الغوث يا أهل الغوث البيجيون

**YousryGuirguis** · 29-07-2010 11:25 AM

السلام للكل

انا عندى سيارة 405 مو 2003 ، مشكلتى مع التكييف . 1- التكييف رغم انه مشحون من وقت قريب الا انه مش ثلاجة هو بارد لكن ليست البرودة اللاسعة؟؟؟؟
2- لما باشغل التكييف أمبير الحرارة بيعلى بعد ال90 لدرجة بأخاف من سخونة الموتور وبأضطر اقفله؟؟؟

أرجو منكم سرعة الرد ولكم جزيل الشكر

"أخوكم ومزنوق"

يسرى

**mohamedadelemam** · 29-07-2010 11:53 AM

السلام عليكم...مشكلة حضرتك إن مروحة الريداتير لا تعمل بالسرعة العالية عند تشغيل التكيف..لذلك مش بيبرد لا سربنتينة التكيف ولا الريداتير كويس....حضرتك إكشف على الباترون والإكسبنشن..وربنا يوفق حضرتك

**YousryGuirguis** · 29-07-2010 02:04 PM

المشاركة الأصلية كتبت بواسطة mohamedadelemam

السلام عليكم...مشكلة حضرتك إن مروحة الريداتير لا تعمل بالسرعة العالية عند تشغيل التكيف..لذلك مش بيبرد لا سربنتينة التكيف ولا الريداتير كويس....حضرتك إكشف على الباترون والإكسبنشن..وربنا يوفق حضرتك

يعنى ايه الباترون والإكسبنشن دول وعند الكهربائى ولا فنى التكييف؟؟؟

**mohamedadelemam** · 29-07-2010 06:52 PM

إن شاء الله عند الكهربائى..هو الباترون دا منظم سرعة مراوح الريداتير..أما الإكسبنشن فدا جزء من دورة التكيف بس ممكن بيكون معلق أو بايظ فيعمل كدا والإتنين تحت الفانوس الشمال الأمامى...

**BrainStorm** · 29-07-2010 08:03 PM

طيب معلش سؤال الكويل ممكن يزود السقوعية و الكويل ده بيكون بكام وبعرف أنه بيسرب مثلا ازاي علشان واحد بتاع تكيفات قال لي روح التوكيل يكشف على الكويل ؟؟

**mohamedadelemam** · 29-07-2010 08:35 PM

السلام عليكم..حضرتك موضوع الكويلات دا الكشف عليها لازم يتفك فيها التابلوه كله...وإحتمال 1 فى الميه يطلع فيها حاجة غير إن موضوع سخونية السيارة دا كافى جدا لتشخيص باترون أو إكسبنشن

**YousryGuirguis** · 29-07-2010 10:43 PM

سيدى الفاضل
شاكر جدا اهتمامك بالرد وكذا (تنويرك) جهلى بهذه الجزئية
شكرا شكرا شكرا

يسرى

**Adham** · 29-07-2010 10:50 PM

المشاركة الأصلية كتبت بواسطة yousryguirguis

السلام للكل

انا عندى سيارة 405 مو 2003 ، مشكلتى مع التكييف . 1- التكييف رغم انه مشحون من وقت قريب الا انه مش ثلاجة هو بارد لكن ليست البرودة اللاسعة؟؟؟؟
2- لما باشغل التكييف أمبير الحرارة بيعلى بعد ال90 لدرجة بأخاف من سخونة الموتور وبأضطر اقفله؟؟؟

أرجو منكم سرعة الرد ولكم جزيل الشكر

"أخوكم ومزنوق":ka_che1[1]:

يسرى

الموضوع بسيط للغاية ان شاء الله و نبندي بالتسلسل الآتي من السهل :

1- ان فية تراب و طين كتير على السربنتينة بتاعه لفريون اللي بتبقى قدام الرداتير و دة بيسبب ان الفريون ما يبردش و بيعمل نتيجه عكسية مع تشغيل التكييف بسبب سؤ التهوية ان الحرارة بتتنقل من الفريون (الساخن) في سربنتينة التكييف للرادياتير اللي وراها و لا يتم التبريد جيدا بسحب تيار هواء يبرد الردياتير

