أهلا بالاخ mm
أنا هأقولك خبرتي معاها لاني شاريها من حوالي سنة و شهران ووطبت فيها بعض حاجات , العربية حقيقة ربنا يحفظها و يكفينا شرها جيدة جدا , سحبها جامد خاصة لو كانت 1600 سي سي و ناعمة جدا كعفشة و ميزتها ان صالونها واسع و كمان حجم الشنطة كبيرة و بتاخذ شنط كثيرة بالسفر .
في السفر ماكنتش بزود عن 90 و أنا باخاف أسوق أكثر من كده و كنت بأحس كأني سايق على 30 أو 40 مقارنة بال 125 القديمة بتاعة الوالد رحمه الله .
قطع غيارها متوافرة عن الكيلاني بشمبليون و يوسف بتاع الدقي و فيصل و كمان مقار و فيات 2000 في التوفيقية و أحمد الصعيدي بشبرا و أغلب قطع غيارها أصلي و ممكن تلاقي استيراد في الوكالة و عزبة شلبي .
اسعار قطع الغيار : جوز المساعدين الامامي مايلي الماني ب 410 , جوز البطاحات ب 150 , طقم الدبرياج الفيات الاوريجينال ب 650 من الكيلاني و فيه تركي تقليد ب 350 فلتر الهواء ب 40 جنيه بولندي , فلتر الزيت ب 12 جنيه .
البوجيهات الاصلي شامبيون ب 70 و ممكن تجيب بوش أو ngk ب 28 أو 30 جنيه
عيوبها : علبة الدركسيون و خراطيم الباور الاصلية بتاعتها غالية جدا : العلبة الاصلية ب 4000 جنيه جديدة من الكيلاني و خرطوم الضغط العالي بتاع الباور ب 450 جنيه و دي أغلى قطع غيار فيها و لو أنك ممكن تجيب مستعمل من الوكالة ب 350 جنيه العلبة و الخرطوم مش هيعدي ال 70 جنيه .
عيوب أخرى تقريبا مافيش باستثناء ان شنطتها عالية و بالتالي بتبقى صعبة في الركنة للمبتدئ في السواقة .
30000 و حتى 28000 ممكن يجيبو لك واحدة كويسة 1400 سي سي بدون كماليات و ممكن بيهم تجيب واحدة 1600 سي سي بس هتكون حالتها تعبانة لان اللي حالتها كويسة و 1600 سي سي بتبتدي من 33 أو 34 الف .
ال 1400 سي سي ميزتها أن مافيش باور و هترتاح من غلو سعر علبة الدركسيون و ملحقاتها و هترتاح من صيانة التكييف المكلفة بعض الشئ لكن موديلها هيكون قديم شوية 1990 أو 1991 و ممكن تلاقيها عاملة كيلو مترات كثيرة .
في هنا الكثير من الاخوة استذة في التمبرا و صلحوا ووطبوا حاجات كثيرة فيها و ممكن يدلو بدلوهم أكثر مني و هتلاقيهم جميعا في رابطة التمبرا
المفضلات