الموضوع: هل تطلب تعاون شركة مصرية مع شركات التأمين على السيارات؟

المشاركة الأصلية كتبت بواسطة مصراوي جدا

باذن الله اوصل اقتراحك يا باشمهندس أحمد لادارة الشركة واشوف امكانية الموضوع ده

جزاك الله خير يابشمهندس طارق، بجد لو إتنفذ الموضوع داه هيبقى كدا شركة مصرية بتحرص على الحفاظ على أداء وجودة سيارات ميتسوبيشى بإن تكون كل الصيانات داخل التوكيل. وكذلك زيادة مكاسب التوكيل وذلك بعمل التصليحات اللازمة لسيارات الحوادث بداخل التوكيل.

شكرا يافندم

المشاركة الأصلية كتبت بواسطة مصراوي جدا

انا اتكلمت امبارح مع مدير عام الصيانة في الشركة وسألته على الموضوع ده وانه لو اتعمل هيكون خدمة كويسة للعملاء.


قال لي اننا كنا بالفعل بنعمله من عدة سنوات وبعدين حصلت مشاكل كتير مع شركات التأمين وتأخير في السداد وموظفين من عندنا يروحوا لشركات التأمين عدة مرات لتحصيل شيكات متأخرة وفي الآخر بعد هذا العذاب المتكرر تم اتخاذ قرار بوقف هذا التعامل وان العلاقة تكون مع العميل وليس شركة التأمين


رأيي الشخصي : واضح ان فيه شركات تأمين تعاملها ممتاز وبتدفع علطول قيمة الفاتورة ومش بتتأخر في السداد ودي غالبا بيكون قسطها اعلى
وفيه شركات تأمين بتتأخر وتتعب الناس في السداد (وان كان السداد بيحصل بيحصل بس بعد كام شهر) ودي قسطها اقل وطبعا الجمعية على رأسهم وكون قسطها اقل فده سبب الاقبال الرهيب عليها (انا باتكلم عن الفترة الماضية قبل مشاكلها الأخيرة لكن مش عارف دلوقتي وضعهم ايه هل رجعوا يأمنوا من جديد تاني ولا بيقفلوا القديم بس و لا ايه الموقف).

الخلاصة ان من الصعب اعادة التعامل المباشر ماليا مرة اخرى مع شركات التأمين

أولا يافندم أحب أشكر حضرتك جدا جدا على الإهتمام والسؤال عن الموضوع.

بالنسبة لموضوع التأمين، يبقى توكيل ميتسوبيشى موتورز فى مصر (شركة مصرية) كدا بيهتم براحتة فقط مش براحة العملاء طالما فى توكيلات كتيرة بتعمل موضوع التأمين داه وأكيد بيواجهوا نفس المشاكل اللى كانت بتقابلكم زمان، ولكن ملغوش التعاون مع التأمين حفاظا على راحة عملائهم.

أعتقد كدا التوكيل متفرقش معاه راحة العملاء من عدمها وكذلك الحفاظ على السيارات الميتسوبيشى فى مصر اللى ببتعمل فى ورش سيئة جدا لمجرد إنها هتوفر على مالك السيارة دفع تكاليف التصليح.


طيب على الأقل التوكيل يتعامل مع شركات التأمين المحترمة فقط (بعيدا عن الجمعية)، يعنى يحسسنا إنه بيهتم براحة العملاء وبيخافوا على عربياتهم.


داه فى الأول وفى الأخر منفعة للطرفين:

أولا العميل: من ناحية ضمان صيانة العربية كما ينبغي.

ثانيا شركة مصرية: من ناحية الأرباح والمكاسب لأن لو موضوع شركات التأمين داه إتعمل مفيش حد هيضطر يعمل عربيتة برة فى ورش وبالتالى التوكيل هيكون عندة شغل كتيير جدا ( هوا بالفعل فى ضغط عليه) ولكن البحر بيحب الزيادة صح ولا غلط؟

ملحوطة:

أنا أكن كل تقدير وإحترام لحضرتك يابشمهندس طارق وربنا عالم، وداه مش هجوم على حضرتك أو على شركة مصرية بس أنا فعلا متضايق جدا جدا بسبب إن التوكيل مش بيهتم بالعميل زي باقى التوكيلات فى مصر.
والله والله والله أنا قبل ما أجيب عربيتى ناس كتير جدا جدا حذرونى إني أجيب عربية لانسر بسبب إن التوكيل سىء كخدمة للعملاء والراحة. وداه ميمنعش إن فى مهندسيين وفنيين كتير فى المركز الرئيسى محترمين جدا جدا بس برضوا مفيش راحة هناك خالص واليوم اللى بعمل فيه صيانة لعربيتى مع إنى بكون حاجز بيضيع اليوم كاملا فى التوكيل + إنى بستلم العربية البيبان من جوة الودركسيون كلهم شحم وإشتكيت للمهندس أحمد مدير المركز قبل كدا.

شكرا يافندم على وقتك.