الموضوع: الى كل الأسكندرانية حد شاف الحادثة بتاعت الفيرنا الى فى رشدى على البحر

المشاركة الأصلية كتبت بواسطة gemino

بصراحة يا جماعة اللى مستغنى عن عربيته يسوق فى كورنيش اسكندرية خصوصا الصبح ساعة المدارس و تعالوا اتفرجوا على المهزلة ....مش اقل من 2000عربية بيعدوا من ملف واحد من الساعة 7:30 الصبح ل 8:30 ص (ملف مستشفى الشاطبى).
بمناسبة المخلوقات اللى بتعدى البحر (لو مكانش ربنا كرم الانسان انا كنت شتمت بالفاظ يعاقب عليها القانون من هنا لغاية ما اموت) مرة كنت راجع من مشوار و داخل على ملف استانلى التانى امام السوق الحرة و السراية و الاقى مرة واحدة صوت فرامل شديد من العربية اللى قدام قدامى و طاااااخ و ابص الاقى اربع ستات عاملين زى حلة المحشى بيجروا و اطنان اللحمة بتتهز و بيضحكوا و كانوا السبب فى تدمير الفيرنا اللى فرمل عليهم و الماتيز اللى دخل فى الفيرنا و انا كنت ورا الماتيز بس الحمد لله لميت نفسى على الاخر و عينى على المراية بابص على العربية اللى حاتدخل فيا من ورا و طلعت ميجان بس الحمد لله فرمل على الاخر برضوا........طبعا لو كانوا البشر اللى بيعدوا دول فيهم مخ مكانوش عدوا من الملف المقرف ده ....الملف اللى الناس كلها بتكسر فيه على بعض و كله بيحاول يسبق كانه حايلف و يدخل الجنة
الخلاصة ان اسكندرية محتاجة حل جذرى للمرور و انا باقترح عمل حواجز اسمنتية بين الحارات على البحر زى الحواجز اللى موجودة على الجزيرة فى الصحراوى وده لغاية ما الناس تتعلم ازاى تسوق فى الملف .
انا كاسكندرانى بعترف ان 90 % من اللى بيسوقوا فى اسكندرية واخدين السواقة عملية بلطجة و كل واحد عامل فيها مفتح و واخد شلوت محترم فى نفسه ليه مش عارف ؟؟؟ هل ده نقص و شعور دفين بالدونية ؟؟ و لا مرض نفسى ؟؟

فعلا انا لما بسافر اسكندريه , بستغرب جدا من طريقه السواقه على الكورنيش ؟؟ هو الطريق فعلا واسع و مفهوش مطبات بس الناس بتمشى بلامبلاه و بلطجه غريبه و بتدخل الملفات بشكل غبىىىىىى جدا , و كلو كوم و الناس الى بتعدى الطريق بجد انتحار .
و طبعا الوضع مش احسن حالا فى القاهره ... كلو زفت .
ربنا يسترها معانا جميعا .

انا لما بنزل اسكندريه ببقي حاسس اني فوسط مولد عالكورنيش

بلاقي الناس بتلف الملفات بسرعات رهيبه وانا مضطر اني الف معاهم بنفس السرعات وببقي عارف ان عربيتي تستحمل ملفات زي دي وعلي سرعات توصل لـ 120 بس عمري محاولت امشي عالكورنيش اكتر من 60 الاقي ناس جمبي بفيرنا ولانوس بياخدو ملفات خياليه

وياسلام لما بركن العربيه وبحاول اعدي الكورنيش طبعا لاني معرفش ان في انفاق بضطر اعدي من فوق بحس اني حموت بين كل حاره والتانيه

ربنا يكون فعونكو

زميلى كان هناك وقالى انهم لاقوا زجاجات خمر فى العربية وربنا يرحمهم ويغفر لهم ويرزقنا حسن الخاتمة