لعشاق التمبرا

**abdelmessih67** · 10-03-2009 11:13 AM

المشاركة الأصلية كتبت بواسطة mezo73

صباح الفل ياباشا
بالنسبة للكسر اللي انت بتقول علية دة عادي اغلبية التمبرا بتشرخ جزء العدادات من الشمس ودة طبيعي انا كنت فاكر التبلوة هو اللي المكسور انما كدة عادي لان الجزء دة بلاستيك بينشف من الشمس
بالنسبة للاسعار دلوقتي للعربيات مقدرش احددلك اسعار علشان الواحد بسمع حجات غريبة غالبا اللي بيبيع دلوقتي حاجة من اتنين اما متضر للبيع وعاوز فلوس فبيبيع بأي سعر
اوحد عاوز زيرو وبيخلص من القديمة او ان العربية شوربة وصحبها بزحاقها قبل ما تفتح بقها

أهلا يا أخ ميزو , صاحب العربية كان بيدخل تليفزيون 34 بوصة شاريه من السوق الحرية و كان واضعه جنبه على الكرسي الامامي لانه كان شاري حاجات تانية حاططها في الكنبة الخلفية و العامل اللي شايل له التليفزيون زق الكرتونة جامد فكسرت فيبرة التابلوه التي تغطي العدادات و مخرج التكييف و هي التي تثبت بأربعة مسامير الانكيه أعلى التابلوه .

على فكرة بارك لي أنا دفعت العربون أمس و اشتريتها
و فاضل التسجيل و الاستلام اليوم بعد ما فحصتها فحص دقيق في البنزينة

العربية تمبرا موديل 1998 - فضي ميتاليك فابريكة جوة و نصف بره لانها رشة جنب واحد فقط و عاملة 120 الف كيلو و حالة الموتور من 75 الى 80 %
أول يد و صاحبها وافق نهائي على 36.5 الف جنيه
وهو اشترى فيتارا زيرو

**ZALABANY** · 10-03-2009 11:28 AM

ألف مبروك ربنا يباركلك فيها

**mezo73** · 10-03-2009 11:52 AM

1000000 مبروك ياباشا
ولو احتجتني انا في الخدمة
وربنا يديك خيرها ويكفيك شرها

**abdelmessih67** · 11-03-2009 10:23 AM

الاخوة الافاضل ميزو و زلباني

الف شكر على المجاملة , لقد أصبحت تمبراوي بعد بحث مضني على مدى ثلاثة شهور و الحقيقة احساس و قيادة السيارة يختلف كثيرا عن ال 125 كأنني جالس في صالون فخم بدلا من الجلوس على المصطبة .

المهم : لي مجموعة اسئلة و أعذروني لانها بالنسبة لل125 التي قدتها 19 عاما تعتبر طفرة كبيرة و انا مش متعود عليها .

يعني أبسط حاجة امبارح و انا سايقها معرفتش اشغل الراديو اسمع ماتش الاهلي و الاوليمبي في الطريق و ضربت لخمة لدرجة اني ركنت على جنب و اخيرا لقيت زرار التشغيل .

نيجي للأسئلة :

1 - في مروحة بتشتغل لمدة دقيقة بعد ما طفيت الموتور فهل هي نفس المروحة التي تبرد الرادياتير و سربنتينة التكييف الموجودة في مقدمة السيارة وما فائدتها ؟؟؟؟؟؟؟

2 - التكييف ضعيف جدا و اشبه بمروحة عادية فها هذا عادي بالنسبة لتكييف التمبرا ام محتاج فريون و شحن على حسب ما بأسمع ؟؟؟؟؟؟؟؟؟؟

3 - أنا استخدامي للعربية ضعيف لان سيارة الشغل بتعدي علي و بأخرج بالعربية يوم أو يومين بالاسبوع افسح العيال أو للضروريات و باعمل حوالي 200 كيلو فقط في الشهر كله فهل استعمل زيت 3 آلاف كيلو رغم أنني بأعمل ال 3 آلاف كيلو كل سنة مثلا و حسب ما سمعت أن الزيت لايجب ان يتعدى بقاءه بالموتور ستة شهور .

