الموضوع: لانسر - صنى - سيراتو - بولو سيدان - سبلندور

يا عم والله ربنا يهدي ، أنا مش عارف فيه ايه ، طب أنا هسألك سؤال ورد عليه بموضوعية ومن غير اي تحيز ،
لو المازدا 3 والنيو سيراتو نفس الفة بنفس السعر مع تثبيت جميع العوامل الأخرى ، هتركب أنهي فيهم ؟

الانسر الافضل اتوكل على الله

كده وصلني ردك اللي على استحياء ،بس الفكرة مش فكرة عرف بيقول ياباني وعلى فكره مش كل الياباني ولا كل الكوري ولا كل الألماني ، الموضوع مش مطلق ، الفكرة فكرة عربية نشوفها ونحلل امكانياتها وجودة خاماتها وتقفيلها وكل حاجه فيها وساعتها نقرر نركب دي ولا دي ولا دي ... مش مثلا اروح اجري اشتري مثلا يارس واقول دي ياباني يا عم احسن من الألنترا مثلا عشان كوري ، لأ طبعا اللي يركب دي ودي ويعرف فعلا يقرق ويحكم بعقله هيقول الألنترا احسن ميت مره ، نيجي لواحد تاني عجباه السيراتو الجديدة ميجيش يقول دي احسن من المازدا 3 وطبعا المازدا3 احسن ميت مره مش عشان ياباني وخلاص لأ عشان هيه فعلا ممتازة في كل حاجه شكل وخامات وعفشة وموتور وفتيس وكله ،

طيب ليه مثلا أنا شايف النيو سيراتو مقلب كبير ، أقولك ليه ... الفكره اني لسه بايع عربيتي وكانت النيو سيراتو عجباني من الصور قبل ما تنزل وكمان مكنش لسه حتى سعرها معروف ، المهم لما نزلت واتحدد سعرها لقيته غالي على سيراتو ، قلت اروح اشوفها واشوف تستاهل ولا لأ ـ وفعلا روحت وشوفتها من وجوه كويس جدا ودورتها وكل حاجه ، وبكل امانة لقيتها من جوه أسوا حتى من العربيات الصيني وخاماتها في منتهى السوء ، ومن بره برده مكانتش بنفس الجمال اللي كان في الصور ومخدتش مني نفس الأعجاب بتاع الصور ، واللي زاد وغطى ان المعرض كان عنده سيفيك ومازدا3 ورغم اني ركبتهم قبل كده وسوقتهم بس بردة قعدت فيهم في المعرض عشان اقارن احساسي بالفرق بينهم وبين النيو سيراتو ، وبكل حيادية لقيت فرق بين السما والأرض ، وقلت طيب ما اللي يخليني اركب السيراتو دي ب 125000 اللي هيه اصلا متستاهلهمش خالص ، طيب ماانا ازود شوية واركب مازدا 3 برقبتها ، وابقى ركبت عربية من الآخر ، وفعلا الفرق بين العربيتين في الجودة والكفائة وكل حاجه اكتر بكتير من فرق السعر بينهم ، وده اللي خلاني اقول انها عربية مقلب ومقلب كبير كمان ، وبكره الناس هتعرف حجم المقلب بعد شوية لما زهوتها تروح وسعرها يرجع لطبيعته وتبان مشاكلها ويقوله يا ريتنا كنا كملنا وجبنا حاجه تستاهل فلوسها حتى لو كسر زيرو بنفس سعر السيراتو الزيرو ،

هوه ده رأي بالتفصيل ،ورغم اني اعتقد اني بفهم كويس في العربيات الا انه راي شخصي قابل للخطا والصواب والغرض منه ان الناس مضيعش فلوسها وخلاص على الفاضي وترجع تندم.

المشاركة الأصلية كتبت بواسطة justs

يا عم والله ربنا يهدي ، أنا مش عارف فيه ايه ، طب أنا هسألك سؤال ورد عليه بموضوعية ومن غير اي تحيز ،
لو المازدا 3 والنيو سيراتو نفس الفة بنفس السعر مع تثبيت جميع العوامل الأخرى ، هتركب أنهي فيهم ؟

مع احترامي لرأي الجميع... بس حضرتك مينفعش تثبت العوامل و مفيش حاجة اسمها افرض ان العوامل كلها متوفرة, لأن الواقع انها مش موجوده و هو ده اللي بيقوم على اساسة الاختيار.

