السلام عليكم
أولا تحية لجميع أعضاء المنتدي الكرام

أنا لسة مكلمني التوكيل دلوقتي حالا وقالولي ان الميتسوبيشي كولت موديل 2007 اللي لسة فاضلة عندهم بفت دلوقتي 82500

انا كنت بفكر جديا في العربية دي وخاصة اني عارفة ميتسوبيشي يعني ايه كويس أوي من عربيتي الحالية اللي بالرغم من قدمها الا انها بجد زي الفل واستحملت احتمال متستحملوش اي عربية تانية دلوقتي وعارفة انه اسمها لوحده كفاية، ده غير الكماليات الهايلة في الـ Colt لكن فعلا موضوع ركود العربية دي بالذات بالشكل ده واللي يخلي الوكيل ينزل كل شوية من سعرها علشان يخلص منها يخلي الواحد بجد يقلق أوي طبعا من قطع الغيار اللي هتبقي أكيد بالطلب لو العربية حصلها حاجة وكمان بالشيئ الفلاني! وأنا مش هقدر أعيد نفس التجربة مرة تانية مع عربية نادرة ومفيش منها كتير في البلد ودوخ بقي ولف الدنيا والآخرة علشان تلاقي قطع غيار
(عربيتي الحالية ميتسوبيشي جالنت سبور باب واحد بس موديل قديم حبتين تلاتة)

كان فيه موضوع هنا لأستاذ يملك سيارة ميتسوبيشي برده نادرة شوية (مش فاكرة نوعها ايه للأسف ومش قادرة اطلع لينك للموضوع تاني اعذروني) وسأل المهندس طارق زويل عن مدي توافر قطع غيارها لانه مش لاقيها خالص، وتفضل بالفعل المهندس طارق بافادته باسعار قطع الغيار لكن كانت هتيجي بالطلب مخصوص من المخازن في الامارات ولو مكانتش هتبقي موجودة هتيجي من اليابان ودي ممكن تاخد شهر أو شهر ونص علبال ما توصل!!! افتكر كان من ضمن قطع الغيار المطلوبة طلمبة البنزين. طب دلوقتي ماهو لو حصل حاجة في طلمبة البنزين ما هي العربية كده مش هتدور خالص لحد ما تتغير (علي حد علمي البسيط اوي يعني انا مش خبيرة في الميكانيكا)، يبقي افضل قاعدة المدة دي من غير عربية! هو ده الشيئ اللي مضايقني جدا بالنسة للموضوع ده لكن غير كده العربية عجباني وكمان سعرها مناسب ليا اوي.

عموما أنا حبيت اقوللكم السعر الجديد والمهندس الكريم أ. طارق زويل ممكن يأكدلنا مدي صحة المعلومة وكمان مدي صحة تخوفي وقلقي ده واذا كان في محله ولا فيه حلول أنا معرفهاش. وادعولي ربنا يوفقني في عملية الاختيار لسيارة جديدة. ويا لها من مهمة صعبة !!!

آسفة علي الاطالة وسلامي للجميع :k10:

Nour