الموضوع: Mitsubishi Colt 2007: Now 82500 LE

أولا ميرسي وشكرا جزيلا علي رد حضرتك السريع وعلي المعلومات والمجهود اللي قمت بيه
ثانيا انا بالفعل قمت بعمل search كامل علي المنتدي بأكمله وشفت تقريبا كل موضوع اتكتب عن الكولت علشان آخد فكرة كاملة عنها. مش فاضل غير اني اشوفها علي الطبيعة وادخلها من جوة علشان اقدر بعد كده آخد القرار السليم وإن شاء الله انا هعمل كده فعلا يوم السبت الجاي في فرع رمسيس باذن الله

ومن خلال قراءاتي لكل المواضيع اللي اتكتبت عن الكولت ليا استفسارات عن الآتي:

1- العربية مش بتيجي بالـ Radio/CD الاصلي بتاعها وزميلنا في المنتدي OldVic ذكر انه مهم جدا لانه من غيره مش هنقدر نتحكم في وظائف الكمبيوتر الا من خلاله ولازم يكون الاصلي مش اي ماركة تانية. ماهي وظائف الكمبيوتر المقصودة هنا؟ وليه مش هقدر اتحكم في وظائف الكمبيوتر الا من خلال الماركة الاصلية فقط لميتسوبيشي كولت وليس اي ماركة اخري؟

2- وهل الـ Radio/CD الاصلي لميتسوبيشي كولت متواجد هنا بمصر؟ لاني برده من خلال متابعاتي للموضوعات المختلفة عنها عرفت ان الزميل OldVic اشتراه من انجلترا عن طريق اصدقاء له هناك، يعني هو مش موجود في مصر خالص ولا ايه؟

3- انا فاكرة انه OldVic كان سأل حضرتك قبل كده عن امكانية تركيب الـ Radio/CD في التوكيل وحضرتك جاوبته بانكم في التوكيل هتركبوهوله. لكن في موضوع تاني (آسفة برده حاولت ادور عليه دلوقتي مقدرتش الاقيه بسهولة) لقيت ان حضرتك بتقول لحد مش فاكره مين ان التوكيل مش بيقوم بتركيب حاجات معينة زي جهاز الانذار مثلا وكان من ضمن الحاجات اللي حضرتك ذكرتها الكاسيت؟ هل هينفع اجيب الـ Radio/CD للتوكيل يركبهولي ولا حد من بره؟ انا اخاف لو قررت اشتري العربية اي حد تاني غير فنيي ميتسوبيشي يمد ايده علي العربية حتي لو هيركب كاسيت وبس

4- انا عمري ما سقت اوتوماتيك خالص وطول عمري بسوق مانيوال بس، ومعلوماتي ان الفتيس الـ Tiptronic ده هو فتيس اوتوماتيك في تقنيته ولكن مع امكانية انك تغير النقلات بنفسك علشان كده بيكون احسن لتسارع العربية (اذا مكنتش غلطانة)، يا تري هقدر اتعلم بسرعة اسوق العربية وهي بالفتيس الـ Tiptronic ؟ ولا هركنها حبه لحد ما اتعلم مثلا؟

آسفة اوي للاطالة بالشكل ده وإن شاء الله آخد انطباع كويس لما اروح اشوف العربية باذن الله

مع خالص تحياتي

م. طارق
أنا بجد شاكرة ليك جدا سرعة استجابتك وسعة صدرك لتحمل أسئلتي الكتيرة ولمعلوماتك المفيدة والوافية

وأطمع في كرم حضرتك اذا كان ممكن بالفعل كما قلت الاتصال بأستاذ أحمد لسؤاله بخصوص موضوع وظائف الكمبيوتر اذا لم يكن فيها اي احراج او ازعاج طبعا

