الموضوع: لماذا لم تقوم مصر بانتاج اول سيارة مصرية 100 % مطابقة لاحدث التقنيات !!

المشاركة الأصلية كتبت بواسطة tutankhamoun

مفيش مستثمر ( رجل أعمال )
هايصرف ملايين على أبحاث موتور جديد و يستنى بتاع عشر سنين علشان يعمل أسم و بعدين يبدأ يلم اللي صرفه ( ممكن الرقم يدخل في مليارات )

لذلك المشاريع اللي زي دي في الزمن اللي أحنا فيه دلوقتي

مينفعش معاها غير الاسثمار الحكومي طويل الآجل .

النصر شاهين تجميع حكومي و بتتباع زي الصاروخ
الموضوع مرتبط بالمنتج أكثر من الحكومة أو الانتاج الحكومي .
و بعدين يا جدعان أنتوا بتتكلموا على الحكومة أكنهم أعداء ؟؟

لا أتفق في هذه النقطة إطلاقا
أنا أثق ثقة عمياء مثلا في منتجات الهيئة العربية للتصنيع و المصانع الحربية مع أنهم حكومة مش قطاع خاص
و أعتقد أن فيه ناس كتير كدا مش أنا بس .

لذلك الموضوع هايكون فيه جدية أكتر لو فيه أستثمار كبير من الحكومة في عمل أبحاث أو شراء محرك جاهز و صناعته محليا و تطويره محليا أيضا .

زي ما هيونداي عملت في بدايتها
و زي الصين دلوقتي .... تشتري تكنولوجيا قديمة و تصنعها ... مش مهم أنها قديمة المهم أنهم أشتروا الأساس اللي هايمشوا عليه بعد كدا .

كلام جميل ..
بس انت لو مكنتش كتبت الجملة دى انا كان هيبقي لى كلام تانى خالص ..

لذلك المشاريع اللي زي دي في الزمن اللي أحنا فيه دلوقتي

بس دلوقتى الحكومة بتكسب من الجمارك مبالغ مهولة .
لما يعملوا مصنع سيارات ويبتدوا ينتجوا انتاج محلى مصرى محترم زى بقية خلق الله .
ساعتها اتجاه المواطنين هيذهب للمنتج المصرى .
طب الحكومة هتكسب ازاى والجمارك قلت بسبب لجوء المصريين للمنتج المصرى !
فاكيد الحكومة هتعوض مكسبها بطريقة اخرى .
الا و هى المبالغة فى سعر المنتج اللى هيادى الى فشل المشروع سريعا خصوصا ان المواطن هيبقي مذبذب ومحتار بين فئات السيارات ويا ترى يجيب يابانى ولا مصرى ..
فلما يلاقى سعر المصرى عالى هيقولك انا ابقي فى السليم واخلينى فى اليابانى او الكورى مثلا ..

بالنسبة للشاهين يا استاذ توت ..
انا كشاب لما يكون قدامى عربيتين فى فئة ال 50 الف ....
اكيد هيبقي اخر اختياراتى هى الشاهين ..
بصراحة انا مش عارف ازاى اركب عربية موديل 2007 او 2008 مثلا وكمان سعرها اكتر من 50 الف وتكون بمستوى الشاهين !!
شكلها غير مقبول تماما وتصميمها قديم جــــــــدا جدا جدا
وعمرى ما شفت شاب اشترى شاهين لانها عاجباه ولا هشوف
لان كل مالكى الشاهين ياما بيبقوا واخدينها من الاهل (الاب طبعا لما اشترى العربية زمان) او سائقين التاكسي لانها من انجح سيارات التاكسي ..

الموضوع كله لو اعتمد على الحكومة يبقي الموضوع مُنتهى قبل ما يبتدى ..
الحكومة بتبحث عن اى وسيلة لجمع اموال من غير حق ..
يبقي ازاى هيفتحوا مصنع ينتجوا منه سيارات للشعب الغلبان باعلى مستوى واقل سعر !!

المشاركة الأصلية كتبت بواسطة human12

معلش يا جماعه مش قادر امسك نفسى

ده خبر فى الاهرام



حد شايف ان بلد فيها حكومه بالمنظر ده ممكن تفكر فى صناعه!!
الناس ديه بقالهم 28 سنه و لسه بيفكروا ربط سوق العمل بالخريجين
معنى الكلام ده ان ماحدش مثلا كان واخد باله - كان فيه ناس تانيه قبل كد - ده بيقولوا دبر الموارد على اساس هيخش جمعيه او يستلف من واحد صاحبه
قيس ده على كل حاجه--- تفتكر ناس زى ديه هتصنع عربيات ليه اصلا

طب والنبي يا هيومان قولنا نحبها على ايه !!

