الموضوع: خطوط تليفون فايبر اونو ( مش بيشتغل عليها الانترنت)

المشاركة الأصلية كتبت بواسطة pro_samir

يمكن بقى ليها تصريح اوك
بس فى النهاية الفكرة واحدة برضو ان الناس كلها داخلة شبكة وايرلس مع بعضها
يعنى كأنهم مشتركين فى خط انترنت واحد ايا كان طريقة تنسيق الكلام دة بقى

الناس اللى موزعين شبكات وايرلس فعلا واى فاى مش واى ماكس ، الكلام دخل فى بعضة

مفيش حاجه اسمها مشتركين فى خط انترنت واحد

يافندم دى حاجه ودى حاجة تانيه خالص

"الواى ماكس " مفهوش سلوك او خطوط تليفون خااالص وملوش اى علاقه بالسنترال وبيكون تابع بشكل مباشر لشركة الانترنت

يعنى هوا الل هيقوم بتقديم الخدمة بدل السنترال وحتى اتصال الابراج ببعضها هيبقى "واير ليس " عكس السنترالات الل بتوصلها خدمة الانترنت عن طريق كابل الفيبر (الل بيدخل على الديسلامات )

يارب اكون عرفت اوضحها بشكل سهل

المشاركة الأصلية كتبت بواسطة pro_samir

الواى ماكس اللى اعرفها هيا شبكة عادية خالص زيها زى الواى فاى بامكانيات اعلى بكتير، يعنى حتى لو عامل شبكة وايرلس فانت فى البداية اصلا واخد الأنترنت من كابل انترنت عادى وتم تحويلة لوايرلس عن طريق الواى فاى او الواى ماكس

اية الوضع اللى مطبق فى السعودية بخصوص الواى ماكس ؟ والمشتركين بياخدو الخدمة ازاى ؟

بيقدر يحدد يعنى السرعة اللى هوا عايزها ؟ بياخد وايرلس وهوا ماشى فى الشارع ؟ بيدخل بيوزر وباسورد مثلا ولا باسورد للوايرلس ؟

الموضوع ماشى ازاى ؟

انا هفهمك الموضوع من اوله

النت الاول بيجى عن طريق الكابل ال جاى فى البحر من اوروبا واصل مصر وواصل لشركة المصريه الاتصالات الل بتبيعه هيا بدورها لي الثمانية(8) شركات الل بيقدمو خدمة الانترنت للمستخدمين فى مصر ( طبعا مش كابل واحد فى كذا كابل جاى للشركه المصريه للاتصالات بالاضافه ان فى شركتين فى مصر كل واحده ليهم كابل خاص بيها غير طبعا حصتها فى الكابلات بتاعت المصريه للاتصالات )

الشركات الانترنت دول هتوصل الانترنت الل خدته ده للمسخدمين ازاى ( عن طريق ايه يعنى ) ؟؟
عن طريق اقدم وسيله الل هيا التليفون ازاى ؟

بتيجي الشركه تحط الديسلامات بتاعتها جوا السنترال وتروح موصلاهم بافايبر كابل الخاص بيها كده يبقى السنترال دا بقى متغطى (كافرد) للشركه دى

تيجي بقى حضرتك تتعاقد مع الشركه دى ايه الل هيحصل ؟
بيروحو واخدين خط تليفون حضرتك وموصلينه بالديسلام يبقى انت كده خطك بقى فيه حرارة تليفون ونت كمان تمام انت كده معايا

ال دى اس ال العادى :
بتيجي حضرتك واخد خط التليفون الل واصلك وحاطه فى الاسبليتر عشان يطلعلك خطين خط يكمل لبقيت الشقه ويشتغل تلفون عادى
والخط التانى بتدخله على الروتر العادى الل بيكون فى فيه فتحات بيتوصل فيها سلك يوصل بين الروتر وبين جهازك اللى بكده يبقى وصله النت خلاص ( فى الشبكات بيكون السلك الل واصلك ده بيبقى جاى من سويتش واخد بدورة من الروتر )

الواى فاى :
نفس ال فات بس الفرق ان بدل الروتر العادى انت بتركب روتر واير ليس يعنى مبتبقاش محتاج لسلك يربط بينك وبين الروتر (( وير ليس ))
علشان كده بتبقى محتاج كارت لان واير ليس

الواى ماكس :
غير الكلام دا خااالص عشان النت بيوصلك عن طريق موجات الراديو يعنى الوسيط الل بينك وبين الشركه الل انت متعاقد معاها هيا ترددات الراديو الل بتكون سرعة نقل البيانات فيها "70 ميجا بايت فى الثانيه" مش خط التليفون زى زمان الل كان طبعا مشاكله كتير وبطيء

طبعا انت مليكش دعوه خالص بالافلام دى كلها انت بتروح الشركه تتعاقد معاها على السرعه الل تناسبك وخلاص فى ساعتها تلاقى النت على الجهاز بتاعك ( لازم يكون عندك كارت لان وير ليس عشان هوا دا بيكون بطاقى التعريف بتعتك عندهم ) يعنى فى الواى ماكس منك للشركه علطول من غيرلا خطوط تليفون ولا سنترالات ولا بتاع


الفرق بين "الواى ماكس" و "الواى فاى"

1-فكرة العمل
الواى فاى : تردد موجات الراديو الل بتوصل بين جهاز الكمبيوتر والروتر ( طبعا الل بيكون واصله النت من خط التليفون )
الواى ماكس : تردد موجات الراديو الل بتوصل بين جهاز الكمبيوتر وشركه الانترنت الل انت مشترك مباشر

2- التردد
الواى فاي : 2.4-5 جيجا هيرتز
الواى ماكس : 2 - 66 جيجا هيرتز

3- سرعة نقل البيانات
الواى فاي : بتصل لي 54 ميجابايت فى الثانيه ( دى نقل البيانات من الروتر للجهاز مش سرعة النت عشان سرعة النت متاخده من خط التليفون )
الواى ماكس : بتصل لي 70 ميجابايت فى الثانيه

4- مساحة التغطية
الواي فاي : 100 متر تقريبا
الواى ماكس : 100 كيلو متر تقريبا
طبعا بتتأثر بطبيعة المكان والارتفاعات وحالة الجو

انا بقالى أكتر من ساعه فى صياغة الرد ده يارب يكون شرحى سهل ليك ولكل اعضاء المنتدى ومبسط لأكبر درجه