هل السيارات الكورى المعمرة؟؟؟ يعنى هتعيش قد إيه قبل ما تضطر فعلا تغير؟؟؟
و هل ممكن تتكهن بعد 10 سنين من الشراء؟؟
عرض للطباعة
هل السيارات الكورى المعمرة؟؟؟ يعنى هتعيش قد إيه قبل ما تضطر فعلا تغير؟؟؟
و هل ممكن تتكهن بعد 10 سنين من الشراء؟؟
نعم معمر .... لو اتكلمت عن القديم اعرف واحد معاه اكسيل 96 اوتوماتك لحد دلوقتى و شغاله معاه الحمد لله...ده بالنسبة للقديم و الإكسيل اصلا عربية مش بحبها خاااالص... ما بالك بالحديث اللى اصبح منافس قوي لليابانى ؟؟
انا شايف انها كويسه و اعرف عربيات اكسنت موديل 99 و 98 و ماشيه زى الفل
موديلات الاكسيل والالنترا والدايو ريسر بقالها 15 سنة وشغالة
البوني
بقالها عشرين سنه و شغاله تاكسي
بس انا قريت مشاركة للعضو الفاضل أبو عبد الله بيقول إن الصاج مش مجلفن و ده بيقلل عمره الإفتراضى ... يعنى حاجات زى دى بتقلل من عمر العربية
بص شوف العربيات الكوري حا تلاقيها حواليك من كل حته وأنت تعرف أجابة السؤال
انا كان معايا كيا برايد و اخدتها زيرو
وقعدت معايا 10 سنين و بعتها و هى زى الفل
ومعملتش معايا اى مشكلة عويصة فى الفترة دىكلها
الكوري في كل مكان
السؤال أتسأل غلط !!! ليه !!!؟؟
علشان أنا ممكن أشتري عربية تقعد معايا 20 سنة و أعمل بيها 100 ألف كم فقط
يبقى السؤال الصح
العربية الكوري بتقعد كام ألف كم ؟؟
و برضه مش هايبقى سؤال صح .... ليه ؟
علشان برضه الموضوع راجع لطريقة السواق
فيه ناس رجليها تقيلة على المكنة ............. و ده هايقصف عمر أي مكنة ( أوروبي أو ياباني أو كوري ) في وقت أقصر من الناس المحافظة
و فيه ناس بتعمل صيانات دورية في مواعيدها و بتحافظ على العربية
طيب خد عندك شوية الأرقام دي
هيونداي النترا 260 ألف .... بدون أي عمرات ( بس صاحبها حساس قوي و مش بيسيب حاجة في العربية تبوظ إلا و يغيرها في التوكيل على طول )
دايو لانوس 188 ألف ... بدون أي عمرات ( تم تغيير العفشة مرة وواحدة فقط ) صاحبها مهمل في الصيانات و لكن سواقته حريمي خالص .
هيونداي النترا تانية عاملة 170 ألف بدون أي مشاكل .
تعالى بقى نتكلم عن شوية عربيات ياباني ( و على رأي المثل المصري - إن فاتك الياباني مش هايرجع تاني - :U_thin1[1]: )
عربية لانسر ياباني ...... على 160 ألف و غيرت وش سلندر و كباسات و شوية حوارات .... ( صاحبها مهمل في صيانتها و مرة ساب الزيت بتاع 5000 كم قعد في الموتور لغاية 12000 ألف ..... و كمان رجلية تقيلة قوي على الموتور و من الأخر سواقته وحشة جدا )
و فيه أمثلة كتير
أنا ضربت الأمثلة من الواقع الحياتي علشان أبين نقطة مهمة
أولا أن عُمر العربية بيتوقف على طريقة عناية صاحبها بيها و طريقة سواقته كمان .
ثانيا كوريا الجنوبية دلوقتي منتجاتها ... تقف رأس برأس لمنتجات اليابان في الجودة
و إلا مكنتش وصلت لأكبر منتج سيارات في العالم مع الدول الكبيرة مثل اليابان و أمريكا و فرنسا و أيطاليا و ألمانيا
كوريا بتديك كل الموديلات ...... من أول كيا بيكانتو .... و هيونداي فيرنا ..... لغاية الموديلات الفخمة
و كله بثمنه
أما موضوع ياباني و كوري ........ دي عقدة مصرية بحتة ...زي عقدة الخواجة
أنا معايا excel موديل 95 وبعاملها أوحش معاملة ...
