الموضوع: السرعه القصوى للبونتو الكلاسيك

السلام عليكم
هو انا جبت بالعربية 160 كم / س
بس اعتقد لو شديت اكتر ممكن تجيب 170 بس اعتقد ده اخرها و مش هتزود عن كده لانها في الاخر 1242 سي سي
و هيبقى اجهاد عليها لو مشيت اكتر من 140 مدة طويلة

هو مبدئيا في مصر بيهتمو باحسن اداء من 0 الى 100 كم / س
و هي تسارعها من 0 لـ 100 رهيب ما شاء الله
انا طلعت من تويوتا كورولا 1300 من 0 لـ 100 و من 100 لـ 140 كنا نفس التسارع تقريبا
و بعد الـ 140 الكورولا بدأت تطلع مني. فا انت هتجيبها هتديك احسن عزم لعربية 1300 و عزمها احسن من اللانوس و الأفيو الـ 1500 عن تجربة
بالنسبة لاسعار قطع الغيار خش على اللينك ده
http://www.nilemotors.net/Nile/showthread.php?t=20531
ده فيه قطع غيار لحاجات كتير في البونتو

بالنسبة لمراكز الخدمة خش على اللينك ده كمان:
http://www.nilemotors.net/Nile/showthread.php?t=10373
و نسيت اقول ان الكورولا موديل 2007 اللي هو الشكل قبل الأخير على طول مش عربية قديمة يعني

المشاركة الأصلية كتبت بواسطة hibbsa

هو مبدئيا في مصر بيهتمو باحسن اداء من 0 الى 100 كم / س
و هي تسارعها من 0 لـ 100 رهيب ما شاء الله
انا طلعت من تويوتا كورولا 1300 من 0 لـ 100 و من 100 لـ 140 كنا نفس التسارع تقريبا
و بعد الـ 140 الكورولا بدأت تطلع مني. فا انت هتجيبها هتديك احسن عزم لعربية 1300 و عزمها احسن من اللانوس و الأفيو الـ 1500 عن تجربة
بالنسبة لاسعار قطع الغيار خش على اللينك ده
http://www.nilemotors.net/Nile/showthread.php?t=20531
ده فيه قطع غيار لحاجات كتير في البونتو

بسم الله ماشاء الله واضح انها بجد تحفة

بس ازاي تطلع من الكورولا ده حاجة وتمنين حصان وده 60 حصان

والكورولا بردوا اعلي في العزم ! هل ده يرجع لوزن العربية ؟

نفس الكلام في الانوس والافيو اعلي في الهورس باور وفي العزم

ياريت يا باشا تكلمنا في النقطة ده.

علشان العربية ده بدات احبها اوي

مش عارف انا برضه مستغرب و اعرف ان موتور الكورولا 85 حصان تقريبا
انما دي 60 بس و غم كده انا طلعت منه لغاية الـ 100 يمكن عشان فرق الحجم لان الكورولا اكبر بكتير من البونتو
الله اعلم
بس المشهور عن مواتير الفيات عزمها الرهيب
يعني مثلا اثناء الشد كان فيه عربية هيونداي اكسنت 1300 الشكل القديم ده
اللى هي كاربراتير كان عايز يدوس معانا بس اساسا محصلناش انا و الكورولا سحبنا قدام و هو معرفش يحصلنا و انا فعلا ليا صديق معاه نفس الاكسنت دي و كان بيجري جري جامد بس البونتو تعديه بكتير يعني عشان كده مستغربتش
مع ان الاكسنت كاربراتير و المفروض ان سحبها رهيب لانها بترمي بنزين لما بتحرق انما فعلا معرفش يحصلنا عشان يعمل حاجة اصلا
انا عموما مشدتش كتير بالعربية لاني عايز احافظ عليها بس عزمها ما شاء الله بيسخني و خليني اجري :) بس بحاول امسك نفسي قد ما اقدر

و عموما انا بعشق العربية عشق
سيبك من انها سريعة من 0 لـ 100 لا هي كمان ممتعة جدا في القيادة و بجد ليها باور خفييييييييييييف جدا لاقصي درجة جيت اسوق صني بعدها حسيت و كإن الدركسيون متخشب مع ان الصني باور
باور الصني تقيل جدا بالنسبة للبونتو و كذلك اللانسر و عن تجربة لانهم مع اخواتي الاتنين

بص هو مبدئيا انت متبصش في القدرة الحصانية المكتوبة في العربيات الكوري و الصيني
عندك مثلا الالنترا المفروض انها 121 حصان بس انا طلعت منها بالصني ال 120 او 118 حصان مش فاكر
و هم الاتنين نفس الموتور و القدرة الحصانية اعلى في الالنترا بس الصني عدتها
ليه؟
في رايي الشخصي ان الشركات الكورية و الصينية بيحطو قدرة حصانية وفقا لحجم الموتور و قياسات غير دقيقة لامكانيات الموتور ده
فا ممكن تكون القدرة الفعلية للالنترا مثلا 110 حصان
عندك مثلا الفيرنا هي تطلع من البونتو الكلاسيك طبعا بس بفرق بسيط انما متطلعش من الجراند بونتو الـ 1400 الـ 77 حصان بالرغم من ان الفيرنا 1600 و 106 حصان
اعتقد انك فهمت قصدي.
بس برضه ده ميجاوبش على ازاي طلعت من الكورولا لانهم الياباني مفيهوش العيب ده و القدرة اللى بيحطوها هى الفعلية
بس اللى اقدر اقولهولك ان فيات واخدة اعلى Rank لاحسن مواتير في العالم و ان واحد شغال في البافراية بنفسه قال ان مواتير الفيات تقفيلها انضف من الـ BMW و بدليل ان محدش نهائي اشتكى من مواتير الفيات انما الـ BMW كل شهرين او 3 يجيلهم موتور فيه مشكلة.