و الا استعمل زيت يتغير كل الف كيلو للتوفير و ساعتها
كده كده هأعمل الالف كيلو في ثلاثة أو اربعة ااشهر ؟؟؟؟

رجاء الافادة لاني متحير بعض الشئ في موضوع الزيت بالذات .

شكرا لكم و دعواتكم مرة أخرى

**ZALABANY** · 11-03-2009 11:04 AM

ألف ألف مبروك يا باشا وربنا يديك خيرها ويكفيك شرها وهي فعلا اختيار موفق بإذن الله
بالنسبه للمروحه عادي جدا انها تفضل شغاله لما تبطل العربيه لأنها بتبقى شغاله على ثرموستات في الرادياتير فمش هاتقف الا لما درجة حرارة الميه تنزل للدرجه المطلوبه
بالنسبه للتكييف هو مش جامد أوي زي الزيرو طبعا بس كويس والمفروض انه بيسقع العربية وفي ناس سمعتهم بيقولوا انه جامد وبيبرد فعلا طبعا ده على حسب حالة الكومبريسور بس الوضع اللي انت بتتكلم عليه كده شكلها محتاجه شحن لأن المفروض انه بيطلع هواء ساقع روح لحد بتاع تكييفات كويس يشيكلك عليه ويشحنهولك
بالنسبه للزيت لو استخدامك بالوضع ده ممكن تحط الزيت 1000بتاع شل هايبقى كويس معاك عشان الزيت ما يفضلش فترة طويله
ملاحظه هامه جدا
نظف الرادياتير وراجع على دورة التبريد والمروحه وخلي عينك على عداد الحراره المفروض درجة الحراره اللي بتشتغل عندها المروحه 90 وأخطر حاجه على العربيه الحراره بس لو انت حاكم دورة التبريد كويس ان شاء الله مش هايبقى في مشكله خالص
وألف مبروك عليك مره تانيه

**abdelmessih67** · 11-03-2009 01:17 PM

أهلا بك يا أخ زلباني و شكرا لمشاركتك القيمة

المشاركة الأصلية كتبت بواسطة zalabany2007

بالنسبه للتكييف هو مش جامد أوي زي الزيرو طبعا بس كويس والمفروض انه بيسقع العربية وفي ناس سمعتهم بيقولوا انه جامد وبيبرد فعلا طبعا ده على حسب حالة الكومبريسور بس الوضع اللي انت بتتكلم عليه كده شكلها محتاجه شحن لأن المفروض انه بيطلع هواء ساقع روح لحد بتاع تكييفات كويس يشيكلك عليه ويشحنهولك

الهوا طالع من الكمبرسور عادي زي الهوا الخارجي فبرجاء لو تعرف حد بتاع صيانة تكييف كويس قوللي .

المشاركة الأصلية كتبت بواسطة zalabany2007

بالنسبه للزيت لو استخدامك بالوضع ده ممكن تحط الزيت 1000بتاع شل هايبقى كويس معاك عشان الزيت ما يفضلش فترة طويله

تعرف الجالون 4 لتر بتاع ال 1000 كيلو يعمل كام يا أخ زلباني ؟؟؟؟؟؟؟؟؟؟؟

المشاركة الأصلية كتبت بواسطة zalabany2007

نظف الرادياتير وراجع على دورة التبريد والمروحه وخلي عينك على عداد الحراره المفروض درجة الحراره اللي بتشتغل عندها المروحه 90 وأخطر حاجه على العربيه الحراره بس لو انت حاكم دورة التبريد كويس ان شاء الله مش هايبقى في مشكله خالص
وألف مبروك عليك مره تانيه

و أنا راجع بيها أمبارح بعد التسجيل من الشهر العقاري
كان الجو حار و الطريق زحمة جدا لكن مؤشر الحرارة عيني عليه و لم يتعدى 90 و لما الطريق بيقى سالك و بأمشي بسرعة عالية بينزل لربع العداد و مع هذا هأغسل الرادياتير الاسبوع القادم .