ما بيغيرش زيت (بنسي:B4_556:)
ما بهتمش بالكوتش
ما برحش اعمل صيانة
ببهدل النقلات (وصلت اني بنقل من غير ما ادوس دبرياج)
ما بعملش اي انواع من الفحص ليها
وبصراحه العربية مستحمله كويس بطريقة انا مستغربلها ....دي لسة بتشد شويه !!!!!:E_braces[1]:
السيارات الكورى اللى كانت فى البدايات زى الاكسيل والاكسنت ممتازه وبتادى بكفاءه طبعا مع الاستعمال المعقول مابالكم بالاجيال الجديده اللى ماتفرقش على اليابانى زى الالنترا والنيو اكسنت والسيراتو بجد مع الاستعمال الجيد والصيانه الدوريه هتعمر اخر حاجه
على حسب سواقتك لو هادى يبقا معمرة لو غير كدة فليست معمرة
معانا لانوس 2000 عامله 235 الف ك من غير محد يمد ايدو فى الماتور
و كان فى صوره لانوس عامله مليون ك كان أ.محمد ممدوح عرضها اكتر من مره
معمره وده برده راجع للاستخدام
اهتم بصيانة الكورى وحافظ عليها مش حتفتح بقها لحد 5 سنين
مع الشكر
معمره حسب استخدامك
السيارات الكوري معمرة وجودتها في القترة الاخيرة زادت بشكل اذهل العالم وخصوصا هيونداي التي تنافس شركة بي ام ولكزس
باصدار هيونداي جينيسيس.
اكتر عربيات بتتعمل تاكسي في السعودية هي الهيونداي سوناتا والالنترا والاكسنت وده يدل على مدى تحملها للظروف القاسية
وطول فترات التشغيل.
والله انت لو معاك عربيه المانى واهملت فى صيانتها مش هتعمر....
لو معاك اسبرانزا وبتصونها وتحافظ عليها هتعيش اكتر من الالمانى اللى بقول عليها....
العمليه عمليه محافظة على الشىء والصيانات الدوريه لها دور كبير جدا فى الموضوع دة
واللة انا شايف ان العربيات الكورى التسعينات اللى اتعامل كويس معاملة بنى ادمين شغالة وتشوفها ماسكة نفسها بفبركتها
واللى اتعملت معاملة قاسية جابت مكن لو على قد شد وحرق بهبل والناس سقتط مكن تانى ورجعت اشتغلت زى اخواتها التانيين
وفية بقى عربيات المعاملة بتاعتها مش معاملة ادمية زى الايجار مثلاعشان كدة هتحتاج تغير كل حاجة عشان ترجع عربية وانت وحظك بقى فى الموضوع دة
وانا شايف ان اى عربية هتتعامل بأى طريقة من دول هيكون هو هوا الناتج بتعها
يبقى كدة الكورى حققت المعادلة الصعبة وقدرت انها توصل للألمانى واليبانى
ما بالك بقى بثورة الموديلات الكورية بأضافة الماليزية اللى عملت انقلاب للسوق اليبانى و الالمانى
اما الصينى فادة لسة ما اسبتش اى نتيجة ومحتاجلة فترة 10 او15 سنة عشان يقدر يتحكم عالية زى الكورى وتكون تقييمة على تجربة جيدة
انا رايى ان عندك عربية كأنك فاتح بيت مسؤالة منك بقى فى اى شىء هتراعيها هتراعيك بس كدة
صح العربية لو حفظت عليها هتعيش لو محفظتش عليها يلا السلام
فعلا العربيه الكوري معمره جدا بس علي حسب استخدام صاحبها
لو ازلنا طريقة القيادة الخاطئة والاهمال فى الصيانة نجد ان الكورى بصفة عامة معمر جاد
لو قارنتها بالعربيات الصينى مثلا هتبقى معمره جداً بينما لو قارنتها بالالمانى هتلاقيها عمرها قصير. هو اللى انا لاحظته بصراحه ان الكورى لما بيتبهدل ما ينفعش فيه شد يعنى لا يمكن يرجع شكل الزيرو تانى زى المرسيدس و البى ام القديم بس اللى بيطول عمر العربيه كمان غير جوده مكوناتها الحفاظ و الاهتمام بالعربيه و دى نقطه مهمه جداً يعنى لو الزيت خلص فى اى عربيه مهما كان نوعها اكيد موتورها هيقفش الموضوع. مش. سحر يعنى
