الموضوع: الخلاصة في حملة خليها تصدي

هتصدي يعني هتصدي بدون جدال
طبعا الأستاذ سامح الذي أثار موضوع التخفيضات الجديدة له تحية و تقدير مننا كلنا لكن أحب أقول لحضرتك إن كلامك بتاع إن مفيش حد يعرف موضوع الحملة بتاعتنا و إن موضوع النت ده مش منتشر بشكل واسع ده كلام خالي تماما من الصحة و غير منطقي وزي ماحضرتك بتقول إن كلامك كله له مصادر موثوقة يبقى لازم ترجع لملحق السيارات بتاع الأخبار و اللي نشر موضوع الحملة على صفحته الأولى والدفاع عن الوكلاء و ده أكبر دليل على الإنتشار الغير عادي للحملة و إنها مسمعة في كل مكان.
ده طبعا غير بعض البرامج التليفزيونية و الإذاعية التي تكلمت عن موضوع الحملة ولو بشكل عابر.

ثانيا بصراحة الركود القاتل في سوق السيارات الحالي ليس هو نتيجة الحملة فقط بل إن الحملة من الجائز أن يكون لها تأثير بسيط جدا...
لازم تعرف إن الموضوع إن في أزمة إقتصادية طاحنة بدأنا نرى وجهها القبيح كل يوم أكثر من ذي قبل...
بمعنى أخر في ناس كتير في مجال السياحة فقدت وظائفها أو على أقل تقدير فقدت جزء كبير من دخولها نتيجة تخفيض المرتبات أو بسبب الإنخفاض المفاجئ في عدد السياح و طبعا عائدات السياحة هي من أكبر عائدات الدولة و التي بشكل بديهي تؤثر على جميع المجالات الأخرى مثل العقارات و السيارات و غيره..
يبقى حتى لو مش شغال في السياحة و شايف الإنهيار ده في كل القطاعات مش هافكر أغير عربيتي في مثل هذا التوقيت أو أدبس نفسي في أقساط ولسه مش باين أي بشائر... الموضوع إن الأزمة الأقتصادية أثرت على الناس جمبيعا حتى من ليس له أي دخل بالأزمة زي محلات الفول مثلا...وبقى التأثير النفسي يشكل 50 % من الأزمة,
فحتى أنا لو بعيد عن الأزمة هضطر أعيد تفكير في أي قرش بصرفه حتى تتضح الرؤية تماما خصوصا في وجود أراء بأن الأزمة سوف تطول لسنين وليس شهور معدودة.. يبقى يا أستاذ سامح الموضوع مش موضوع حملة خليها تصدي فقط ومفيش داعي لتهبيط القائمين بها لإن الموضوع أكبر من الحملة بكتير...
الخلاصة: هتصدي يعني هتصدي برضانا أو بغير رضانا
يبقى الحل واحد من إثنين إن الحكومة تقوم بعمل إجراءات لإننعاش السوق و دفع القوة الشرائية للتحرك مثل تخفيض الجمارك أو ما شابه... وده من الواضح حتى الأن إنه حل مستحيل لإن حكومتنا مالهاش دعوة بالمواطن أو بلأزمة واللي يولع يولع مادام ده مش هيأثر على دخل الجمارك و الضرائب المنهوب.

الحل الثاني هو قيام الوكلاء بعمل تخفيضات حقيقية و لو بخسارة ضئيلة على المدى القصيرعملا بمبدأ الخسارة القريبة ولا المكسب البعيد وبكده هيكون في دافع حقيقي للقوة الشرائية بإتخاذ قرار الشراء و إنقاذ السوق من دوامة الركود و الخسائر الفادحة على المدى المتوسط

أو تصدي يعني هتصدي بدون جدال

مش كده ولا إيه؟؟؟؟

لو إتكلمنا في الحلول الواقعية كلنا عارفين إن الحكومة رافضة تماما تخفيض الجمارك و أعلنوها صراحة أكثر من مرة!!
يعني لازم نشيل الحكومة من الحسبة لإنها عمرها ما أخدت قرار في مصلحة المواطن في أي مجال!!!
وكمان أساس الموضوع إن أسعار السيارات ستنخفض إجباري ليس بسبب الحملة فقط و لكن للأسباب السابق ذكرها