اقتباس المشاركة الأصلية كتبت بواسطة NoRmAl مشاهدة المشاركة
ده اللى انا كنت بقوله
حضرتك يا استاذ توت شمتنا كلنا بدون قصد طبعا.
اقصد ان كلنا بنعمل ولو جزء من الى انت قولته وعارفين انه غلط
احب بس احيى الاستاذ venus-doom والاستاذ merosss على شجاعتهم على الاعتراف بالخطأ بس من المفروض اننا نبطله بس تقول مين انا عن نفسى بسمع لنفسى كل يوم وانا نازل عالسلم " مافيش غرز مافيش غرز مافيش غرز....."
واول ما شوف واحده... كأنى متبرمج
شكرا مجددا للاعضاء الى كانت عندهم شجاعه و مستنيين الاخرين يعترفوا بردوو


يا أستاذ نورمال .... أولا أهلا بك و صباح الخير
ثانيا حاشى لله إني أشتم حد من الباب للطاق كدا .
و ثالثا أنا بكن كل أحترام لكل الناس هنا في المنتدى و في كل مكان
و لكن اللي يقل أدبه عليك في الطريق و يسرق طريقك و يعرضك للخطر بعمل الغرزة و يخليك تفرمل و ساعات لازم تفرمل جامد علشان البيه محسبهاش كويس و المكان أصلا مش أد عربيته و لو مفرملتش جامد .... هايشيل وش عربيتك

تقدر تقولي وصف الناس دي أيه ؟؟؟
بغض النظر بقى أن حضرتك بتعمله أو لاءة و لكن أنا أُحيي فيك الشجاعة بالأعتراف بالخطأ .

أنا هاتكلم عن نفسي بما أن الموضوع قلب أعتراف بالأخطاء
أولا أنا عايز أبدي مُلاحظة مهمة جدا
أغلب الأخطاء بتم بسبب الأستعجال .... و السرعة الزائدة عن الطريق ....
و دي الناس المهمة قوي اللي وراها صفقات المليارات و بتعمل كدا يا عيني علشان تلحقها ...... لازم برضه الواحد يعذر الشعب المصري .... مينفعش يتأخروا على صفقاتهم

المهم ... نرجع لكلامي
أنا الحمد لله تعالى أخطائي في الطريق قليلة جدا حيث أني من رابع المستحيلات أن أفعل الأفعال التالية :
الغرز ......... الحمد لله لا أقوم بها بتاتا و أنتظر حتى أستطيع التخطي بأمان في حالة وجود عوائق في الحارة اليسرى مثل سيارات نقل أو سيارات بطيئة و لا أتخطاهم بغرزة أبدا .

أكره الكلاكس جدا و لا أستخدمه إلا في تنبيه الحمير اللي قاعدة أمام عجلة القيادة الخاصة بالميكروباظ و الحمير اللي سايقة العربية و المرايات مقفولة و ماشي يحدف يمين و شمال . و ساعات الناس اللي بترمي نفسها أدام العربية علشان تعدي أو البهوات اللي عاملين فيها شجعان السيما و سايبين الرصيف و ماشيين في وسط الشارع !

أكره السرعة و الحمد لله ألتزم في 90 % من الأحيان بسرعة الطريق الرسمية المحددة من قبل هيئة المرور و لا أقوم بالتزويد عنها إلا في حالات الزنقة .. ( عربيتين يكونوا زانقين عليا أو نقل بيسابق و كلام من ده )

و الحمد لله .... لما بأركن ...بأركن محترم و ألصق العربية في الرصيف و مستعد أمشي على رجلي كيلومتر بس أركن العربية في مكان و أسيب مكان لغيري يركن فيه و مركنش أبدا زي الحمير اللي بتركن زي العميان و الناس اللي بتأخد كذا مكان في الركنة بتاعتها ..الحمد لله ... أني بفكر في غيري و ياريت الناس تفكر أن مش هي لوحدا بتستخدم الطريق .

و الكلام اللي أنا بقوله ده و الله العظيم أنا مش عامل فيها ملاك و لكن هي دي طباعي في السواقة
أحترم غيري و عمري ما أكسر على حد و و الله العظيم دايما لو واقفين في مكان و مزنوق .... أطلع أستئذن العربية اللي جانبي علشان أكسر عليه و أمشي حالي لو أنا مزنوق جامد . و لو معرفتش أستئذن .... أدي أشارة و أكسر واحدة واحدة و أعرف الناس أني مزنوق و عايز أطلع .

عموما لو حضرتك زعلت من كلامي ..... أنا آسف
بس عايزك تجرب تقعد في العربية من غير غرز
و شوف لما واحد غبي يعمل قدامك غرزة و قولي أيه أحساسك ؟؟

لو مبسوط ........ يبقى أتكل على الله و أعمل اللي أنت عايزه
لو الغرزة ضايقتك ....... أعرف أنها بتضايق غيرك و ياريت تبطل تعملها علشان كمان دي خطر جدا و بتعرض حياة الناس للخطر و حياتك أنت شخصيا
ربنا يستر طريقك و طريقنا و يهدي سواقين مصر و ناس مصر و يحببهم في النظام و الأهم ...يهدي المرور المصري و يخليه يشوف شغله في مراقبة الطريق و لهم في المحور خير مثال .
و السلام عليكم و رحمة الله وبركاته