امبارح كان يوم اعجب من العجب روحت البيت في 3 ساعات

**أشرف العدوي** · 25-02-2009 12:36 PM

مع ان المشوار في العادي بياخد ساعة او ساعة و ربع

من الصبح و انا رياح الشغل الناس كلها بتكسر عليا مش عارف ليه

المرايات الجانبية اتخبطت حوالي 7 مرات
المحور واقف وقفة منيلة
نزلت من المحور على الصحراوي الطريق وقف فجأة و الحمد لله لميت نفسي بسرعة و فوجئت ان مافيش حاجة كانت موقفة الطريق

قعدت في الشغل لحد الساعة 7 و قولت اكيد المحور بقى فاضي دلوقتي و نزلت
الطريق فعلاً حلو
انا دايماً بمسك الشمال على المحور و بمشي بسرعة 90 عند الردارات و 100 او 110 بين الردارات و لو حد قلبلي نور بعديه عادي
المهم فوجئب بعربية 128 و عربية كيا ريو ماشين 60 تقريباً المهم قلبت لبتاع الريو فاضي الطريق
جيت بقى لبتاع 128 هو كان شماله فاضي بس ما يعديش عربية كأنه كدة ماسك حارتين
قعدت اقلبله نور مافيش فايدة روحت مشغل العالي على طول راح واخد شمال اكتر
المهم اديت اشارة و عديت من يمينه و حاولت افهمه ان الحارة الشمال للتخطي فقط و انه ممكن ياخد اليمين و يجب بطانية و نبقى نصحيه قبل ما يوصل ادايق قوي لما قولتله كدة

نيجي بقى للمهزلة الكبرى شـــــــــارع جامـــــعة الدول العربية
الحمد لله الشارع واقف من أوله لأخره
كأن مصر كلها في جامعة الدول بدون مبالغة
مابقتش عارف اروح فين
المهم انا كنت في اقصى اليمين و عديت اول يو ترن
حاولت اخد شمال شوية علشان الحق اليو ترن التاني الي قبل شارع البطل احمد عبد العزيز
المهم بقيت في تاني حارة بالعافية الكلام ده تقريباً خد ساعة في جامعة الدول بس
لقيت واحد كبير و لابس ايس كاب شكله مش مريح
و عمل الي كنت خايف منه
جه و راح واقف قدام الفتحة بتاعة اليو ترن
المهم كنت بشاورله بأيدي اني هدخل و هو كدة كدة طريقه واقف
مافيش فايدة الغباء الأذلي تكمن منه و راح قارص و ووقف قدام الفتحة و انا واقف تقريباً بعرض الشارع
فضلت واقف عمودي عليه حوالي 20 دقيقة
لحد ما العربية الي قدامه مشيت شوية روحت لافف من وراح و قعدت اجيب قدام و ورا لحد ما عديت منه
و الحمد لله الناس استحملتني
كل ده في شارع جامعة الدول
المهم خفت ادخل من الدقي روحت لافف من العجوزة على الجامعة و بين السرايات الطريق كان مقبول يعني كان ماشي في حتت و حتت لاء
المهم بفضل الله وصلت شارع السودان المؤدي لفيصل
انا ساكن بعد الكوبري على طول
جيت ادخل لقيت الحتة واقفة و مش باين لها مشيان قبل ساعة ( الساعة كانت 9.30 )
المهم فضلت ماشي في فيصل لحد شارع العشرين
و لفيت من شارع اسمه المساكن و رجعت لاول فيصل من جوة
و وصلت تحت البيت
لقيت عربية راكنة مكاني و راكنة راكنة مش الي هية خالص
روحت سايب العربية في نص الشارع و طلعت و قولت للبواب لما صاحب العربية يجي ابقى قولي علشان اركن
لسة بكلمه لاقيت ناس بتزمر و يا كابتن انت قفلت الشارع ( انا كنت ما صدقت وصلت تحت البيت اصلاً )
قولتله معلش اعمل ايه
المهم البواب عمل اتصلاته و عرفنا صاحبة العربية و جت شالتها و هي معدية من جنبي
خبطتلي المراية و حكتلي في الأكصدام
الحمد لله على قد كدة

الناس هتقول انا كاتب الموضوع ده ليه
مش عارف بس نفسي اعرف كان في ايه امبارح
يعني حادثة جامدة
المترو كان عطلان
اي سبب
لان الوضع كان غير طبيعي بالمرة
و شكراً
و أسف لو كنت ضيعت وقتكم في قراية حكاية طريقي إلى البيت

