذيه ولا عادم؟ وفي اضافات بتتحط ع البنزين لتنظيف الصبابات ايه راي حضرتك فيها ؟ ومشكور دائما ياباشمهندس .

**samirayad** · 14-02-2010 06:46 PM

السلام عليكم ورحمه الله ..واحشني مداخلتك ياا سمير .اسمحلي اسال انا ماسالتكش من زمان..

وعليكم السلام ورحمة الله وبركاته

ياباشا دا أنت تأمر ....مش أسمحلك

وعلى قدر أستطاعتى برضه

لأنك بتسأل فى نقطه حساسه للغايه فعلا

هل لو في صباب واحد معلق او مابيقفلش كويس ممكن يخلي العربيه تتلت بسيط كده علي السلانسيه والبستم داخله كهربا والبوجيه سليم ؟

نعم وجود هذه الحاله
حيعمل معاك أضطراب فى توزيع القدره الناتجه عن حريق الغرف الاربعه على عمود الكرنك

وسيشعر حينها مالك السياره بمايشبه تتليته خفيفه فعلا

ولو ده ممكن يبقي صباب تغذيه ولا عادم؟

صباب حر أو دخول أو سحب أو تغذيه ( كما تحب أن تسميه )

وفي اضافات بتتحط ع البنزين لتنظيف الصبابات ايه راي حضرتك فيها ؟

أنا مجربتهاش ....بس قريت عنها فعلا بصوره شبيهه لوصفك

دا حتى أنا قريت برضه
أن جودة البنزين وعادات القياده ليها دور فى حدوث تكوين ملوثات على صبابات السحب
تعملك مشاكل مثل الوارده فى حوارنا الحالى

عموما

جرب الأضافات دى

وأقرأ ماهو على العبوه من تعليمات من أجل الأطمئنان أولا قبل التجربه