الموضوع: افيدوني في شراء الميجان 2005

معلش كنت عايز برضو اعرف استهلاك البنزين فيها وبعدين انا قريت الموضوع الي عامله الخ شاركي عن التكنولجيا الي في العربيه بجد عقدتني فا كنت مقلق يعني بعد كل الحاجات ديه هل بتبوظ بسهوله ولا ايه و هل لو جر فيها حاجه لازم التوكيل ولا في ناس شغاله فيها و معلش انا بسافر بالعربيه العزبه مره كل اسبوع و يمكن مرتين طريق وحش شويه هل العربيه تستحمل ولا ايه معلش يا جماعه العربيه عجباني بس انتوا عرفين المصرين واحد بيقولي الكارت لو باظ العربيه لازم تروح فرنسا فاطمنوني انتوا عشان اتكل علي الله

المشاركة الأصلية كتبت بواسطة renault monster

انا هجاوب عليك على قد الي اعرفه والي ما اعرفوش الوحوش مش هيقصروا معاك

1-السعر: لا اعلم
2-الرفارف الفيبر: والله ما جربتش تتكسر بسهوله ولا لا علشان لسه ما عملتش حادثه(لا قدر الله)
3-الميكانيكية: كتير والحمد لله وفي ناس كتير تفهم في الرينو مع العلم انها مش معقدة (والوحوش هيفيدوك أكتر لأنهم عايشين في مصر)
4-استهلاك البانزين: بالنسبه ليا فوووق الممتاااااااز (مع العلم اني بستخدم 95)
5-التكنولوجيا(الكمبيوتر): مريح جدا بس خد بالك مش أي حد يشتغللك في كهرباء العربية ,, حتى الفيوزات وديها لواحد بيفهم ,,... لأني مره وديتها عن واحد علشان يغير فيوز فك الفيوزات كلها وقعد يركب الفيوزات في اماكن غلط وعملي قلق.
6-التوكيل:ممتاز وزي ما قلتلك فوووق الميكانيكية كتيييييير.
7-العربية تستحمل: العربية حلوة جدا في طريق السفر :)....
8-الكارت: من قال لا أعلم فقد أفتى.

والف مبروك مقدما

وانتظر من الوحوش يردو عليك ممكن في حد يكون رأيه يختلف عن رأيي

الف الف الف شكر يا ريس علي اهتمامك اصلا انا بقارن بينها و بين الوبل فيكترا موديل 2001 او 2002 يعني رينج ال 75 بس انا مش حتابع مع التوكيل علي طول و لا هي صيانه التووكيل بتكون مكلفه مش عارف صراحه تومستني بقيت الشباب