ولي سؤالين أخيرين اذا كان ممكن ومش هتقل علي حضرتك تاني، الأول بخصوص تخزين السيارة لمدة عامين منذ 2007، هل فيه أي خطورة في شراء سيارة بقالها سنتين وأكتر مشتغلتش خالص وهي لسة جديدة؟ وأضمن منين ان طريقة تخزينها من جانب الوكيل كانت هي الطريقة الصحيحة للحفاظ عليها بحالة الزيرو مهما مر من وقت عليها وعلشان متعملش مع المشتري أي مشاكل بعد شرائها بفترة قصيرة نتيجة تخزينها دون استعمال؟ حضرتك عارف صعب أوي ان الواحد يغامر في عربية جديدة زيرو وبعد ما يشتريها يكتشف انه بسبب الركنة زمن طويل بقي فيها مشاكل

السؤال الثاني بخصوص أسعار قطع غيار الكولت. ملقتش أي حاجة عنها هنا في المنتدي ولكن لقيت اللينك ده اللي حضرتك وضحت فيه أسعار قطع غيار لانسر شارك. هل هي هي هتكون نفس الأسعار للكولت علي اعتبار ان الموتور واحد؟

http://www.nilemotors.net/Nile/showthread.php?t=26263

ولك خالص الشكر والامتنان :k10:

م. طارق، أ. أحمد

كل الشكر والتقدير علي مساعدتكم ومعلوماتكم القيمة وكرم أخلاقكم
أ. أحمد وصلني رد حضرتك بالفعل ولك خالص شكري واعتذاري عن أي ازعاج أكون سببته
وجزيل الشكر ليك م. طارق علي معلومات واسعار قطع الغيار وهي فعل فيها بنود مش عالية اوي ومتفرقش كتير اوي عن عربيات تانية (قطع الغيار الالماني بالمناسبة معمرة جدا يعني حتي لو غالية مش مشكلة هتتجاب مرة واحدة والواحد ينساها زمن طويل)

أنا ذهبت امبارح واتفرجت علي العربية في التوكيل برمسيس

العربية شكلها علي الطبيعة أقل جمالا بعض الشئ مما هي عليه في الصور ولكنها مازالت جميلة بنظري وخاصة بالفعل مدي عمق زجاجها الامامي وبعده عن التابلوه
وفعلا وراني أ. ابراهيم هناك كيفية عمل الفتيس التبترونيك وبالفعل لقيته سهل ويمكن التعود عليه بسهولة جدا (والدتي كانت معايا ومعجبهاش ان العربية في المجمل صغيرة وقالتلي لو كده نزود شوية ونجيب لانسر 1300 احسن واكبر، التفكير المصري بقي اللي دايما بيفضل العربيات السيدان ومالوش تقل علي العربية الهاتشباك ولو اني مازلت شايفاها كوسية ومناسبة لظروف الزحمة والركنة في بلدنا)

بخصوص الكاسيت

امبارح سألتهم علي الكاسيت بتاعها قالولي بالفعل زي ما م. طارق قالي مش بنستوردها بيه علشان هيغلي سعرها لكن فيه حاجة حصلت، ندهولي أستاذ أنا ناسية اسمه وقالي الكاسيت الاصلي بتاعها موجود عندنا وثمنه 2000 جنيه وقالي انه هو راديو كاسيت بس!! لكن لو انا عايزة راديو وسي دي ومشغل Mp3 عندهم حاجة ماليزي انا ناسية ماركتها ايه بمائتي جنيه وشوية، وسواء ده او ده هما ممكن يركبوهالي في الفرع عندهم (رمسيس)، يا تري الكلام ده بجد؟ وهل قام التوكيل مثلا باستيراد الكاسيت الاصلي بتاعها لما لقاه مش موجود في مصر خالص ولا ايه؟
ولما قلتله انا سمعت انه الكاسيت الاصلي بتاع الكولت في حاجات زيادة علشان التحكم في حاجات اكتر بالعربية قالي لأ خالص هو لتشغيل الكاسيت وبس!! (يا تري هو معندوش فكرة عن حاجة ولا ايه؟)

يا تري ايه الصح؟ وهل فعلا الكاسيت الاصلي بتاعها بس راديو وكاسيت مش سي دي؟