نحب بلدنا على اى اساس .!

اخر خبر وصل للمصريين كان انتصار 73 ومن بعدها شكرا على كدا ...

لا عارفين يحلوا مشاكل المياه ولا العيش ولا الكهرباء و لا الغاز و لا التعليم ونازلين نصب فى خلق الله وجباية و كوســــــــــــــــــــــ ــــــــــة ..

يبقي نفتخر بيها ازاى !!

انا عارف ان الموضوع هيقلب لكده لان دى حقيقتنا المرة بس ربنا قادر على كل شيء ..

يا جماعه السبب الرئيسي للوضع ده هو انتشار الفساد الاداري و تغليب المصلحه الخاصه ( اللي نواياها خبيثه طبعا) علي المصلحه العامه و ده برضه عن تجربه شخصيه , بمعني لو في شركه معينه او وزاره ( ينتشر هذا النموذج طبعا في الكيانات الحكوميه ), الشركه دي بتخسر و جالها رئيس مجلس اداره شريف و محترم و متعلم تعليم راقي و عارف كيف يستفيد منه و يطبقه و عنده رغبه بالنجاح ..باختصار رئيس مجلس اداره ناجح بجميع المقاييس . تعالوا نتفرج ايه اللي هيحصل . اولا: اول ما يستلم مهامه الوظيفيه هيتجمع عليه شله المنتفعين و المنافقين و كدابين الزفه و يحاولوا يفهموه ان كله تمام ومفيش مشاكل و الشغل ماشي و انهم الاشخاص المثاليون لتنفيذ تعليماته و انهم قادرون علي نقل افكاره و طموحاته و نشرها و اقناع العاملين علي مستوي قطاعات الشركه بها حرصا علي مصلحه الشركه لأنهم شرفاء مثله و انهم يعتبرونه منحه من السماء جاءت اليهم و جعلتهم ينطلقون ليحققوا الانجازات بعد ان كانوا مكبلين بالأغلال في العهد السابق .
المهم ان هذا النوع من البشر منتشر جدا داخل الشركات ( الحكوميه خاصه ) و لديهم قدره عجيبه علي التلون و التشكل وفقا لمتطلبات الشخصيه اللي قدامه , و دول اخطر اخطر شيء لأنهم ببساطه عاملين زي المافيا ومسيطرين علي جميع قطاعات الشركه ( رئيس القطاع منهم و المدير العام منهم و مدير الاداره منهم حتي السواق منهم ) و قيس ده علي جميع قطاعات الشركه و علاقه كل رئيس قطاع برئيس قطاع تاني زميله ( كل عيش و سيب غيرك ياكل عيش ) . و هكذا . ولعلمكم مفيش فرد مهما بلغت سلطته عليهم يقدر يهزمهم لوحده , يعني متقولش ان ده رئيس مجلس اداره و ليه سلطه عليهم و يقدر يعمل و يسوي و يبهدلهم لأ غلط . لانهم ممكن يتجمعوا عليه و يطيروه لو كان الوزير اللي الشركه دي تابعه ليه من عينتهم و الراجل ده جاي غلط و مش راضي عنه و لو الوزير محترم حيعملوا عليه مؤامره و يشوهوا صورته امام العاملين و يعملوا قلقله داخل الشركه ,( الدفاتر دفاترنا و مكتب الصحه بتاعنا ) مع الاعتذار لفيلم الزوجه الثانيه . ده واقع وموجود و اللي عايز ينكره هو حر و عايز يعيش في عالم خيالي مش موجود . اخطر شيء من الناحيه الامنيه هي الجريمه المنظمه سواء داخل اجهزه الدوله او في المؤسسات الاقتصاديه و معناها ببساطه انك تسرق و تضبط سرقتك بشكل قانوني و محدش يمسك عليك حاجه لإن ورقك مضبوط لان اللي بيحققك معاك ( لو وقعت ) واحد منهم!!!
خطوره الجريمه المنظمه انها عامله زي السرطان و علاجها لازم يكون بالاعتراف بوجودها , تعيين عناصر شابه ( شبعانه) . اعجبتني كلمه قالها السيد وزير الداخليه حبيب العادلي و هي ( مش المشكله انك تكون غني او فقير المهم تكون شبعان ) و ده اؤيده 100 % , اختيار الكفاءات لكي تحل محل العناصر الفاسده بالتدريج و ليس مره واحده , عمل بتر تدريجي لهذه العناصر عن طريق كشف الملفات القديمه و التحقيق فيها بجديه و ما نهتمش بتضبيط الورق و بلاش الاعتماد علي نظريه ( كدب مساوي احسن من صدق منحكش ) غلط غلط . لما ده يحصل نقدر نقول اننا ممكن نصنع عربيه مصريه كامله .