بمعنى.. المازدا 3 ملهاش وكيل في مصر, هتقولي غبور, هقولك هي فين من معارض و صيانة غبور؟؟؟؟ ينفع تجازف و تشتري عربية ملهاش وكيل و الأسم راكب مازدا 3؟؟؟

لو حصلت مشكلة فيتال في العربية... تروح لمين؟؟؟ طيب انت بتثق في ضمان بيديهولك معرض؟؟؟؟؟ الناس محترمة و كل حاجة, بس انت هتكون مرتاح؟؟؟

دي الأسئلة اللي كانت بتدور في دماغي أول ما فكرت في المازدا 3 و العربية طبعا محترمة جدااا, لكن في مصرنا الحبيبة ملهاش توكيل و مش واخدة حقها بصراحة, و انا اعرف ناس معاها مازدا كانت بتحتاس عشان تجيب رفرف أو اكصدام......... و بيلف مصر كلها من الحرفيين لهنا لهنا و مفيش... طيب ليه؟؟؟؟؟

الهربية ملهاش توكيل في مصر و دي حاجة مش في صفها طبعا, دي هتكون من ضمن العيوب اللي في العربية و هي نصيبها كده في مصر, و مع ذلك العربية ناس اشترتها, بس كل واحد و تفكيرو و وجهة نظرو و نظرتو للأمور

و أحب أقولك ان المازدا 3 لو ليها توكيل محترم في مصر و ملتزم, هتكون أغلى من كده بكتيييير, و لو كانت بنفس سعرها, كنت اشترتها لأنها عربية ممتازة طبعا و مفيش كلام, وانا شخصيا افضلها عن اللانسر الشارك اللي برضو فكرت فيها قبل ما اشتري السيراتو....

السيراتو مش سيئه زي ما انت فاهم... بس اركبها مع حد, سوقها و هتعرف انا بتكلم في ايه, و مش عشان بقت عربيتي والله, لكن عشان هي عربية جديرة بالأحترام و لازم تجرب, مش بس تركبها و هي واقفة و بعدها احكم براحتك...

مش هقولك احسن من المازدا كعربية, لكن هي اختيار مطروح في ظل ظروف المازدا 3 و توكيلها المبهم!!!!!!

يا رب أكون قدرت اوضح وجهة النظر, و اسف على الاطالة

ردا على المشاركتين السابقتين ..........
مبدأيا أنا مش عاقد مقارنة ما بين النيو سيراتو والمازدا3 لن مفيش مجال نقارنهم ببعض ، ولكن أنا سالت السؤال اللي فات لأن منطقي الناس ترد الرد البديهي ويقوله مازدا 3 بدون نقاش ، لكن للاسف مفيش غير الجدال والدفاع حتى لو عن باطل صريح ،
طيب ليه انا قلت نيو سيراتو او مازدا3 بالذات ـ لسببين ـ الأول : أني شايف ان المازدا3 أحسن عربية ياباني في السوق هي والسيفيك ، وده مش رأيي لوحدي ولكن رأي ناس كتير قوي ، والسبب التاني أن العربية مفيهاش علطة الناس تتلكك بيها ويجادلو على الفاضي ، ومع ذلك بردو هرد على الحجه الواهية اللي الناس لقيتها وهي موضوع التوكيل ،
- أولا : العربية منتشرة بصورة واضحة ، بس الأنتشار اللي ميزهقش الناس منها ، وأكيد الناس اللي راكبة العربية بتعملها صيانة وبتجيبلها قطع غيار ، ولا انتو شايفين أنهم بيرمو العربية بعد ما يشتروها ويستخدموها شوية ؟
ثانيا : أنا معاكم أن غبور مش مهتم بالعربية ، بس ده زي ماهو سلبي في ظاهره ولكن ايجابي في باطنه ، ازاي ؟ عدم اهتمام التوكيل بالعربية نتج عنه مزايا يمكن متلقيهاش في العربيات التانية ، وهي
1 - وجود أكتر من مستورد رئيسي وله مراكز خدمة وصيانة وقطع غيار وكل حاجه زي سونستا وسمارت كار
2 - وجود مراكز خدمة متعددة ومتخصصة في لعربية زي يس وغيره
3 - وجود محلات قطع غيار متخصصة في المازدا في شارع دمشق والحرفيين وغيرهم
4 - سعرها يعتبر احسن سعر عربية ياباني بهذه المواصفات والكماليات والكفائة المؤكده من تجارب الكثيرين ، والا كنت هتلاقي تمنها معدي ال 170000

يبقى صيانتها موجودة ومتعددة وكمان قطع الغيار ، واللي بيقول مش موجودة يبقى بيفتي من غير احاطة بما يتحدث عنه ومجرد سمع من الناس اللي ممكن كلامهم جاي من اول ما نزلت العربية وقبل ما تنتشر وتتوفر خداماتها زي دلوقتي ،
وغير كده ، نفسي اعرف ايه اللي بتستفيده من التوكيل وانت كل حاجه بتدفع تمنها عادي وكمان اغلى من اي مكان ، ومعظم اللي بيشرو عربياتهم حتى من التوكيل ، مبيرحوش التوكيل اصلا وبيعمله صيانتهم بره التوكيل ، والكل عارف كده ، يبقى يا فرحتى بالتوكيل !!!!!
يبقى اروح اشتري عربية بلاستك وموتورها اخره سنتين تلاتة ب 125000 عشان التوكيل وهي العربية اصلا اخرها التسعينات ، وتقولي أحسن من المازدا3 اللي برقبتها عشان التوكيل ، مش عارف بتتضحكو على نفسكم ولا على الناس ،

وفي النهاية اقدم خالص اعتذاري للمازدا3 والسيفيك ولملاكهم لأني ذكرتهم في نفس الحوار مع عربية زي الكيا سيراتو !!!!