بس فى المجمل هى كانت كويسه اول ما طلعت كسعر مقابل الامكانيات لكن اليومين دول سعرها بقى مبالغ فيه جداً
اي عربية حسب الاستعمال
حتي لو كانت ايه
انت ممكن تجيب عربية الماني وتديها لشاب حلو
وسبها معاه سنة
واتفرج علي المعمرة
وممكن كوري بيتحافظ عليها وما شاء الله عروسه
انا بقى ليا مقياس تاني
وهو قصدك بكلمة معمره
لو قصدك انها هتكون ماشيه وبتروح وتيجي ايوه
لكن تعالى نحسب الموتور هيفقد كام من قوته
الشاسيه هيفكك من بعضه كمان قد ايه
طبعا ده بفرض الاستخدام العادي زي ماقاللك الأخ الفاضل
اما بالنسبه لجزئية التاكسي في السعوديه
فاللي بيجيب تاكسي وهو عامل حسابه انه سنتين وهيترمي في الزباله بيجيب كوري
اربع او خمس سنين وهيترمي في نفس الزباله بيجيب ماكسيما او كامري
لكن على العموم كده لأ مش معمره تماما وعمرها الافتراضي قليل جدا
طيب ما احنا عندنا 128 وسيات لسه ماشيين بالبركه
يبقوا معمرين ؟ لأ طبعا احنا بس بنتحايل على الظروف عشان نمشيها
وتشكر الحكومه اللي خلتنا نشغل دماغنا برضه هههههه
لكن مثلا انا اعرف واحد عنده لانوس ووالله مش بيستخسر فيها حاجه
واي قطعه بيجيبها اصلي
وكل شهر او اتنين يطلع فيها حاجه عايزه تتظبط, طبيعي العربيه موديل 2003
لو ماصرفش عليها كل ده واسترخص برضه هتمشي مش هتقول لأ على فكره
بص لو عايز تقيسها تجرب عربيه كوري مثلا وواحده حاجه تانيه
الاتنين تكون سوقتهم وهما جداد وسوقهم دلوقتي
على افتراض انهم مش متهانين
وشوف الفرق
احنا اللي عملنا كده في نفسنا يافندم
عرض وطلب
لما توصل ان الانترا (المفروض انها كامله) ديسكات قدام بس وفقيره جدا في كل شئ ومافيهاش فرق عن اللي قبليها غير الشكل والفتيس انها تتباع ب 160 الف ونشتريها يبقى نستاهل
ولما بالتبعيه الفيرنا توصل 100 ألف كمان شويه يبقى عادي جدا
اسمح لى اختلف مع حضرتك لان بصراحه ما اعتقدش هو ده السبب اللى أدى للارتفاع الرهيب ده فى اسعارها. جزء كبير من السبب هو قله وعى المستهلك و السطحيه فى التفكير و التقليد و الاهتمام بالشكل على حساب المضمون و عدم وجود رقابه كمان على اللى بيستورد فبيخللى التوكيلات تجيب اى حاجه و تعرضها بالسعر اللى على مذااجها و النقطه الاخيره دى تحديدا على كل الانواع مش كورى بس
معمرة اية بس ياجدعان
انا عندي عربية بي ام موديل 35 هشتريها ب20 لو ضايعة خالص واصرف عليها 10 او 15 وهتبق اجمد عربية وتعلم علي اي عربية كوري او يباني
انا مش عارف بجد ثقافتنا راحت فين وبيتدحك علينا كدا ازاي
ازاي يعني الالنترا الورق الجديدة دي تبق ب160 الف لية يعني دي متسواش في نظري ربع تمنها
الي يشتري عربية كوري تمنها 160 بصراحة يبق تفكيرة فية حاجة
انا عن نفسي قريب جدا هشتري عربية بي ام كوبية فاضية وفيها موتور 2000 عايزة بس تترش وتتفرش هشتريها ب20
وصاجها وشاسيها زي الفل ولو صرفت عليها 20 ودا مبالغ فية جدا هتبق عربية وهمية وهتبق واقفة كل حاجة اقل من 50 الف ووريني اجدع عربية صيني او كوري او ياباني تتقارن بيها ساعتها او تقرب من الاداء بتاعها حتي
الي يخليني اجيب عربية ب160 وتعتبر فاضية اعمل بربعهم تحفة علي مزاجي ومحدش راكب زيها
انا عايش في الامارات و المعروف هنا ان العربيات بتنتهي بسرعة يعني مسافات كتيير و تكييف علي طول المفاجئة اني بشوف عربيات دايو لانوس 1 و ماشية زي الفل