مرايات الميرا الأصلي وسؤال عن السرعات واسئلة اخري

**wael_dev** · 25-01-2009 04:00 PM

سلام عليكم

انا كنت اخدت قائمة بمحلات الدايهاتسو ورحت اشتريت من اوشين الحرفيين مرايا شمال للميرا موديل 94 كان ثمنها 45 جنيه طبعآل لقيتها مش اصلية بسألة عن الأصلية قالي مفيش وهوا ده الموجود للأسف والأصلية تعملها 250 جنيه اذا لقيتها !!

المهم اخد مني 10 جنيه تركيب و10 جنيه لحام للقاعدة بتاعتها الأصلية بحجة انها الأصلية وخسارة اركب القاعدة بتاعة المراية اللي اشتريتها والي اخره وركبتها وتمام

بعد يوم بالظبط الهوا زقها اتقفلت !!! ومن ساعتها بقت عاملة زي الريشة طبعآ بقيت اقفلها وبعد كام يوم اتفكت تمامآ واعلنت نهايتها

السؤال بقي بيقول علل لو انا عاوز اجيب مرايا اصلية للميرا لازم من التوكيل وياتري ب 250 جنيه فعلآ انا قولت استفسر لأن مشوار التوكيل في العبور هوا مش بعيد عني لأني ساكن في عين شمس ممكن اخد الدائري بس برضة هيحتاج يوم

فيه حاجة تانية نفسي افهمها لأني قليل الخبرة العربية اتقالي انها خمسة غيار ومع ذلك انا مش شايف غير 4 سرعات فهل ده معناه ان الغيار الخامس بتاع الرجوع للخلف ولا هيا فيها سرعة خمسة وانا مش عارف اجيبها علمآ بأني حاولت اجيب الفتيس لقدام يمين مجاش معايا ودي اخر حركة فيه !

حاجة تانية برضة هوا صحيح علبة الدركسيون مش موجودة خالص ولا موجودة واذا موجودة محدش يعرف سعرها كام تقريبآ

وبالنسبة لفلتر الزيت لما اجي اشتري فلتر زيت ليها لازم يكون بتاع دايهاتسو ميرا ولا اتصرف ازاي ؟

وجزاكم الله كل خير وانا لو كده هروح التوكيل ان شاء الله اجيب المرايا دي لما اسمع ردودكم عنها الأول في نفس الوقت تبقي فرصة لأي حد عاوز يسأل علي اي اسعار اي حاجة هناك بالمرة مشوار واحد يكتب بس سؤاله هنا

وشكرآ

**أبو عبدالله** · 25-01-2009 08:56 PM

أولا أهلا بك في المنتدى
ثانيا بخصوص اسألت حضرتك

1- المراية دي ممكن تلاقي منها اصلي استيراد في الحرفيين
2- المراية الأصلية لو عاوزها جديده من التوكيل ممكن تطلب فرع العبور وتسأل مخزن قطع الغيار وهو يقولك على سعرها ان شاء الله
3- الخمسة غيار بيبقى فعلا منهم النقلة الخلفية وبالتالي فكده تبقى العربيه اربع سرعات امامية وواحده خلفيه فعلا
4- علبة الدركسيون هتسال برضه عليها استيراد او التوكيل وشوف سعرها كام برضه
5- الفلتر هتلاقيه عن المحلات اللي حضرتك طلبتها من قبل أكيد

واي استفسار اخر انا موجود ان شاء الله

**wael_dev** · 27-01-2009 10:03 AM

الف شكر يابو عبدالله علي المعلومات بس يعني ايه استيراد في الحرفيين ؟ تقصد مستعملة بس مستوردة مثلآ زي المواتير كده ؟

**أبو عبدالله** · 27-01-2009 11:47 AM

ايوه كده بالظبط

**shaltot** · 27-01-2009 04:26 PM

أخي الكريم
انا شفت المرايا موجودة أصلي في محل دايهاتسو لاند في الحرفيين وده رقم التليفون علشان لو حبيت تسأل عن سعرها مع الشكر
26973390 \ 0122329489
على فكرة الميرا لها فتيس خمسة نقلات امامية

**wael_dev** · 29-01-2009 11:33 AM

انا بشكرك جدآ جدآ بأذن الله بكرة الجمعة هروحلهم واشتريها

بالنسبة للمعلومة التانية يعني ايه ليها فتيس خمس نقلات يعني هيا ممكن يتركبلها فتيس تجيب خمس سرعات ولا فيه حاجة معينة بتتظبط فيها مش فاهم الجزئية دي

وشكرآ علي ردك