**Imhotep** · 25-02-2009 01:14 PM

فعلا امبارح كان مش طبيعى..... شارع الهرم كان واقف وقفة مش طبيعية.
انا كمان بستخدم المحور.... والمشكلة انه النهاردة الصبح كان واقف من قبل المكان المعتاد وهو قبل التقاطع مع الدائرى بكتير اوى....
المشكلة الحقيقية بقى ان ده بيبقى عادة مؤشر على ان باقى اليوم هيبقى زحمة برضه.
ارجوك اخلف ظنى يا رب

**أشرف العدوي** · 25-02-2009 01:34 PM

فعلا امبارح كان مش طبيعى..... شارع الهرم كان واقف وقفة مش طبيعية.
انا كمان بستخدم المحور.... والمشكلة انه النهاردة الصبح كان واقف من قبل المكان المعتاد وهو قبل التقاطع مع الدائرى بكتير اوى....
المشكلة الحقيقية بقى ان ده بيبقى عادة مؤشر على ان باقى اليوم هيبقى زحمة برضه.
ارجوك اخلف ظنى يا رب

فعلاً انهاردة كمان كان زحمة فوق الطبيعي
ربنا يستر ( واضح ان طريقك نفس طريقي )

انا بخلص شغل الساعة 5
بتعمد اتأخر على قد ما اقدر علشان الزحمة تكون خلصت
يعني بتمشى في كارفور
اخل اون زا رن
اقعد في اي حتة لحد الساعة 7 او 7.30 و بعد كدة افكر اروح
ربنا يستر انهاردة

**أبو إياد** · 25-02-2009 01:38 PM

بص بقا انا لو رايح التواليت لازم اعدى من شارع جامعه الدول هو فعلا بيكون غلس جدا وبيت الحاجه بقا تقريبا فى المنطقه اللى انت ساكن فيها بصراحه الله يكون فى عونك وعوننا جميعا

**أشرف العدوي** · 25-02-2009 02:06 PM

أنا كل الي غاظني بجد و خرجني عن شعوري في اليوم ده
الراجل الي قفل فاتحة اليو ترن
بجد كان غبي قوي
و خلى شكلى و حش و انا واقف بعرض الشارع
كتير قوي بحس ان في ناس بتفنن انها تستغبى قوي
يعنى فعلاً راجل يستحق اغبى رجل في العالم
زي ما بيقولوا في الافلام الاجنبية
احمق و وغد

**أبو إياد** · 25-02-2009 02:26 PM

ياباشا سلبيات الشارع المصرى لا تحصر
عندك اللى مابيبطلش كلاكس (الميكروباص والاتوبيس)
اللى يبقف فى وسط الشارع سواء بيركب اوبينزل او عطلان (الميكروباص والاتوبيس)
اللى بيعمل غرز فى عز الزحام(الميكروباص والملاكى)
اللى واقف ع اليمين وفاجاءه يكسر العجل ويطلع ع الشمال باقصى سرعه (الميكروباص والاتوبيس)
اللى يبقا واقف فى الاشاره فى اليمين او الشمال وهو مفتوح للى عاوز يلف علشان يقف فى الاول (جميع سيارات مصر )
اللى يلف بدون اشاره (جميع سيارات مصر)
اللى ماشى يتمخطر فى وسط الشارع بدلع (عربيه قديمه او شاب وظبط عربيته )
اللى واخد شماله وماشى باقل سرعه (العربيات القديمه والنقل)
اللى ماشى بسرعه جدا وبيلزق فى اللى ادامه(جميع السائقين)
وغيره وغيره وغيره

انا بقا من اللى بامشى باتمخطر فى وسط الشارع ده لما انزل مع نفسى بالليل (سلبيات باردو)

**zeyad1810** · 25-02-2009 02:35 PM

القصة بتاعتك دى تنفع حلقة فى مسلسل
حما للة على السلامة وكويس انك نمت فى بيتكوا يومها
بس الكلمتين اللى قولتهم لبتاع ال 128 دول عجبونى اوى

**أشرف العدوي** · 25-02-2009 02:51 PM

حما للة على السلامة وكويس انك نمت فى بيتكوا يومها
بس الكلمتين اللى قولتهم لبتاع ال 128 دول عجبونى اوى

