موضوع كوميدى خلانى اندم شوية بعد تجربة ميرسيدس

**Sout_Sout** · 31-01-2009 02:58 AM

يا جماعة زى ما البعض عارف انا معايا جين 2 و فورد فوكاس
واحد صاحب بابايا معاه E280 Aventegrade
كان عندنا وكده وانا نزلت اعمل حاجة تحت البيت لقيت السواق راكب فيها
السواق ده كنت انا عارفه من زمان
اتمحكت فيه وقلتله عايز اجربها
قالى ماشى
بس برضه رحت قلت لصاحب بابايا انى هجربها
ركبت
طبعاً انا متابع صورها من زمان
فلما ركبتها "طبعاً مووهوم برضه" حاسس انى عارف فيها كل حاجة
ظبط الدريكسيون والكرسى والمرايات واستعديت للإنطلاق
وحطيت اغنيه حلوه وقلت بسم الله
فى الأول مش كنت عارف اتحكم فيها "علشان اول مرة"
طبعاً السواق عمال يترسم عليا بيها ويقولى مش بتعرف تجرى بيها كويس
قلتله بلاااااااااااش علشان الراجل صاحبها مايحبسناش
قالى ماتخافش
رحت فى شارع فاضى وضغط على زرار C/S وحولت نظام النقلات إلى S
ووقفت وضغط مررة واحدة على كل الدواسة "مع الضغط على دواسة الكيك داون"
انا اتخطفت واتخضيت ودمى نشف
لدرجة السواق قالى فى ايه
طبعاً العداد مش بيتحرك
دى بتطيررررررررررررررررررررر رررررررررر من كتر السرعة والموتور صوته عجييييييييييب
العربية يا جماعة تحفففففففففففة بمعنى الكلمة
بتجرى بطريقة غريبة ماكنتش اتوقعها
يا جماعة دى قادرة انها تغلب الفيرنا المانيوال 1600 فى طلعتها "الفيرنا عليها تسارع وهمى برضه"
العداد فى مسافة كنت بالجين 2 باجيب 90 بالميرسيدس جبت فيها 150
مش فاهم فى ايه
طبعاً انا عارف الفرق الشاسع بين الاتنين
بس بصراحة ماتخيلتش فرق القوه أبداً يكون بالقوة دى
طبعاً مش هتكلم على نظام الـ DVD
ولا تدوير العربيه من الفيتيس
ولا الزينون
ولا السينسورات المحيطة بكامل العربية
ولا الضوء الذكى
ولا نظام المرايات الذكى
ولا النظام الصوتى
ولا الفرامل
ولا الثبات
يا جماعة بجد العربية تستاهل ال 748 الف
انا اساساً عربيتى فى التوكيل بتتصلح
مانفسيش اجيبها ونفسى اموت وانا اخر عربيه سقتها هى الـ E280 Aventegrade

**Ayman_52** · 31-01-2009 03:09 AM

ياعم ربنا يديك طولة العمر...وتجيبها ان شاء الله...

وزى مانت قولت مافيش مقارنه بين الاتنين...

ألاصحيح هو السواق تعرفه معرفه كويسه يعنى

>>اصلى كنت عاوز اخد لفه انا كمان

ان شاء الله الجين2 بتاعتك تتضبط وترجع زى الفل ان شاء الله...

**Sout_Sout** · 31-01-2009 03:11 AM

ميرسى يا عم أيمن
بس مش أنصحك بكده
لأنك ممكن ساعتها تنزل منها تركب الجين وتلبسها فى عمود
:d:d:d:d:d:d:d:d:d

**M.Nabil** · 31-01-2009 04:07 AM

انا لو مكانك مكنتش فكرت اجربها علشان العقد وعلشان متكرهش الجين تو.

**aapaap855** · 31-01-2009 10:47 AM

يا سيدي سهلة
بنكين تلاتة من البنوك الجامدة
بعد ميقفل بساعة
اتوكل على الله وخش اسرقلك كام مليون وهات خمسة من العربية دي
بس خلي بالك لما هتركبها وتبقى بتاعتك هتشوف العربيات الي اعلى منها وهتقول انا نفسي في العربية دي
والبنوك هتفلس والعربيات الأحسن هتبان في عنيك اكتر
(لو كان لابن آدم واد من ذهب لتمنى ان يكون له واديان )
والبني آدم متملاش عينو غير التراب
ارضى بالي ربنا قسيمهمولك وحبوا عشان تعيش سعيد في حيلتك
وربنا يكرمك بيها وبالاحسن منها ان شاء الله

**RED_OCTOBER_IV** · 31-01-2009 11:01 AM

يا جماعه المرسيديس والبى إم وامثالهم دول بيلعبوا فى حته وباقى العربيات بتلعب فى حته تانيه خالص .. جرب تعلى التكيف فى الفيرنا ولا النبيرا .. وشوف هتبقى عامله زى المعزه ولا لاء .. مفيش وجه مقارنه .

**Sout_Sout** · 01-02-2009 12:52 AM

ههههههههههههههههههههههههه ههههههههههه
حلو قوى موضوع البنوك ده
هفكر فيه
كلام فى سرك
تشاركنى فى اللعبة دى وتاخد النص؟؟
:d:d:d:d
يا عم والله كله كويس والحمد لله على كل شئ
حتى من غير عربية خالص الحمد لله برضه
طالما الواحد لاقى لقمة يا كلها تخليه يعيش لليوم التانى يبقى كده تمام والحمد لله يا جماعة
وحلوة المعزة دى يا عم ريد اكتوبر
ده لو ايه هيبقى بطة مش معزة ههههههههههههههه

**formoza** · 01-02-2009 12:00 PM

بس اسمع ان العربيه دى بتسحب بنزين كتير و ده عيبها و ده عيب خطير
(على فكرة ده غل مش اكتر, ملقوش فى الورد حاجه )

**saidbakr** · 01-02-2009 04:05 PM

المشاركة الأصلية كتبت بواسطة formoza

بس اسمع ان العربيه دى بتسحب بنزين كتير و ده عيبها و ده عيب خطير
(على فكرة ده غل مش اكتر, ملقوش فى الورد حاجه

)

بنزين إيه يا عم الحاج!!! إنت جاي تتكلم في شوية بنزين و سايب تمنها اللي موش عارف كام سبعميت الف جنيه!!!

يا حبيب قلبي البنزين ده للفقرا اللي زيي. بالمناسبة الفقير هو اللي لما يشوف حاجة تعجبه و يسأل دي بكام قبل ما يفكر يشتريها. موش يفكر يشتري الأول و بعدين يعرف التمن و هو جاي يشتري.