بالمناسبة هو الافضل استخدام المياء الخضراء مانعة الصدى ثم تزويدها بالماء أم ماء فقط ؟؟؟؟؟؟؟؟؟ الباشا
الميكانيكي بتاعي بيقول أن المياه الخضراء بتأكل في الحديد و تأثر على الموتور فهل كلامه صحيح ؟؟؟؟؟

**mezo73** · 11-03-2009 01:29 PM

بالنسبة للزيت انا مش معاكم
لازم تحط زيت يكون سوبر يعني من الزيوت الخفيفة
علي سبيل المثال في زيت تعاون جركن لونة كحلي وسعرة مش غالي يعد معاك 3000
اوجركن لونة لبني ارخص شوية يعد معاك 2000 وممكن تغيرة علي 2000 كم او شهرين ايهما اقربودة يكون حل مثالي
بالنسبة لباقي الحجات التانية الاخ زلباني رد بما فية الكفاية
المهم اية رأيك في القاعدة في العربية من قدام والكرسي اللي جنبك لو رجعتة للاخر وقعدت علية وانت مسافر وفي حد تاني سايق
علي فكرة اضطريت مرة اني انام طول اليل علي الكرسي وكان مريح جدا
اوعي فكرك يروح لبعيد ماكنتش مطرود من البيت

**mezo73** · 11-03-2009 02:01 PM

الاخ الميكانيكي بتاعك ربنا يسامحة علي جهلة
اي عربية زيرو بتبقي جاية بالمية الخضرا او الحمرا
الكلام العلمي بيقول مياة +حرارة+ معدن= تأكل للمعدن
والمياة الخضراء فيها مانع اكسدة وهو دة اللي بيسبب تأكل لاجزاء الموتور + فيهامادة بتقلل درجة الحرارة
في حاجتين مش عاوز انساهم
الاولي لو مياة خصرا فية علبة صاج زي بتاعت اللبن النيدو اسمها كولار
امريكاني انا مش فاكر سعرها هي في حدود 25 ج لونها ابيض ومكتوب عليعا بالاخضر ودي في منها مياة لونها اخضر اومياة بدون لون
طريقة اسخدامها بتفضي دورة المياة بالعربية ويتم غسيله ويتم اغلاق الدورة ويتم اضافة الكولار ثم يتم تزويد المياة حتي القربة
الحاجة التانية المهمة جدا جدا
هي بعد ماتعمل الكلام دة لازم تفرغ الهوا من دورة التبريد
في عندك خرطوم رفيع في حاجة مدورا تلفها تلقيها بتتفتح وتطلع فقاقيع
وفي واحدة تانية في الريداتير

**ZALABANY** · 11-03-2009 02:11 PM

المشاركة الأصلية كتبت بواسطة mezo73

الاخ الميكانيكي بتاعك ربنا يسامحة علي جهلة
اي عربية زيرو بتبقي جاية بالمية الخضرا او الحمرا
الكلام العلمي بيقول مياة +حرارة+ معدن= تأكل للمعدن
والمياة الخضراء فيها مانع اكسدة وهو دة اللي بيسبب تأكل لاجزاء الموتور + فيهامادة بتقلل درجة الحرارة
في حاجتين مش عاوز انساهم
الاولي لو مياة خصرا فية علبة صاج زي بتاعت اللبن النيدو اسمها كولار
امريكاني انا مش فاكر سعرها هي في حدود 25 ج لونها ابيض ومكتوب عليعا بالاخضر ودي في منها مياة لونها اخضر اومياة بدون لون
طريقة اسخدامها بتفضي دورة المياة بالعربية ويتم غسيله ويتم اغلاق الدورة ويتم اضافة الكولار ثم يتم تزويد المياة حتي القربة
الحاجة التانية المهمة جدا جدا
هي بعد ماتعمل الكلام دة لازم تفرغ الهوا من دورة التبريد
في عندك خرطوم رفيع في حاجة مدورا تلفها تلقيها بتتفتح وتطلع فقاقيع
وفي واحدة تانية في الريداتير