شكراً و ياريتك ما فكرتني بنمت في بتكوا دي
اصلي مرة ما عرفتش و الله انا في البيت بس مالوش علاقة بالمرور الموضوع ده
انا هقولكوا على الموقف ده علشان تعرفوا انا ساعات كتير الدنيا بتقفش عليا
هو كان يوم خميس 5/2/2009
في حد فيكوا كان تعبان قوي من الشغل و الارهاق و قلة النوم
و علشان ينام و يستريح يتعب نفسه ذيادة
انا عملت كدة في اليوم المشئوم ده
و روحت زورت حماتي و الحمد لله انهم مسكوا في مراتي علشان تبات معاهم و اروحلهم تاني يوم ( كان عندهم مناسبة عائلية يوم الجمعة )
المهم نزلت من عندهم و اتصلت بصحابي و خرجنا و جبت اكل معايا علشان كنت جعان
قولت اروح ائنتخ على السرير و انا باكل
و روحت تحت البيت و ركنت الركنة التمام علشان محدش يصحيني يقولي عايز اطلع او اركن
و حدثت الفاجعة
حطيب المفتاح في الباب بتاع العمارة بيفتح ازق الباب مش راضي يتفتح
البواب صحي بيقولي في ايه يا استاذ اشرف
قولتله في حاجة ورا الباب مش مخلياه يتفتح
قالي مافيش حاجة
قولتله طيب في ايه
قالي مش عارف
قولتله المفتاح فتح عادي بس الباب نفسه مش بيفتح
قالي طيب لستنى كدة و اكتشف ان في مسمار صلب من بتوح البوابة الحديد خرج من مكانة و رشق في الدرفة التانية المقفولة
و المسمار في نص الباب بالظبط
قعدنا نحاول نكسره مافيش فايد
الساعة كانت 3 باليل و الناس صحيت من النوم
و الي عمال يبرطم بكلام مالوش لازمة
المهم دورت على اي حد حتى حرامي يفتح الباب مافيش حد
الساعة بقت حوالي 3.5 باليل
قولتله خلاص خش نام انت و انا هأتصرف
قالي كلمة حزت في نفسيتي قوي ( و أنت هتبات فين يا استاذ اشرف )
قولتله في اي حتى
بصراحة اتكسفت انام في العربية كدة
اتصلت بواحد صاحبي و نزل معيا استنيت و قعدنا نلف بالعربية لحد الساعة 7 الصبح
المهم اتصلت بوالدتي ( ساكنة معايا في نفس العمارة ) علشان اتابع معاها الموقف
لاقيتها كانت نايمة و محستش بحاجة
قولتلها خلاص اطلعى عندي الشقة احدفيلي ضمان العربية علشان اوديه الصيانة
و انا اتبع معاها بالتليفون اشوف البوابة اتفتحت و لا لاء ( الكلام ده كان يوم الجمعة و كل بتوع المفاتيح قافلين )
روحت الصيانة و قالولي تعالى الساعة 2 أستلم العربية
و جيت اتصل بيهم في البيت لقيت الموبايل هيفصل شحن و انقطع عن العالم
الساعة بقت 11 و مهدش كلمني و انا خايف اتصل بيهم البطارية تفضى
المهم قابلت واحد صاحبي و حولت المكالمات كلها على تليفونه
و قولت اكلمهم و اشوف ايه الاخبار ( الكلام ده كان قبل صلاة الجمعة بحوالي 30 دقيقة )
الحمد لله لقوا نمرة الحداد الي عامل البوابة و اتصلوا بيه و قدامه نص ساعة يا اما بعد الصلاه
المهم يعني انا روحت البيت في اليوم ده الساعة 9 باليل كان ساعتها في ماتش للأهلي مش فاكر مع مين اتفرجت عليه عند حماتي و روحت انا و المدام

شوفتوا بقى الدنيا لما بتقفش بتبقى عاملة أزاي

-

-

الموضوع: امبارح كان يوم اعجب من العجب روحت البيت في 3 ساعات

LinkBack

أدوات الموضوع

عرض

امبارح كان يوم اعجب من العجب روحت البيت في 3 ساعات - انشر الموضوع فى :

-

-

-

المواضيع المتشابهه

من اعجب مشاهد السينما المصرية ...!!!

لمبة الزيت بتنور ساعات و ساعات لا

( saga ) روحت امبارح عز العرب فرع مدينة نصر عشان الساجا , و زعلان من سياسة عز العرب

انا روحت امبارح لبريدجستون و ظبطولى الزوايا

الكلمات الدلالية لهذا الموضوع

المفضلات

المفضلات

ضوابط المشاركة