الموضوع: الغوث الشكمان محتاج يشربن

اخوانى الأعزاء فى أى حد منكم سمع عن الكلمة دى قبل كده ( الشكمان حيتظبط لما يشربن كمان شهر أو شهر و نص )
مش حطول عليكم انا عربيتى لانوس 99 و كنت قرأت فى مشاركة لأخونا العزيز محمد ممدوح فى إحدى الموضوعات أن احسن شكمان هو شكمان أبو اليزيد على اعتبار انه هو ألى بينزل مع العربية أصلا . فلما حسيت أن الشكمان عندى صوته مش عاجبنى رحت و اشتريت علبتان شكمان ألى فى الوسط و واحدة خلفية و ركبتهم و كانوا زى الفل و بعد حوالى 3 أسابيع سمعت صوت رنه فى العلبة الخلفية و مع الوقت و السخونية بتزيد و لنى مكنتش واخد فاتورة من المحل ألى اشتريت منه محبتش اخش فى مهاترات معاه على اساس ان مافيش بياع بيحب يرجع حاجة . المهم عرفت أن فى فرع بيع لأبو اليزيد فى الحرفيين شارع جمال عبد الناصر . رحت و اشتريت علبة خلفية بـ 235 جنيه و ضمان 3 شهور و لأنى نحس و مسوس و أنا عارف نفسى كويس كل حاجة اجبها لازم يكون لها ديل . لقيت بعد 3 أيام بالظبط صوت كما لو كان تنفيس المهم رفعت العربية و كتمت الشكمان و لقيت العلبة بتنفس من الجنب و الله و كانت ليلة سوداء لم أرى فيها النوم من الأكتئاب و رحت تانى يوم للمحل و الولد هناك قال لى أنه حياخد العلبة و يرجعها المصنع يتكشف عليها و الحمد لله كنت محتفظ بالعلبة السابقة لها فركبتها . و بعد خمس أيام عديت عليهم قالولى العلبة اترفضت ليه عشان كويسة و صحتها بمب و هى محتاجه شهر أو شهر و نص عشان تشربن أخوانى الأعزاء ايه رأيكم بسرعة و خصوصا محمد ممدوح عشان انا خلاص تعبت نفسيا جدا و خلاص حتجنن و أسف للأطالة .

معلش يا محمد انا بس كنت حتجنن و مش طايق نفسى و محتاج اعرف الصح بسرعة لأنى كنت فاكر انهم بيشتغلونى عشان أول مرة يحصل معايا كده . و عموما الحمد لله انا كدا اطمنت و شكرا