كلام سليم 100 % وأحب أزود عليه ياريت الميه اللي تزودها تكون ميه مقطره على ما أظن إن الميه المقطره بتكون خاليه من الأملاح اللي ممكن تأثر على الموتور ودورة التبريد الإزازه ب 2 جنيه
بالنسبه للزيت أظن ال 1000 بيعمل حوالي 60 جنيه بص بصراحه أنا مش عارف موضوع ان الزيت لو قعد فتره طويله في العربيه حتى لو ما كانتش بتستخدم ممكن يضر في حاجه ولا لا على العموم إنتظر الردود من الإخوه بخصوص جزئية الزيت وأكيد حد هايفيدك وخصوصا المهندس أحمد su وجاليليو باشا
بالنسبه للتكييف بصراحه ياباشا مش عارف حد لأني لسه ما شحنتوش لحد دلوقتي وكنت ناوي أنزل موضوع أسأل الإخوه عن أحسن حد في إطار الهرم أو فيصل لأني ساكن هناك

**abdelmessih67** · 12-03-2009 10:12 AM

أهلا يا اخ ميزو

المشاركة الأصلية كتبت بواسطة mezo73

بالنسبة للزيت انا مش معاكم
لازم تحط زيت يكون سوبر يعني من الزيوت الخفيفة
علي سبيل المثال في زيت تعاون جركن لونة كحلي وسعرة مش غالي يعد معاك 3000
اوجركن لونة لبني ارخص شوية يعد معاك 2000 وممكن تغيرة علي 2000 كم او شهرين ايهما اقربودة يكون حل مثالي

الحقيقة أنا على معدل استهلاكي الحالي بأعمل 400 كيلو في الشهرين لما حبيبة قلبي تكمل اربعة سنوات هأدخلها الحضانة و ساعتها هأستعمل العربية يوميا لكن حاليا لو هأضطر أني اغير الزيت بعد شهرين يعني الزيت اللي بيمشي 2000 أو 3000 كيلو اغيره بعد 400 كيلو فقط ..........اليس في هذا تهدير ؟؟؟؟؟؟؟

لهذا كنت اسأل عن زيت يتغير كل الف كيلو فقط علشان مهدرش زيت لم يستخدم .

بالمناسبة يا اخ ميزو في مشكلة لو قعد الزيت في الموتور مدة أطول من ال 3 اشهر ؟؟؟؟؟؟؟؟؟؟؟؟؟؟

يعني مثلا انا باعمل حاليا ال 3 آلاف كيلو في سنة ممكن أسيبه سنة أو حتى 6 شهور أهو استفيد بيه شوية

رجاء الافادة .

المشاركة الأصلية كتبت بواسطة mezo73

المهم اية رأيك في القاعدة في العربية من قدام والكرسي اللي جنبك لو رجعتة للاخر وقعدت علية وانت مسافر وفي حد تاني سايق
علي فكرة اضطريت مرة اني انام طول اليل علي الكرسي وكان مريح جدا
اوعي فكرك يروح لبعيد ماكنتش مطرود من البيت

بصراحة مقارنة بال 125 كأنني كنت قاعد على المصطبة و بعدين انتقلت للجلوس على انتريه شيك و بعدين العربية ماشاء الله ناعمة و مابتخبطش في المطبات
على عكس ال 125 , بالمناسبة هل هناك تغيير في نظام التعليق و السوست عن الفيات القديم زي 125 .

بالنسبة لموضوع النوم أنا مجربتوش لكن فكرة كويسة أجربها في أول خناقة بيني و بين المدام