مقارنة الادا بالشاهين فية ظلم كبير جدا للادا.....

**mohamed yousry** · 03-05-2007 11:31 PM

ممكن تقارن الادا بال128 والادا اكيد تكسب ....لكن الشاهين افضل من الادا بمراحل....فتيس اخف وقطع غيار معمرة دركسيون متطور(الادا الوحيدة تنزل بعلبة دركسيون تعمل بنظام الترس والدودة)------وهو نظام الدركسيون فى الجرار الزراعى!!!مينفعش تنزل باور...عكس الشاهين....!!!
واليك فروق اخرى:
1-التقفيل الداخلى فى الادا متأخر جدا عن الشاهين وقعدتها وحشة جدا...وبص على التغليف الداخلى للأبواب فى العربيتين..وتحس ان دماغك لازق فى السقف والزجاج الأمامى وانت راكب الأدا....
2-الشكل الخارجى لا غبار انة فى صالح الشاهين (عصرى الى حد ما على الأقل احسن من بعض العربيات الصينى)...الادا اسوأ شكل عربية حديثة بلا منازع.
3-العفشة لن تكون فى صالح الادا ابدا ...العربية الوحيدة اللى بشوفها عجلها فك منها اثناء القيادة بسبب مشكلة البيض المشهورة فى عفشة الادا هى وال 124...لى واحد صاحبى بقالها معاة 4 شهور وبتشخلل(روسى 1600)...
4-نيجى للموتور ...موتور الادا مصنوع من اسوأ خامات الحديد فى العالم (حديد روسى بة شوائب كثير)...(منقول عن أ.سبعاوى)......نادرا تلاقى عربية شاهين بتدخن ....لكن الادا هتلاقى منها كتير موتورها مفوت وموديلات حديثة(تسعينات).....وصوتها عالى طبعا عن الشاهين...سحب الشاهين 1400 احسن من الادا 1600 عن تجربة شخصية (سوقت العربيتين فى يوم واحد ورا بعض)
5-مبيعات الشاهين ال 1400 اكثر بكثير من الادا 1500 و1600 مجتمعين معا رغم ان الادا ارخص...وبصوا على التاكسى فى مصر هتلاقى الشاهين تكسب رغم انها اغلى والتاكسى بيبص دايما على ارخص عربية بدون مشاكل.....يعنى الناس بتهرب من الادا 1600(الأرخص سعرا)وتروح للشاهين 1400 (اغلى مالا يقل عن 10 تلاف جنية)!!!!!!! :shock: مش معقول الناس دى كلها غلط...
خلاصة كلامى ان الادا عربية ممتازة بالنسبة لسعرها واحسن من 128 اللى سعرها قريب منها لكن مينفعش نقارنها بالى اعلى منها.......وهذا رأى الشخصى........

**bassam nagy** · 04-05-2007 06:13 PM

لا الشاهين تكسب بمراحل لانها عربية حلوة بالرغم من التقفيل المصرى التعبان بس عربية احسصن من اللادا بمراحل كتيير

