اقتباس المشاركة الأصلية كتبت بواسطة shrifelmasry مشاهدة المشاركة
يا مشمش باشــا كتر الف خيرك على الاهتمام و سرعة الرد
انا بدور على تجارب للاخرين : رايهم ، عيوب ، مزايا ، ملاحظات ، اختبار الامان فيها و التصادم ، اهم مشاكل ظهرت فيها ، التوكيل اخبارة اية معاها .
عموما انا كتير اتبسطت بردك و اهتمام و لك الف تحية و شكر .
شكرا على ردك الحلو يا شريف
بس ممكن بلاش مشمش باشا ولا بيه يا سيدى مشمش حاف وعلى رأى الليمبى المرة الجايه تبقى بالجبنة أو بالبيض

واحنا هنا بنكمل بعض ...
وبخصوص استفسارك على العيوب والمميزات فإن شاء الله العربيات دى رغم انها صينى إلا أنها أفضل وأفخم وأعرق سيارة فى الصين بجانب انها اعتماديه جدا وممتازة وده مش مجرد كلام ده وااااقع ودليل كمان على كده الضمان ليها خمس سنوات ودى أطول فترة ضمان فى مصر وبدون حد أقصى للكيلومترات وتضمنها الشركة البفارية فى مصر وتصنع فى مصنعها اللى هو بينتج السيارات البى إم دبليو اظن كل ده يطمنك جدا...
بخصوص اختبارات الأمان والتصادم فالمسألة دى فى رأى نصيب فى الأول والآخر وربنا يستر علينا ويكفينا شر الحوادث فكل العربيات دلوقتى فى السوق تدخل الحادثة بتتعجن فمتخليش المسأله دى تشغلك كتير لأن ربنا هو الستير بس العربيات دى متينه وصاجها جامد وفيها ايرباج وخليها على الله.
أما التوكيل بقه فرااااائع ودى حاجة لمستها بنفسى وحقولك ازاى ,الحمد لله ربنا أكرمنى واشتريت FRV وبصراحة عربية ممتازة جدا واسعه وشبابية ورياضية وتقفيل ممتاز وتسارع وثبات وشيك ما شاء الله ..
بس كانت عندى طقطقه فى حالة الفرمله لما ادوس عليها جامد بسمعها وكنت شارى السيارة من أبوغالى ومستلمتش الضمان لسه فرحت مركز خدمة أبوغالى الناس هناك استقبلونى وخرج معايا مهندس وجرب العربية وقاموا مكيسين العربية من جوه وبعد ساعة جالى المهندس وقالى فى مشكلة فى سوستة الفرامل وده عيب بسيط بس لما كلم البفارية عن المشكلة أخبروه انى لازم ارحلهم وهما يحلو المشكلة وعملولى حجز وانا قاعد فى اليوم اللى يناسبنى والساعة اللى تناسبنى وفى اليوم المحدد رحت البفارية واستلموا العربية وكيسوها برده وبعد ساعة ونصف سلمونى العربية زى الفل بعد تصليح المشكلة ولاحظت انهم لمو كل اللى فى العربية وحطوه فى شنطة العربية للمحافظة عليها والأهم ان الزيارتين والتصليح والفحص كله مجانى وبكل احترام..ايه رأيك..
فلو العربية عجباك استخير واتوكل على الله .