ودي حلها بسيط للغاية انك تغسل العربية غسلة كويسة في البنزينة بجاز ثم بالمياة بالمسدس بس مش ضغط عالي قوي بالكرشر علشان ممكن يتني ريش السربنتينة و يسدها زيادة او لو فية طين ساددها جامد لسة يبقى تروح لبتاع التكييف يفك الشبكة و يغسل السربنتينة و الردياتير بالفرشاة و الصابون كويس
او تستعمل سبراي ديجريزر اللي بيستخدم في تنظيف المواتير عالجاف

2- الردياتير مليان صدأ و مسدود من الرواسب و محتاج يتنضف (يتسلك) و دة يبان بالنظر للون المياة و الذا كان فية صدأ في القربة

3- لو استمر موضوع السخونة يبقى كهربائي يبص على مروحه التكييف انها شغالة و مش بايظة و ان موتورها يكون سليم و بيلف بسرعه

انما ماتدخلش نفسك في حوار فريون ناقص و لا اكسبنشن و لا فلتر ولا كويل علشان كل دة مالوش دعوة
الكويل لو بايظ (مخروم مثلا او مسدود) يبقى التكييف مش حايبرد خالص (و انت بتقول انة بيبرد بس مش كويس)
و الفريون حايتسرب من خرم الكويل و تش ريحتة في صالون العربية
ولو مسدود الضغط حايعلى في دايرة الفريون و البلف حايضرب منعا لتلف الكومبريسور (لو كان كومبريسور ببلف) و ساعتها مش حايبرد اساسا و برة انت بتقول ان الفريون بيبرد بس مش قوي

انما صانيعيه مصر بتحب تفتح فتح و نصب و (امال ياكلوا عيش منيين)

**BrainStorm** · 30-07-2010 01:03 AM

المشاركة الأصلية كتبت بواسطة mohamedadelemam

السلام عليكم..حضرتك موضوع الكويلات دا الكشف عليها لازم يتفك فيها التابلوه كله...وإحتمال 1 فى الميه يطلع فيها حاجة غير إن موضوع سخونية السيارة دا كافى جدا لتشخيص باترون أو إكسبنشن

بص حضرتك هي المشكلة بظبط أن التكييف لما يتشحن مبيكملش أسبوع أو اتنين ويرجع يطلع هوا سخن وحتى لما بيكون شغال تبريدو مش بيبقى قوي بتحسه بيرتب الجو بس فـصاحبي راح لواحد بتاع تكيفات و كشف على كل حاجة حولين الموتور والراجل اللي بيكشف بدا من عند الكمبرسور و وصل لحد المواسير اللي داخلة فالكويل وقال أن مفيش تسريب في أي حتة منهم وكان فاضل الكويل فقاله الكويل بيتكشف علي في التوكيل علشان هوا(بتاع التكيفات يعني) مايفوكش الكويل.فـا رأي حاضرك ايه؟؟

**Adham** · 30-07-2010 01:28 AM

المشاركة الأصلية كتبت بواسطة brainstorm

بص حضرتك هي المشكلة بظبط أن التكييف لما يتشحن مبيكملش أسبوع أو اتنين ويرجع يطلع هوا سخن وحتى لما بيكون شغال تبريدو مش بيبقى قوي بتحسه بيرتب الجو بس فـصاحبي راح لواحد بتاع تكيفات و كشف على كل حاجة حولين الموتور والراجل اللي بيكشف بدا من عند الكمبرسور و وصل لحد المواسير اللي داخلة فالكويل وقال أن مفيش تسريب في أي حتة منهم وكان فاضل الكويل فقاله الكويل بيتكشف علي في التوكيل علشان هوا(بتاع التكيفات يعني) مايفوكش الكويل.فـا رأي حاضرك ايه؟؟

لا انت ماقلتش كدة من الاول

طيب بص

انت من المعادي حسب بروفيلك

لو بتنزل مدينة نصر ابقى قوللي اوديك لبتاع التكييف بتاعي محترف و بيفك كويلات وبيختبرها لو فية تسريب حايكتشفة و يلحمه الا لو الكويل "مملح" يعني فية بارومة

انما اي صنايعي ممكن يشوف الكويل مش شرط توكيل انت شكل بتاع التكييفات بتاعك بيدلع و يادوب بيشحن و بس و مابيوجعش قلبة في شغل جامد

عالعموم شوف و لو تحب لما تيجي اروح معاك قوللي هو قريب من بيتي في مصطفى النحاس مدينة نصر