الموضوع: السيارة الرائعة شانا بييني 1.3

الأخ الفاضل الذى وضع معلومات عن شانا الصينية..شكرا لك ألف شكر فالسيارة معى منذ أكثر من 9 شهور وهى ممتازة على الرغم من أن الصالون الداخلى المواد الخام فيه أقل من منافساتها ..لكن التسارع بها ممتاز..وهى مريحة فى السفر..فأنا شخصيا رحت بيها مرسى مطروح على سرعة 125 كم / ساعة.. ده غير أنى بمشى بيها أكتر من 150 كم يوميا وبسافر بيها طنطا أسبوعيا!!والكراسى فيها مريحة جدا أما التابلوه فأكثر من رائع والأضاءة فيه ممتازة وغير مجهدة للعين ووجود عداد RBM هام جدا للحفاظ على المحرك..أما الABS فهو فعال و ظهرت فائدته عندما حاولت مفاداه حفرة كبيرة وحسيت بيه تحت رجلى وتمكنت من المناورة بالعربية وتحكمت بها بشكل رائع..فمنذ اشتريت السيارة لم أكن أتخيل أن هذا النظام فعال بهذا الشكل..وظهر تانى مرة بشكل يثير الأعجاب لما فرملت جامد على زيت كان فى الطريق السريع والعربية كانت متماسكة كويس أوى...أنا أرى أن شركة شانا الصينية أستفادت جدا من خبرة سوزوكى اليابانية فى هذه السيارة وغيرها من الموديلات الأخرى مثل موديل Z shine الذى ينافس بلا مبالغة السيارات اليابانية.. كما أن أختيارشركة فورد الأمريكية لشركة شانا لتقوم بتجميع سياراتها فى الصين لم يأتى من فراغ..ولن تغامر سوزوكى وفورد بسمعتهم عند شركة ضعيفة...وأتركم مع صور سوزوكى سويفت الصينية التى تقوم بتجميعها شركة شانا وقامت بعمل تعديلات فيها على الموديل الأصلى وشملت تعديل فى الشبكة والفوانيس الأمامية و2 أير باج بالأضافة لABS , EBD.................اما الأخ الفاضل اللى بيقول أن البلاستيك بقوا يعملوا منه حاجات جامدة ..فقبل ما تسخر من بلد لديها صناعة ناشئة وتتطور كل يوم..يا ريت تقولنا بلدك عملت أيه غير أنها جمعت ال 128 من 30 سنه..وياريت فلحت..وياريت كمان تقاطع المنتجات الصينية كلها عشان تستريح ..ويا ريت يا أخوانا اللى عنده كلمة يقولها ويفيد بها الأخوة فى المنتدى يقولها..واللى معندوش ..يترك التعليق لزملائه!

شكرا لجميع الأخوة اللى ردوا..وأسف لأخى العزيز العضو الفضى اللى أتهمته بالسخرية من الصينى..فأنا يا صديقى غير متحيز للصين بالمعنى المفهوم..ولكنى أحترم هذا الشعب الذى سوف يصل للجودة اليابانية فى أقل من 10 سنوات..وأنا لا أقول هذا الكلام من فراغ..ومما يؤكد كلامى أن أحد أصدقائى..يعمل مدير تجارى لأحدى شركات السيارات..قال لى أن كل دفعة يتم أستيرادها لشركته من الصين بها طفرة فى الصناعة عن الدفعة التى قبلها..وغير ذلك الكثير..وقال لى أيضا جملة تصلح ردا على أخى الفاضل محمد جمال الدين..أن الشركات الصينية فى بداياتها قامت بعمل سيارات ليست على مستوى الجودة المطلوب واستطاعت بالعربى كده أنها تلم فلوس تطور بيها مصانعها وتزود جودة منتجاتها فى وقت قياسى..وأظن يا أخوانى اننا عمرنا ما سمعنا أن رجل أعمال صينى لم فلوس السوق وهرب لندن!!!!!وخير مثال على ذلك جيلى الصينية..كان فيه واحد من أصدقائى سألنىيشترى الفروته ولا لأ..أيام ما نزلها أيمن كمال..أنا بعد ما فحصتها رفضت بشدة..لأن جودتها مش أد كده..الكلام ده كان من 4 سنين..شوفوا دلوقتى أنتاج جيلى عامل أزاى؟؟وبعد 5 سنين هيبقى عامل أزاى...وأود أن ألفت نظر أخى جمال الدين الى فارق كبير بين بداية هيونداى و دايو و بين السيارات الصينية..هيونداى نشأت بالتعاون مع ميتسوبيشى ودايو بالتعاون مع جنرال موتورز يعنى البداية قوية..بعكس أغلب الشركات الصينية التى بدأت من الصفر..فكان من الطبيعى أنها تتدرج فى مسألة الجودة..وسنأخذ مثل أوروبى ...كشركة سيات التى بدأت فى انتاج سياراتها بالتعاون مع فيات..صنعت الفيات 124 تحت اسم سيات فى اسبانيا..واستقلت بموديل مالاجا القريب الشبه بالريجاتا أن لم يماثله فى الشكل أيضا...وبعد أن استفادت من فيات أنتقلت لمجموعة فولكس فاجن مع سكودا التشيكية..وهنا حدثت الطفرة فى نوعية المنتج..سواء لسيات أم سكودا التى لا أنسى موديلها الشهير ذو المحرك الخلفى فى الثمانينات والتى حاولت أقناع أبى بشرائها انذاك..لكنه مارضيش عشان كنت لسه فى المدرسة!!!دلوقتى حد يقدر يقول تلت التلاته كام فى الأوكتافيا a5؟....الخلاصة أن لكل سيارة مميزات أو عيوب و مش معنى أن العربية زيقت ان الموديل نفسه وحش..ممكن تكون العربية دى بالذات فيها مشكلة...والدليل على كده أنى قبل ما أخد قرار الشراء وقفت كذا واحد كان راكبها و أخرهم واحد فرجنى عليها و خلانى اسوقها..واتخذت قرار الشراء بعدها..الحاجة الوحيدة اللى بعيبها على الشركة أنها جعلت شعارين لمنتجاتها..الشعار الأول لسيارات الفان والنقل و هو منقول حرفيا من تويوتا بس بالمقلوب!!
الشعار التانى وهو اللى موجود على البينى هو شعار الدرع..معذرة للأطالة..وأترككم مع صور لسيارات ذات جودة عاليه من شانا و هى أفضل من بينى بمراحل...ومن المنتظر أن سعودى يجيبها قريب..أرجوا أن تحوز على اعجابكم

فى الحقيقة انا معجب جدا بالاسبرانزا 113 بس من يومين شوفت البينى فى الشارع عجبنى شكلها
هى تشبه كثيرا الهيونداى الجيتز
بس انا محتار لانى ناوى اشترى قريب جدا و دى هتكون اول سيارة ليه فالاحسن انى اجيب اسبرانزا و له شانا بينى و خصوصا ان هما دول اللى فى حدود امكانياتى و لا انسى الصينى و اجيب شيفروليه سبارك