حضرتك عاوز الأسعار تنزل 40% ازاى ده على اساس ان الجمارك دى مكسب للوكيل؟
هقول لحضرتك على اساس ايه:-
عربية زي جين2 مثلاً تمنها (أقصد كامل تكلفتها على عز العرب من أول ما جت له من ماليزيا مرورا بالجمارك لغاية ما وقفت عنده علشان تنباع) بأي حال من الأحوال ما يعديش 45 الف جنيه.
خليك معايا شوية، هنفرض ان عز العرب هيبيع العربية دي لله موش هيكسب و لا مليم واحد، و في ظل الفرضية دي نقدر نجيب اصل تمنها عليه بمعرفة ان الجمارك عليها تقريبا بتكون 61%، يعني
قيمة الجمرك = 90 × 61/100
قيمة الجمرك = 54.9 الف جنيه
يعني العربية واقفة عليه ب 91-54.9 = 36.1 الف جنيه
يعني لو رجعنا للواقع و انه لازم يكسب، ده هيعني ان كل قرش مكسب هياخده لازم هيقلل من 36.1 الف جنيه دول و بالتالي من قيمة الجمرك اللي كنا حسبناها قبل كدة.
يا عزيزي فيه أقاويل بتقول ان عربية زي جين2 بتبقى واقفة على عز العرب من غير جمارك بحاجة و عشرين الف جنيه.
و اعتقد ان فيه معانا ناس على علاقة بالتوكيل او ناس شغالين فيه، يقدروا يعرضوا لينا وثائق الشراء بتاعت عز العرب او حتى مندوب عن الوكيل يقدر يكدب كلامي ويأكد عكسه بمستندات رسمية من التوكيل علشان كله يبقى على نور.
مساء الفل....ليا رأى متواضع
لو الجمرك فعلا 61% من تمن العربية يبقى الحسبة كالاتى
بفرض سعر بيع العربية 90000
وثمن العربية الاصلى =p
90000=p+(p*61/100
لان الجمرك يحتسب على السعر الاصلى وليس على الاجمالى
يبقى الثمن الاصلى
P=55900
وده طبعا بدوت احتساب نسبة الربح
يعنى لو بنتكلم فى هامش من 10 الى 15 الف
يبقى سعر العربية استاذ سعيد هايكون فى رينج 40 الى 45 الف
يعنى نزول 2000 الى 5000 جنيه ده هايبقى انجاز الا اذا الاسعار نزلت جامد من بروتون نفسها
أما موضوع نزول 30 او 40 % فده ممكن يبقى فى أى حتة فى العالم ماعدا بلدنا لانى عمرى ماشفت حاجة رخصت بالنسبة دى ابدا
يا باشا الجمرك بيتحسب على أجمالي (أصل تمن المصنع + الشحن+ التأمين)
يعني لو افترضنا زي ما قولت انه ما كسبشي حاجة خالص من الـ90 الف جنيه، يبقى هتشيل منهم الـ61% جمارك و الباقي يبقى أصل التمن عليه، و على فكرة هو 61% علشان العربية في فئة الأقل من 1600 سي سي
الجمارك بتحسب على تمن العربيه الأصلى فقط و التوكيل بيضيف عليهم مصاريف الشحن و هامش ربحه
لو عاوز تعرف تمن العربيه كام بالتقريب ممكن تشوف سعرها بره كام فى بلد مفيش فيها جمارك
ياجماعه مفيش حاجه اسمها 30 % و 40 %
الكلام ده عمره ما هيحصل
وعموما بروتون بالذات لو رخصت مش هترخص كتير
لانها العربيه الوحيده فى السوق اللى سعرها مناسب لامكانياتها
وسعرها شبه ثابت من يوم ما نزلت
بالنسبة للجمارك سهل جدا الناس الجامدة اصحاب التوكيلات تضغط على الحكومة وسعتها الجمارك هتنزل اكيد 100 100
لان اساسا كدا دلوقتى الحكومة جاى عليها بالضرار لما تكون فى اول 2008 مثلا بتعمل جمارك على 3000 عربية فى الشهر بالنسبة بتعتها 60 %
وتيجى دلوقتى تعمل على اول 2009 جمارك على 800 فى الشهر بنفس النسبة يبقا كمان الحكومة بتخسر لان عداد السيارات الى بتيجى من الخارج بقا قليل لان الكمية فى الداخل بتقل بنسبة بسيطة وده بسبب الحملة
ساعتها الحكومة هتنزل النسبة الى 40% او 30% عشان يتدخل عربيات اكتر وبتالى تاخد جمارك اكتر
يعنى يا جماعة والله العظيم الموضوع مجرد وقت مش اكتر واصرار مننا ومش هنرضا باى تخفضيات قليلة
لان نرضا باقل من 30 %
والسلام ختام
يا جماعة مع أحترامي للجميع و لآراء الجميع
سيارات بروتون من السيارات الغير مبالغ في سعرها و الدليل لم تزيد مليم واحد منذ أن دخلت السوق المصري إلى الآن .