**حسام كرم** · 06-05-2007 09:02 AM

السيد الفاضل محمد يسرى شكراً لمشاركتك الجميلة فى روم الادا وفعلاً لو تمت مقارنة اللادا ب128 اللادا تكتسح وليس تكسب فقط ولكنى احب ان اوضح لك انة لعمل اى مقارنة لابد ان يكون هناك عدد من الثوابت واهما اغفال الجانب العاطفى بارتباط الشخص بالسيارة التى يمتلكها ثانياً توحيد المقام وهو فى حالة هذة المقارنة سعر السيارتين فكيف نقارن سيارتين يصل الفرق بين سعرهما الى 14 الف وهو فرق كفيل بشراء سيارة اخرى او اضافة جميع الكماليات الى السيارة اللادا لتصبح اعجوبة عصرها ولم تصمد امامها الشاهين فى المقارنة
- اما بالنسبة ان فتيس الشاهين اخف فهذا شيى نسبى قد يختلف تقييمة من شخص الى اخر
- اما بالنسبة ان قطع غيار الشاهين معمرة فايضا قطع غيار اللادا ايضا معمرة جدا لعشرات السنين
- وبالنسبة لنظام التعليق الترس والدودة المعمول بة فى اللادا والمشابة لنظام الجرارات كما تقول سيادتك فهو يعطى السيارة ثبات عالى جداً على المنحنيات والسرعات العالية فلم يسبق ان راينا سيارة لادا او جرار انقلب على طريق سريع اى ان هذا النظام قد اراة انا ميزة وتراة انت عيبا
- اما بالنسبة للتقفيل الداخلى فانا لن اتحامل على الشاهين وساقول لك ان الاثنين فى مستوى واحد تماما ومعقول على اعتبار ان التقفيل مصرى
- اما بالنسبة ان شكل الشاهين عصرى فلا ادرى بالضبط ما هو العصرى فى تقفيل الشاهين فان كانت اللادا عبارة عن صندوق مربع كما يقول البعض فان الشاهين عبارة عن صندوق مستطيل وهذا من وجهة نظر تشبية السيارات بالصناديق
- اما بالنسبة للصوت العالى فذلك يرجع الى ان سير الكاتينة بالادا معدن وليس كاوتش كالشاهين مما يجعلة معمر جدا واحتمالات قطعة ضئيلة اى ان هذا العيب يقابلة ميزة من جهة اخرى
- اما بالنسبة لموضوع ان هناك سيارات لادا مدخنة فان عدم الصيانة الدورية وتغيير الزيت فى مواعيدة والقرص الدائم على السيارة قادر على ان يجعل الرولس رويس تدخن وليس اللادا فقط ويبدو انك لم تشاهد الا السيارة اللادا فقط التى تدخن فى مصر
- وبالنسبة لاعداد التاكسى الشاهين واللادا فيبدو ايضا ان سيادتك غافل عنك ان الاحصائيات تشير الى ان اكبر عدد سيارات تاكسى فى مصر هو اللادا وان انتشار السيارة الشاهين التاكسى فى مصر يرجع الى بيعها بالتقسيط بالاشتراك مع بنك ناصر وبنك الائتمان الزراعى كسياسة دولة فى تصريف انتاج شركة النصر المملوكة للحكومة بعكس مصنع انتاج اللاد المملوك للقطاع الخاص
واخيرا الخلاف لا يفسد للود قضية وان لو امتلك موتوسيكل سادافع عنة وقد اراة احسن من سيارة بورش ولكن دون تجريح فى البورش او عمل مقارنات غير سليمة وغير مبنية على اسس موضوعية واسف للاطالة وشكرا جزيلا لك

**hanyfarrag** · 06-05-2007 10:02 AM

يا جماعة أى عربية لها مزياها ولها عيوبها
والشاهين والادا من أحسن العربيات اللى ليها شعبية جامدة

**bassam nagy** · 06-05-2007 05:21 PM

مقارنة رائعة يااستاذ حسام كرم وبصراحة هما الاتنين الية ينفعوا الطرق المصرية الية فيها مطبات غير هندسية والحفر والكسور الية فى الشوارع :(

**Hazem Salah** · 06-05-2007 05:36 PM

كلامك واضح و منطقى ياحسام
أنا مع التحليل المنطقى مح كامل احترامى و تقديرى لجهود الجميع
كمان أنا عندى لادا :lol:

**mohamed yousry** · 07-05-2007 03:34 PM

اولا :اشكركم على اهتمامكم ومشاراكتكم وسعيد بوجودى معكم هنا فى منتدى الادا(ارخص عربية محترمة ممكن الواح يشتريها)..
ثانيا :احب اعيد واكد كلمة الأخ العزيز استاذ حسام كرم عندما قال ان الخلاف فى الرأى لا يفسد للود قضية...
ثالثا :انا ممكن اعترف انى فى المقال بتاعى اتحاملت على الادا شوية ولدرجة ان اى واحد يقرأ هذا المقال ممكن يهرب من شراء الادا...وهى ليست سيارة سيئة لهذة الدرجة...ولكن ان مازلت على رأى بخصوص ان الشاهين احسن من الادا..وهذا راى الخاص بى ...انا لو معايا ثمن الادا هستنى احوش شوية واجيب الشاهين لأسباب كثيرة...لا يتسع الموقف الأن لذكرها وهذا ردى على مقال الأستاذ المحترم حسام كرم والهدف من الرد هو تقريب وجهات النظر واقناع بعضنا البعض برأى الأخر.