المشاركة الأصلية كتبت بواسطة mbisar

انا بردو يا باشا هرد باللى اعرفه
1- السعر : لو بنتكلم على موديل 2005 يبقا بنتكلم من 70 لحد 80 ده بفتحه سقف و معظم الرينو 2005 و 2006 هتلاقيه بفتحه سقف
اما لو 2006 يبقا بنتكلم من 80 لحد 90 حسب حاله العربيه و 90 ده يعتبر كتير يعنى تبقا حلوه ب 85
2- اما بالنسبه لقطع الغيار : فهى متوفره طبعا فى التوكيل اللى فى الكيلو 24 و فى ناس كتير شغالين رينو عندنا فى اسكندريه ( خصوصا فى السيوف فى 3 بيشتغلوا رينو بس )
3- و بالنسبه لأنها معمره ولا لأ فأنما مش من ملاك الرينو بس عندى ناس صحابى عندهم رينو كتير و اعرف منهم ان قطع الغيار معمره و كويسه جدا
4- بالنسبه لموضوع الرفارف بردو على حسب معلوماتى من معارفى اللى عندهم العربيه معندهومش اى مشكله فى الرفرف و على حسب كلام الوحوش هنا فى المنتدى بردو ان الرفارف مفيهاش مشكله و بالعكس رفارف الرينو عمليه جدا
5- بالنسبه لأستهلاك البنزين معقوله جدا و مش هتضايقك اوى
6- بالنسبه للقلق من التكنولوجيا : الموضوع موضوع ان العربيات فئات زى ما حضرتك عارف بمعنى ان اكيد الرينو مش زى الدايو و الهيونداى و الكورولا ( القديمه ) و اللادا و الحاجات دى مفيهاش تكنولوجيا فمش هتزعلك فى حاجه و اى حد ممكن يتشغل فيها اما الرينو فزى المرسيدس و البى ام و الباسات و السكودا و العربيات اللى فيها رفاهيه اكيد ليها تمن وهو انها مش اى حد يفهم فيها و مينفعش تتعامل معامله العربيات الأقل تكنولوجيا و رفاهيه
7- بالنسبه للطرق : العربيه فى السفر مريحه و حلوه + انها عربيه عاليه عن الأرض مش هتحك فى كل مطب يعنى هتستحمل معاك بس فى نفس الوقت مش عربيه تشد و تفرك و تخمس بيها لأ هى عربيه عائليه شيك فخمه محترمه لازم تتعامل معاها باحترام و امشى زى مانت عايز بس ما دمت بتعملها الصيانه فى التوكيل كل 10 الاف كيلو وبتحطلها بنزين مناسب يعنى انا مثلا بحط فى اللانوس بنزين 80 لكن لو معايا ميجان هحط يا 92 او 95
8- بالنسبه لموضوع البطاقه : هى مش بتبوظ بسهوله يعنى قويه جدا و بعدين لو حصلها حاجه افتكر فى التوكيل بتتعمل ب 1450 تقريبا الله اعلم يعنى سعرها تقريبا زى سعر اى مفتاح مشفر فى عربيه جديده محترمه
9- نصيحه اخويه : لو حضرتك عايز عربيه حلوه و شيك وسعرها كويس و رفاهيه عاليه و قويه خليك فى الميجان بس لازم تلتزم بأنك تعملها الصيانه فى التوكيل و تحافظ عليها و تهتم بيها ، اما اذا كنت عايز عربيه تعملها صيانه فى اى حته و معندكش وقت انك تهتم بيها و متقلقش عليها يبقا ممكن تجيب كورولا مستعمله 2005 مثلا او نيسان صنى زيرو او الأوبل بردو الفيكترا زى ما حضرتك قولت
وربنا يوفقك للى فيه الخير

الف شكر يا كبير مش عارف اقولك ايه والله انا بدور اهوه و ربنا يسهل

1-السعر: من 70 الف إلى 80 حسب الحالة و الموديل
2-الرفارف الفيبر: عملية جدا فى الحوادث الخفيفة لإنها بترد تانى زى الإكصدام عكس الرفارف التانية إللى بتخش لجوه و بتحتاج تتسمكر علشان ترجع لشكلها الأصلى
3-الميكانيكية: فيه عندك التوكيل و مراكز الخدمة أفضل ناس بتفهم فيها
4- قطع الغيار : متوفرة فى التوكيل و يوجد البدائل زى التركى و الأسبانى فى شارع دمشق و يوجد الأصلى الإستيراد فى الحرفيين بسعر أقل تقريبا نصف من سعر التوكيل
4-استهلاك البنزين : تقريبا فى حدود 10 لتر لكل 100 كم
5-التكنولوجيا(الكمبيوتر): لا تقلق منها طالما حتحافظ على الصيانة الدورية للسيارة
6-التوكيل:من أفضل التوكيلات فى مصر
7-العربية تستحمل: تستحمل فى حالة المحافظة عليها و المتابعة الدائمة للصيانة الدورية
8-الكارت: نادرا لما بيبوظ و سعره فى التوكيل 1500 جم و هو نفس سعر أى مفتاح مشفر لنفس فئتها من السيارات الاخرى

من الاخر الميجان طول ما حضرتك محافظ على صيانتها الدورية و محافظ عليها حتستمر معاك بدون مشاكل

لو حضرتك عايز تعرف معلومات أكتر عن الميجان و أسعار قطع غيارها و مشاكلها و مميزاتها من ملاكها
ممكن تشوف الموضوع دا
http://www.nilemotors.net/Nile/showthread.php?t=24062