الموضوع: عملت شوية تصليحات في التمبرا ويارب تكون مفيده لاي حد معاه تمبرا او بيفكر يشتريها

السلام عليكم
اخواني اعضاء منتدي نايل موتورز واعضاء منتدي الفيات
وطبعا مالكي التمبرا علي وجه الخصوص انا

- شاري عربية والد زوجتي من شهرين وقلت اعمل فيها شده خفيفه كده يعني علشان اكون مرتاح مع العربيه وابقي عارف رايحه فين معايا ولو في مشكله هتكون منين

نبتدي الموضوع
- اولا : الميكانيكا
1- غيرت كل طقم السيور
كاتينا ودينامو وسير تاني مش فاكر اسمه ( جبتهم ب 85 جنيه)
2- فلتر بنزين (6 جنيه)
3- بلية الكاتينه (45 جنيه )
4- طقم شمبر ب115 جنيه لان العربيه كانت بدخن مع القرص واكل الزيت كان لسه خفيف قوي مش ملحوظ بس قلت الحقها لان الموتور كبسه ممتاز
5- طقم جوانات موتور(75)جنيه
6- كاوتشتين كبالن داخلي ب30 جنيه كان في ترشيح زيت فتيس منهم فقلت نضف كل الشغل
7- طبه المياه في الموتور ب20 جنيه
8- شغل في وش السلندر ب45 جنيه مش عارف اسمه المهني لكن شغل في الصبابات وتغير كاوتش الصبابات وعمل حاجه اسمه افزنه وكل ده في وش السلندر
9- ظبط الكربراتير وتغير بيك وتنضيف علشان اقلل استهلاك البنزين الي كان عالي في الفتره الاخيره معايا
10- غيار زيت كالتكس بعد الشمبر تنضيف الماكنه ولينت بتاع ساعتين ب 36 جنيه ومشيت بتاع 50 كيلو عليه بس براحه
11- غيار شل ب60 جنيه
12- فلتر زيت مش فاكر تمنه تقريبا 12 جنيه
13- طقم بوجيهات بيريو 3 شمعه الكتروني ب80 جنيه
14- بلتين وراء الواحده بس ب175 جنيه بس مش جبتهم اجلتهم شويه حين ميسره بس لمعرفة الاسعار

( اجمالي المصنعيه 250 جنيه لكل الشغل السابق كميكانيكا غير التنقلات والتبس للصبيان واكل وشرب وشم تراب وزيت وخلافه )

- ثانيا الفرامل
1- تيل فرامل خلفي ب45 جنيه
2- طنابير امامي تقريبا الماني مش فاكر قوي ب175 جنيه
3- تيل فرامل امامي ب40 جنيه
4- خرطوم فرامل شمال فرنساوي ب30 جنيه
5- كاوتشه للبستم الشمال ب6 جنيه
6- علبه زيت فرامل ب5 جنيه
7- سلك فرامل يد للناحيتين ب 50 جنيه

( مصنعيه 50 جنيه غير الاكرميات لحاشية الاسطي الكبير بس في ناس تستحق واجب وهو الاسطي الكبير جار اهل زوجتي )

- ثالثا: الكهرباء
1- طقم فيوزات مش فاكر عمل كام لان الفيوزات كتير جدا بس تقريبا 10 جنيه
2- مروحه استيراد بس مش بتاعة التمبرا وبتاعة التمبرا موجوده بس انا جبت واحده ناعمه وثبتها تمام علي الردياتير ب100 جنيه
3- تثبت المروحه
4- غيرت وحده الكنترول بتاع التكييف لانها كانت ملخبطه الدنيا عندي والتكييف كان بيلمس جبتها استيراد ب 120 جنيه
5- جبت لوحه تكييف ديجتال ب 80 جنيه
6- جبت جوز كلاكس تركي ب35 جنيه
7- جبت لمض جديده الماني للفوانيس الاماميه الواحده ب25 جنيه
8- لمض الماني للشبوره الواحده ب10 جنيه
9- جبت جوز مساحات زجاج امامي ب 120 جنيه جديده
10- جبت وش فانوس اشاره شمال ب13 جنيه
11- جبت ترموستات حراره ب 18 جنيه ايطالي

( المصنعيه 80 جنيه غير الاكرميات والتنقلات علشان اجيب الحاجات الاستيراد وتعب القلب في الفصال وغيره)

- ثالثا بالنسبه للردياتير
1- سلكت الردياتير وكان فيه تسريب بسيط اتعمل ده ب 15 جنيه
2- جركن ميه مقطره ب7 جنيه
3- جبت بودره صدا حططتها علي المياه المقطره ب5جنيه علشان الموتورمن جوه كان في صدا كتير


- رابعا بالنسبه للسمكره
- عملت كل الخبطات الي في العربيه كانت خبطات خفيفه لكن مخليه العربيه مش مظبوطه
- ظبطت الوش من قدام ووراء
- رديت العتبتين وكان فيهم بارومه في حتت اتعملت

( الكلام ده اتعمل ب 400 جنيه ده المفروض كمان علشان هما من الجيره )

- خامسا ظبطت زجاج الكهرباء والابواب
1- جبت كاوتشتين زجاج ودول الي بيخلوا الزجاج ثابت في المجرا مش بيخرج بره ب 10 جنيه
2- ظبت وضع المكنيتن من جوه مكان فك وتركيب السمكره
3- ظبط وتريح الابواب والكوالين مع الزجاج ب 80 جنيه

- سادسا الكاوتش
1- ظبط اربع فرد كاوتش من الداخل يعني شلت كل الخوابير وعملت لحامات مكانهم كان في 6 خوابير في الابع فرد مع الاستبن ب 16 جنيه


فاضلي وش دوكو للنضافه مش عارف هعمله امتي حين ميسره طبعا
وكمان عندي حدفه شمال بقاله فتره مع حمايا وانا خلاص ناويت اعملها وارصص العجل علشان بعد 100 كيلو العربيه بتغربل معايا
وطبعا العفشه بس حمايا كان مظبطها من سنه فهارجع عليها ويارب متكنش محتاجه لاني خلاص بح بح بح بح بح مفيش ولا جنيه للعربيه تاني

اعتقد دي كل حاجه
يارب اكون افدت كل الي عاوز يعرف اسعار قطع غيار التمبرا او بيفكر فيها وخايف يشتريها
حقولوا كل قطع الغيار موجوده
والاسعار شايف انها مناسبه جدا والعربيه انتشرت جدا في الفتره الاخيره