وبالنسبة لنظام التعليق الترس والدودة المعمول بة فى اللادا والمشابة لنظام الجرارات كما تقول سيادتك فهو يعطى السيارة ثبات عالى جداً على المنحنيات والسرعات العالية فلم يسبق ان راينا سيارة لادا او جرار انقلب على طريق سريع اى ان هذا النظام قد اراة انا ميزة وتراة انت عيبا

معنى كلامك ان كل شركات تصنيع السيارات بما فيها الالمانى والامريكى غلط والادا 2107 الوحيدة اللى عاملة نظام دركسيون مفيش زية يمنع السيارة انها تتقلب.....على فكرة كل السيارات زمان كانت ماشية بهذا النظام والادا الوحيدة اللى لسة بتستخدمة حتى الأن وهو مش اختراع الادا مثلا (الادا تقليد الفيات 124.)...بالأضافة ان الموديلات الحديثة من الادا لا تستخدم هذا النظام(الادا 2110 وغيرة).... :roll: :roll: :roll:

- اما بالنسبة للتقفيل الداخلى فانا لن اتحامل على الشاهين وساقول لك ان الاثنين فى مستوى واحد تماما ومعقول على اعتبار ان التقفيل مصرى

ياراجل لنت شفت شكل التابلوة الجديد بتاع الشاهين دة بنافس تابلوة الهيونداى المعروف بشياكتة....بص وقارن تانى وانت تعرف الفرق ...على العموم دى اذواق..لكن حضرتك ممكن استفتاء هنا فى المنتدى على التقفيا الداخلى فى السيارتين وانا واثق من النتيجة!!!! :!: :!:

- اما بالنسبة ان شكل الشاهين عصرى فلا ادرى بالضبط ما هو العصرى فى تقفيل الشاهين فان كانت اللادا عبارة عن صندوق مربع كما يقول البعض فان الشاهين عبارة عن صندوق مستطيل وهذا من وجهة نظر تشبية السيارات بالصناديق

بردة ممكن نعمل استفتاء ...الادا عاملة من قدام زى مايكون واحد مكشر ومبوز وسقفها مثل ال124 اللى اتلغت بقالها ازمنة..بص على بربيز الزجاج من قدام و ورا وقارن...انا بصراحة اول مرة اسمع حد يقول ان شكل الشاهين والادا مفيش فرق بينهم وكلاهم متأخر فى التصميم.... :roll: :roll: :roll: :!: :!:

اما بالنسبة للصوت العالى فذلك يرجع الى ان سير الكاتينة بالادا معدن وليس كاوتش كالشاهين مما يجعلة معمر جدا واحتمالات قطعة ضئيلة اى ان هذا العيب يقابلة ميزة من جهة اخرى

معلش مش صوت سير الكاتينة بس هو السبب ...موتور الادا معروف بطبعة انة خشن...وهذا رأى الشخصى لما سوقت الأثنين....

- اما بالنسبة لموضوع ان هناك سيارات لادا مدخنة فان عدم الصيانة الدورية وتغيير الزيت فى مواعيدة والقرص الدائم على السيارة قادر على ان يجعل الرولس رويس تدخن وليس اللادا فقط ويبدو انك لم تشاهد الا السيارة اللادا فقط التى تدخن فى مصر

يعنى كل اللى سايقين لادا بيقرصوا وما بيغروش زيت واللى سايقين شاهين بيحافظوا على عربياتهم...انا بتكلم عن ظواهر التدخين التى تلفت الأنتباة مثلا تجد سيارة هيونداى موديل التسعينات بتدخن وكذلك لادا موديل حديث بتدخن لكن مش بتكلم على سيارة موديل قديم بتدخن ولا لأ...فعلا هتلاقى الشاهين نادرا لمل تكون بتدخن...(على فكرة انا معايا هيونداى بردة وهذا ينفى انى بدافع عن الشاهين لمجرد انها معايا لأن فعلا الشاهين احسن من الهيونداى فى القوة والعمر الأفتراضى بغض النظر عن النعومة فى القيادة وغيرة)..

