أنا مقاطع لشراء الجديد على الأقل حتى 2010 و ...أخي الكريم .. أ/ سمير
طبع أتفق مع حضرتك في كل كلمة قولتها و أتفق معك أن هؤلاء ليسوا بتجار من أصله بل هم مجموعة من المغامرين لا ليهم في التجارة و لا في السيارات من أساسه و أنما مثل كل شئ في بلدنا عندما ينجح تجد الكل بيعمل زيه
نت كافيه فتح في شارع و نجح تجد كل المحلات اللي في نفس الشارع قلبت نت كافيه , كوفي شوب فتح في عباس العقاد و نجح تجد مدينة نصر بقت كلها كوفي شوبس , شوية و أيجار السيارات يمشي تجد مصر الجديدة بقت كلها مكاتب أيجار سيارات و السيارات واقفة أمامها مرطرطة و مش لاقية اللي يركبها
نفس الحكاية في معارض السيارات و لهم حق لأنهم وجدوا منذ فترة الزبون السهل (بلاش نقول الأهبل) اللي معاه فلوس مش عارف يوديها فين و عايز يتمنظر بيها أمام الناس فيعمل أيه يجيب عربية و أثنين و ثلاثة من أحدث الموديلات و يكع أقساط و مش مهم يأكل بغد كده عيش و جبنة المهم يمشي في الشارع بعربية جديدة موديل السنة و أحسن من عربية جاره لأ و كمان المدام لازمها عربية أخر موديل بها كل الكماليات و ياحبذا لو كانت ماتريكس علشان تروح بيها السوق و تجيب فيها الخضار و تتمنظر بيها أمام صديقاتها بالنادي
من هنا وجد كل من هب و دب و اللي له أو مالوهش فرصة يفتح أن شاء الله كشك صغير يجيب فيه عربية و لا أثنين و يزود في ثمنهم 2000 و 3000 جنيه عن سعر الوكيل و حتة أعلان صغير في الجورنال بتاع يوم الجمعة فيه شوية كلام ضحك علي الدقون و كام رقم موبايل و شوية و تلاقي الزباين ( قصدي ....... ) صدقوا و أتصلوا و حجزوا عربيات مش موجودة عنده أصلا و يروحوا يعملوا الاوراق و تيجي موافقة البنك علي القرض و ساعتها تعالي بقي أستلم العربية ..... أوبس دي مش موجودة أصلها لسه متباعة .... ياه لو جيت من عشر دقايق بس كنت سلمتهالك أستني بس يومين كده لحد ما أجيبهالك ... و بعد أسبوع تلاقي نفسك جايب عربية غير اللي كانت في دماغك و لون أنت مش عايزه لأنك مستخسر ترجع القرض للبنك من غير ماتجيب العربية
أما صاحبنا بتاع الكشك فتاقيه بقي عمل الحركة دي مع 30 واحد و بقي فجأة عنده معرض كبير و برضه هايفضل يمارس نفس اللعبة مع الزباين لأن ده اللي هو أتعلمه فهلوة مش تجارة
مش هو ده اللي بيحصل ؟ صدقوني ده اللي حصل معايا و مع غيري من السذج اللي ماكانوش فاهمين سوق السيارات و لما فهموا بعد ما أشتروا ضربوا نفسهم 100 جزمة قديمة
علشان كده الفهلوية اللي بيبيعوا العربيات دول و بيتكلموا عن عدم أنخفاض الاسعار و متمسكين بالمكسب مش فاهمين حاجة لأنهم لايعرفون أصول التجارة و نطوا علي السوق و أخذوا مكان التجار اللي بحق و حقيق بعد ما ماتوا بحسرتهم من اللي شافوه علي أيد التجار الفهلوية الجددز
أسف للأطالة و لكن كنت معبي و شايل من أمثال هذا التاجر الفهلوي اللي بيبيع الهوا و الوهم للناس
خليها تصدي ... وموديلها يعدي
المفضلات