ممكن تنزل حاجة بسيطة زي ألف ألفين أو ثلاثة
و مفيش عربية في مصر هاتنزل 40 % و 30 % ( و أنا مع الحملة و ليس ضدها و لكني واقعي و الشعب المصري لو معاه فلوس هايروح يشتري برضه و لا حملة و لا يحزنون هاتخلي حد يوقف الشراء !! للآسف الشديد )
و معلش حاجة تانية غايبة عن الناس
الحملة بتاعة خليها تصدي ممكن يكون ليها تأثير و لكنه تأثير معنوي أكثر منه تأثير حقيقي
التأثير الحقيقي أن سوق السيارات المصري أغلبه مدعوم من البنوك عن طريق التقسيط و نسبة الناس اللي بتشتري نقدا قليلة جدا بالمقارنة بنسبة عدد العربيات المباعة في السوق .
و طبعا بما أن فيه أزمة مالية .... فده بيخلي البنوك تفكر مليون مرة قبل ما تخرج أي قروض ( مش سيارات بس )
لما نيجي نتكلم عن أسعار سيارات مبالغ فيها و يجب نزول أٍسعارها
هانلاقي أن أحنا بنتكلم أساسا على توكيلات الياباني زي تويوتا و ميتسوبيشي بالذات
التوكيلين دول بيكسبوا مكاسب رهيبة في عربياتهم
و دول اللي لازم ينزلوا الأسعار و دل اللي يجب مقاطعتهم حتى نحصل على سيارة منهم بسعر مناسب .
يعني الياريس بتتباع برة مصر و 1500 سي سي ب 70 ألف جنيه ( السوق الأمريكي )
و ييجي توكيل تويوتا يبيع 1300 الكاملة فوق 100 ألف ؟؟؟؟ ليه ؟؟؟؟
اللانسر الشارك الجديدة بتتباع في أمريكا بحوالي 95 ألف مصري و ده موتور 2000 سي سي !!!! و البهوات بيبيعوها في مصر ب 150 ألف ؟؟؟ مش حرام ؟؟؟؟ و كمان موتور 1500 فقط
إنما أسعار بروتون في العالم كله متقاربة مع السعر المصري و على فكرة أسعار بروتون منزلتش في أي سوق خارجي و لسة بتتباع بثمنها في أنجلترا مع ان السوق نايم
( سوق الخليج العربي ليس مقياس لمصر علشان هما معندهومش ضرائب بتاتا ) فمحدش ييجي يقولي السعودية العربيات بتتباع فيها بسعر قليل و يقارنه بمصر لأن الظروف مختلفة تماما من حيث عدد السيارات و الدخل الحكومي و رخض اسعار البنزين لتوفره الشديد و قلة عدد السكان .
لما نقارن ......... نقارن بدول متقاربة في الظروف و الأقتصاد ( الشكل للأقتصاد و طريقة العمل )
الحملة لها تأثير بسيط بأن جعلت من يملك النقد الكافي لشراء سيارة .... يؤجل قرار شراؤها بناءا على نزول معدل البيع في السوق و عدم أستقراره ليس أكثر .