- وبالنسبة لاعداد التاكسى الشاهين واللادا فيبدو ايضا ان سيادتك غافل عنك ان الاحصائيات تشير الى ان اكبر عدد سيارات تاكسى فى مصر هو اللادا وان انتشار السيارة الشاهين التاكسى فى مصر يرجع الى بيعها بالتقسيط بالاشتراك مع بنك ناصر وبنك الائتمان الزراعى كسياسة دولة فى تصريف انتاج شركة النصر المملوكة للحكومة بعكس مصنع انتاج اللاد المملوك للقطاع الخاص

قد تكون هذة المعلومة غير متأكد منها ولكن هو احساس ان الشاهين على الأقل فى الفترة من بعد 1995 بتبيع اكثر سواء ملاكى او تاكسى...اما عن التقسيط فأى عربية ممكن تتقسط عن طريق اى بنك دلوقت... لكن بردة ممكن تكون معلوماتك تكون احسن منى فى الموضوع دة وتقدر نستفاد من حضرتك.....

لى حضرتك مرديتش على موضوع عفشة الادا ومشكلة البيض الشهيرة فى الادا..ياريت ترجعلها فى المقال؟؟؟ :?:
فى النهاية... زى مقلت لحضرتك احنا هنا عشان نفيد بعض ...واعتز بالحوار الراقى مع حضرتك.....

**matrix_rashed_8** · 07-05-2007 08:26 PM

انا عندى الاحسن من اللادا و الشاهين
ال504
رغم انها موديل 79 لكنها لا تقران و لا بالادا و لا بالشاهين
و من وجهة نظرى عذرا يعنى
كلتاهما سيارات فاشلة اذا قو رنوا باى سيارة دلوقتى
خصوصا بعد الارتفاع الملحوظ فى اسعرهم
و شكرا
ارجو ان محدش يزعل منى

**حسام كرم** · 08-05-2007 10:28 AM

يا اخ ماتريكس
كان لزاماً عليك ان تعرف ان جميع مناظرات هذا المنتدى لابد ان تتسم بالبراهين والادلة والمعلومات وان المقارنات لابد ان تقترن بالمعلومات التى اعرفها عن السيارة التى اتكلم عنها وفى حالة عدم علمى باى معلومات عنها فيفضل عدم المدح او التجريح فيها بدون علم فلا يجب ان تقول السيارة ممتازة الا وتذكر اسباب هذا الامتياز او تقول السيارة فاشلة الاوتذكر اسباب هذا الفشل والا فان السكوت وعدم التعليق والقراءة فقط افضل من المشاركة الغير ايجابية والخالية من المعلومات التى من الممكن ان يستفيد منها اعضاء المنتدى
فانا لااستطيع ان اقول لك ما هذا الاسم السيى التى تسمى بة نفسك """ ماتريكس """
ولكن لابد ان اذكر اسباب هذا السوء واقول انك انسان وهذا اسم الة فلا يصح ان تسمى نفسك بة واقول انك من الافضل ان تكتب اسمك حتى تسهل مع اعضاء المنتدى التواصل معك
وهكذا يا اخ ماتريككككككككككسسسسسسسسسس سس
وشكرا

**Hazem Salah** · 08-05-2007 10:36 AM

لا مجال للزعل , و لا شك اننا نحترم رأى الجميع
لكن
أنا معاك أنهم سيارات فاشلة مقارنة بسيارات أخرى حديثة، لكن كل سيارة تعتمد أهميتها فى الاستخدامات المطلوبة لها ، السعر و الصيانة و القدرة الشرائية و غيرها من العوامل التى قد تجعل الشاهين أو اللادا مناسبة لواحد و فاشلة لأخر.
يعنى
لك أن تتخيل أن مشرف أمن عندنا فى النادى جايب تاونس موديل خمسينات، و حاجز لها ركنة (طبعا بره النادى) ، و سعيد بها جدا، و غيره من أمثلة لناس بتعتز بنوع من السيارات لفترة طويلة جدا، رغم قدرتهم على شراء S CLASS ، مثلا . .