الموضوع: مفتاح جديد مشفر للكليو

السلام عليكم

من حوالي 8 شهور أحد مفاتيح الكليو باظ وكنت ناوي أعمل واحد جديد...بس إنشغلت وكسلت وكبرت ....المهم الفترة الأخيرة في المنتدي لاحظت في موضوعات كثيرة فيها شكوى من مفتاح الكليو.... والفار بداء يلعب في عبي وقربت أعلق المفتاح في صدري من كتر خوفي عليه

أخذت قرار حاسم إني لازم أعمل مفتاح جديد فوراً

بداء المشوار بإطلاعي على موضوع "عرض مفاتيح مشفرة " الي كان كريم منير عامله الله يجازيه خير على مجهوده.....العرض كان على مركز إسمه سعيد لعمل المفاتيح المشفرة.....كلمت صاحب المحل وسألته على مفتاح الكليو....قالي موجود وبيعمل من 150 لـ350جم.....قولتله إيه الفرق ؟؟....قالي على حسب نوع المفتاح والخامة.....روحتله في نفس اليوم ده والصبيان بتعه قابلوني....أول حاجة سألوني عليها هو رقم كود المفتاح معاك؟.....قولتلهم مش معاية طبعاً بس مش إنتوا بتجيبوا الرقم بالجهاز بتاعكم ده؟؟.....هنا بقى بداءت الإشتغالة ......قالولي طيب طيب مفيش مشكلة.....إتصلوا بالحاج سعيد وشرحوله الموقف ( قال يعني في مشكلة ) وخالوني أكلمه.....قالي إنت مش معاك الرقم يا باشا.....قولتله لأ عشان العربية مش معاية من الزيرو.....قالي هو بيبقى كارت عليه الرقم وبيدخدش عشان تعرف الرقم ( الإشتغالة بدأت تزيد ).....قالي إهنا كده هانعملك chip جديدة ونبرمج عليها كود العربية.....قولتله ما أنا عارف الكلام ده وجايلك عشان كده.....قالي المفتاح هايكلفك 400جم ...قولتله كتير قوي وإنت قايلي في التليفون 150جم.....قالي خلاص هاتلي إنت كود المفتاح من التوكيل وهاعملهولك بـ270جم!!!؟؟؟ ......مشيت من عنده وأنا تايه مش عارف أعمل إيه؟؟.....كلمت أيمن كبير الوحوش وقالي هايشوفلي الموضوع ده في التوكيل وبعد كده كلمت حبيب قلبي د.أكمل الله يجازيه خير وقالي روح فوراً لمحل عزب الي في شارع السودان في المهندسين وقعد يشكر في الراجل وقالي ناس كتيرة عاملة عنده وزي الفل

وبداء مشوار عزب بمكالمة تليفون بسؤالي على إمكانية عمل المفتاح....قالي موجود وبيعمل 150جم.....قولتله عايز مني كود المفتاح وأي حاجة تانية؟؟....قالي لأ.....بينا على عزب ......وصلتله الساعة 7:30 ودخلت عنده المحل ولقيت أجهزة كميبوتر ولاب توب وأجهزة كده غريبة مش عارف بتاعت إيه؟.....المهم قال لكبير الفنيين بتعوهُ روح فكلي الـImmboliser من العربية......أنا طبعاً سمعت الكلمة دي ودمي هرب .....جريت ورا الراجل وكلمته على جنب وقولتله معليش يعني إنت عارف إنت بتعمل إيه؟؟؟ عملت الوضوع ده قبل كده ؟؟.....قالي يا باشا دي تقريباً الكليو رقم 30 الي هاعمل فيها كده......الراجل فك الـImmboliser في دقيقة بدون مبالغة....أخذ الوحدة جوة المحل وبداء شغل المعلم الكبير.....في IC أو Chip على البوردة بتاعت الوحدة الي بيبقى متخزن عليها الكود....فك الIC بالـHot Air وحاطها على Chip Reader واصل بالكمبيوتر....أخذ الكود.....جاب Chip جديدة وبرمج عليها الكود وركبها في مفتاح شبه بتاع الكليو بس من غير ريموت....برمج المفتاح الجديد وهو في الكونتاكت على الـImmboliser بجهاز بيركب في الفيشة الي تحت الطفاية زي بتاع التوكيل
الحمد لله كله تمام والمفتاح شغال زي الفل......الله ينور يا نجم
الموضوع كله خد نص ساعة

إسلام باشا جاتلك على التبطاب

د.أكمل ربنا يجازيك خير

الراجل ده فعلاً يا جماعة محترف وعارف هو بيعمل إيه وعنده مفاتيح مشفرة لمركات كتير أوي



الجهاز الي بيبرمج المفتاح على الـImmboliser


المفتاح الجديد ( بدون ريموت ) وما شاء الله زلطة


الجزء الأحمر ده المكان الي بيركب فيه الـChip الجديدة




ده محل عزب.....ماتخفوش ده الجزء الي على الشارع فقط....المحل الرئيسى في شارع بجانبهُ


الحمد لله
اللهم اجعل سائرُ أعمالنا خالصةً لوجهك الكريم

مبروك المفتاح الجديد .....و دائما كده تتحفنا بموضوعاتك الحلوة و المبذول فيها مجهود...منكم نستفيد