أنا من كام يوم كنت باخطف حتة مخالف تحت البيت عندي عشان الحارة التانية فيها ماسورة مجاري و مش راضيين يرصفوها ...
و بعد ما خلاص هارجع للحارة السليمة ... و و اقف مستني العربيات اللي المقابلة تعدي ... و أنا واقف ... لقيت عربية شرطة (سيدان من اللي لونهم أبيض دول) جاية علي ... و انا واقف ... تقريبا البنطلون أتبل ... و لحسن حظي عند الفتحة دي في واحد بتاع كاوتش فاتح ع الشمال و متعرفش تدخله غير لما تطلع الرصيف (و اللي ساكن في أكتوبر يعرف موضوع بتوع الكاوتش دول عشان تطلع له الرصيف الكوتش بتاعك يبوظ ) .. المهم فضلت واقف مكاني وماتعتعتش و قلت لو سألني هاقوله أنا طالع من عند بتاع الكوتش و مش عارف أعدي الحارة التانية ... مع أنها حجة خايبة قوي
المهم حسيت ان الراجل بيبصلي ... لكن سابوني و مشيو ... واضح أنهم كانو أتنين عساكر رايحين يجيبو عيش أو حاجة كده

و من النهاردة مش هامشي مخالف أبدا ... هالف لفة تعمل نص كيلو كده عشان اخرج من شارعنا بس مش مهم ... الف رأس الرجاء الصالح و لا أدخلش الكراكون ...
وعلي رأي لبلبة في فيلم الشيطانة التي أحبتني : اللي يدفع 100 جنيه عشان يبات في الشيراتون ، يدفع 200 جنيه ولا يباتش في الكراكون.
ربنا ما يوريكو أنا لي واحد صاحبي دخل الكراكون و حطالي حكاوي تشييييب.

أمشي عدل ... يحطار* عدوك فيك
______________________________________
* يحتار : بالـ "ت" مش بالـ "ط"