الموضوع: سؤال فني ..أرجوا الإفادة

[size=24]شكرا ً جزيلا على اهتمامك وأرجو انك متزهقش مني .
بس هو في الحقيقة إن الكلام عن فتيس الأوبل في كل سيارات الأوبل انه بيبوظ بسرعة وغالي في تغييره وكمان التكييف في سيارات الأسسترا وكثرة الأعطال في سيارات الكورسا .
يعني من الآخر في دعاية كاملة ضد سيارات الأوبل لكن في الحقيقة معرفش الكلام اللي أصحابي بيقولوه ده حقيقي ولا لأ.
وآسف على الإطالة

]وأرجو من سيادتك انك توضحلي موديل الأسترا بتاع سيادتك ولو تفضلت عليا وقيمتهالي تقييم سربع مختصر أكون شاكر جدا ً.

ياسيدى الفاضل
انا طبعاً مش عارف حضرتك بتكم عن اى فئة اوبل ولكن انا هتكلم عن فيكترا 99 1600cc
عيوبها اولا :
1. سحب ضعيف الاول والثانى ده العيب الوحيد الى انا شايفه فيها
مميزاتها
1. ثبات اكثر من رائع
2. صالون جميل جدا وخامات محترمة افضل من عربيات كتير
3. قطع غيار معمرة جدا جدا وصدقنى اسعارها مش غالية
4. صاج قوى جدا جدا ومتبصش للكصدام الفبر خالص ده تحته قضيب قطار

ده باختصار شديد

المشاركة الأصلية كتبت بواسطة طارق ابراهيم

]وأرجو من سيادتك انك توضحلي موديل الأسترا بتاع سيادتك ولو تفضلت عليا وقيمتهالي تقييم سربع مختصر أكون شاكر جدا ً.

عربيتى أسترا 2004 1600 سى سى اوتوماتيك جميع الكماليات

بص هقوللك على عيوبها الأول
العربية طلعتها مش جامدة نوعا ما نظرا لأنها تقيلة وكمان اوتوماتيك بس ده مديها رسو وإتزان
ممكن تعوض ده بزرار السبورت او 1 2 3
التكيف زيه زى كل العربيات الألمانى بياخد وقت عبال مايسقع بس لو إتضبط بيقى كويس
العربية موتورها بيسخن بالنسبة لى بس المؤشر عادى أعتقد ان الأوبل كلها كده
العزل الحرارى مش عاجبنى خالص العربية عندى بتبقى فرن الظهر خصوصا انها سودة و فرشها جلد


كتير من قطع الغيار مش موجودة غير فى التوكيل
مش كتير الميكانيكية اللى بيفهموا كويس فيها تحس أنهم بيخافوا منها

طقم السيور بيتغير كل 50 الف وده نسبيا قليل وخصوصا ان الطقم فى التوكيل غالى

إكسسواراتها نادرة

بالنسبة لقطع الغيار التوكيل عامة أغلى من محلات قطع الغيار

بالنسبة للى بيقولوا أسعار قطع الغيار نااااااار - هو فيه عربية ألمانى قطع غيارها رخيصة؟؟؟

بس قطع الغيار الأمانى معروفة ان عمرها طويل

ملحوظة هامة
حذار من مركز صيانة أوتو ماستر حرامية ونصابين فوق المتوقع
مركز الطيران معقول بس بقى زحمة- مقار سمعت ان كويس وهو مركز الهرم

مميزات
موتور الأيكو تيك موتور معروف انه موتور قوى
العربية بالنسبة لى راسية جدا أنا مش هواة السرعات الجنونية سرعتى بين 80 و 120
مش خفيفة زى الأنسر وده يديك إحساس بالرسو أكثر من الأخر عربية المانى حتى لو متصنعة فى البرازيل

عزل الصوت كويس زده بيبان على السرعة وانت قافل الزجاج ومن صوت الكاسيت من برة العربية

زى ماسمعت مشاكل التكييف فى الأسترا اقل بكتير من الفيكترا بس طبعا الفيكترا مش محتاجة كلام عنها

غير حاجات الصيانة انا ماغيرتش حاجة فيها ذات قيمة ماعدا شوية حاجات خاصة بالتكييف

الخلاصة بإعتبر الأسترا عربية محترمة أكثر من عربيات تانية كتير

تحياتى

انا متشكر جدا ً من الأخ الأستاذ HNaga والاستاذ محمد المصري على إهتمامكم اللي شرفني ده وآسف جدا ً على الإطالة .
ويبدو ان انا كده استريحت قليلا ً من ناحية الأوبل وربنا يباركلكوا في سياراتكوا ويكفيكوا شرها

السلام عليكم،

ملحوظة هامة
حذار من مركز صيانة أوتو ماستر حرامية ونصابين فوق المتوقع
مركز الطيران معقول بس بقى زحمة- مقار سمعت ان كويس وهو مركز الهرم

أستاذ HNaga، بعد إذنك ممكن توضح أكتر أسباب عدم ارتياحك لمركز أوتوماستر لأني بعمل الصيانة هناك و عايز أعرف عيوبهم عشان أتجنبهم. أنا بصراحة بروحلو عشان بيبقى فاضي مش زي منصور الطيران.

شكرا.