الموضوع: انا عندي سؤال يا جماعه عن شوية حاجات فالعربيه

يا أخي متزعلش مني أنا أقصد مصلحتك والله
إنتا الظاهر مفهمتنيش
أنا عايز أوصلك معلومة سهلة وبسيطة
أسئلتك هتلاقي أجوبة عليها وأكتر في القسم التعليمي
ليه
لأنها ملهاش دعوة بنوع العربية
يعني مثلاً الزيت بتاع الماتور نوع مختلف تماماً عن زيت الفتيس ومينفعش ده يتحط مكان ده
وده مش في السويفت بس ده في كل العربيات بجميع أنواعها
هو ده إلي عايز أوصلهولك
لو راجعت المواضيع في القسم التعليمي هتقول أنا مكنتش بشوف المواضيع دية قبل ما أسال الناس ليه؟؟؟
صدقني هتستفاد وتوفر على نفسك وقت ومجهود وعلينا كمان

وعموماً أعتذر مرة أخرى متزعلش وحقك عليا

بالنسبة لمية الرادياتير
أنا هتكلم عن إلي بيحصل معايا
أنا إشتريت العربية وكان صاحبتها بتحط ميه عادية من الحنفية فكانت عامله ريم لونه بني
المهم روحت بنزينة موبيل أو أي بنزينة عندهم جهاز بينضف دورة التبريد ظبط الدنيا وحطلي جركن مية خضراء (أنا كنت شاريها من بنزينة التعاون وكانت تعبانة أوي ب12 جنية تقريباً)
المهم لاحظت بالمراجعة الأسبوعية إن المية بتقل في القربة جامد
روحت للميكانيكي لاقيت طلمبة المية بايظة فغيرهالي بـ140 جنية ياباني
المية مبقتش تقل زي الأول لكن لازالت تحتاج لمتابعة على الأقل شهرية وتزود من القربة وأبعد عن الرادياتير نفسه
بالنسبة للزيت
الزيوت أنواع كل نوع له مدة صلاحية إستخدام معينة يعني نوع بيقعد 1000 كيلو ونوع بقعد 30000 مثلاً حسب نوعه
لو مكنتش عارف الزيت بقاله أد إيه لازم تشوف مقياس الزيت مش عارف خلي حد من معارفك أو أصدقائك معاه عربية يشوفلك مقياس الزيت أو أي بنزينه ويوريلك بتشوفه إزاي حسب لونه ولزوجته ممكن تعرف محتاج تغير زيت ولا لأ
ممكن تشتري فلتر زيت كوري لعربيتك بـ13 جنية من بتوع قطع غيارها هتلاقي مصري وكوري وغيره مع الزيت

شوف كل الكلام إلي أنا كتبته ده
موجود وأحسن من كده وتفاصيل وطريقة عرض أفضل في المنتدى
بس لو كلفت نفسك تعمل بحث أو تتصفح المواضيع القديمة كنت هتوفر عليا وعلى نفسك كلام كتير
فهمت أنا أقصد إيه
لو عملت إلي قولتلك عليه وبعدين ملاقيتش رد لأسئلتك قول وإحنا إن شاء الله نجيبهالك
والسلام

شوف يا باشا
غلط إنك تفتح غطا الرادياتير وعربيتك سخنة وغلط أصلاً إنك تزود من الرادياتير المفروض ده يتعمل من القربة
كمان عادي إنها بتغلي ده مش معناه إن العربية فيها حاجة
الغلط إن تكون المية ناقصة بس

الزيت لو متورك كويس يعني مش ماشي كتير أو متهان يعني ممكن تحط زيت BP فيسكو 5000 وتخيل هتغيروا كل 15000 يعني كل سنة على إستخدامك بس هوا بـ215 جنية (هتلاقي مواضيع كاملة عنه في المنتدى لو عملت بحث)
لو عايز زيت يقعد أقل ممكن تستخدم mobil xhp أعتقد بيقعد 3000 كيلو وفي حدود من 65 إلى 100 جنية بس أنا معرفش حاجة عنة بصراحة
وإنتا بتغير أي حاجة في العربية متنساش تكتب غيرتها إمتى وكان الكيلو متر كام
وبالتوفيق

المشاركة الأصلية كتبت بواسطة Jato.33

لو عايز زيت يقعد أقل ممكن تستخدم mobil xhp أعتقد بيقعد 3000 كيلو وفي حدود من 65 إلى 100 جنية بس أنا معرفش حاجة عنة بصراحة

موبيل XHP ثمنه 100 جنيه ومدته 3000-3500 كيلو ولا أنصحك به

شل الأصفر ثمنه 98 ومدته 4000 كيلو وهو ممتاز

نصيحة:
تصفح جميع موضوعات القسم التعليمي والورشة وقسم سيارتك.

لماذا؟

لأنك ستجد إجابات جميع الأسئلة الموجودة بذهنك

والأهم أنك ستجد إجابات الأسئلة التي لم تخطر بذهنك لأنك لا تعلمها وهذه هي الفائدة.

وأيضاً ستتعلم خطوات وقائية للسيارة لأن الوقاية خير من العلاج.

وستتعلم كيفية التعامل مع الصنايعية وأماكن شراء قطع الغيار وأسعارها.

وهتتعلم ببلاش.

وهكذا تعلمنا في البداية.